Read bahnar Horiso 112 Bible Online

Horiso 112 - bahnar bible

Horiso 112

¹Halêluya! Pŭn dêh bu băt kơ hli yom kơ Kră Yang. 'Maih wă dêh kơ tơdrong juăt Sư!

²Kon sâu sư gô pran kơtang tơ kơpal teh. Adrĕch adrung bơngai tơpăt gô đei pŭn hiôk.

³Mŭk măk păng mơdrŏng oei lăm hnam Sư. Păng tơdrong tơpăt Sư oei oei ling-lang.

⁴Hơdah pơchrang tơ anih măng mu, kơ bơngai tơpăt. Bơngai 'lơ̆ng băt mơnat, đei jơhngơ̆m 'mêm mơnat păng 'lơ̆ng tơpăt.

⁵Pŭn dêh kơ bu băt mơnat păng ăn kơ đe tŏk iŏk. Bơngai 'noh sư jang 'lơ̆ng tơpăt.

⁶Yua kơ bơngai tơpăt sư gô ưh kơ đei tơdrŏ pơpơ̆! Bơngai 'lơ̆ng tơpăt đe gô 'blŏk kơ sư ling-lang hlŏng hloi.

⁷Sư ưh kơ hli ôh mă đe roi tơdrong kơnê̆, jơhngơ̆m sư oei hơđơ̆ng, gơnang kơ Kră Yang.

⁸Jơhngơ̆m sư kơjăp, ưh kơ hli tơrơ, truh tơ sư 'bôh lu ayăt thuơ kơ sư.

⁹Sư hơmrah asong ăn tơmam kơ lu dơnuh hin. Tơdrong tơpăt sư oei oei ling-lang. Đe gô ư-ang kơ tơdrong jei sư

¹⁰Lu ayăt gô 'bôh păng blĕk tơpă. Kăp hơnĕnh, đơ̆ng noh lôch hiong đĭ, Tơdrong lu bơngai pơm kơnê̆ hơpơi gô ưh kơ đei.