Read bahnar Horiso 115 Bible Online

Horiso 115 - bahnar bible

Horiso 115

¹Ưh kơ trŏ kơ lu nhôn, ơ Kră Yang, ưh kơ trŏ kơ lu nhôn. Mă-lei trŏ kơ ư-ang kơ Ih. Yua kơ tơdrong 'mêm mơnat păng tơdrong 'lơ̆ng tơpăt Ih.

²Yua kơ kiơ lu bơngai tơmoi pơ̆n khan: “Tơ yơ Kră Yang 'Bok Kei-Dei lu sư?”

³Kră Yang 'Bok Kei-Dei lu bơ̆n tơ kơpal plĕnh ti, Sư pơm tơdrong kiơ mơ̆ng kơ Sư wă.

⁴Rup yang lu sư man păng hu maih. Noh đơ̆ng ti kon bơngai pơm.

⁵Rup man đei 'bơ̆r, mă pơma ưh kơ gơh. Đei măt, mă-lei ưh kơ 'bôh;

⁶Đei đon, mă ưh kơtơ̆ng; Đei muh, mă-lei ưh kơ băt kơ 'bâu;

⁷Đei ti, mă-lei ưh kơ gơh pel mơn. Đei jơ̆ng, ưh kơ gơh yơyak; Dăng-hơlŏng, ưh kơ đei nơ̆r re.

⁸Dôm lu bơngai pơm rup yang; păng gơnang kơ sư, Tă kơ lei-lăi thoi sư ngăl.

⁹Ơ bơngai Isơrael, gơnang bĕ kơ Kră Yang; Sư boih Tơ'ngla dŏng tơgŭm păng khêl pĕng lu sư.

¹⁰Ơ hnam Arôn gơnang bĕ kơ Kră Yang; Sư boih Tơ'ngla dŏng tơgŭm păng khêl pĕng lu sư.

¹¹Ơ lu bơngai mă hli yom kơ Kră Yang, lui gơnang kơ sư bĕ, Sư boih Tơ'ngla dŏng tơgŭm păng khêl pĕng lu sư.

¹²Kră Yang 'blŏk kơ lu bơ̆n Sư gô ăn pŭn hiôk kơ lu bơ̆n. Ăn tơdrong pŭn hiôk kơ hnam Isơrael, Kŭm gô ăn pŭn hiôk kơ hnam Arôn.

¹³Sư gô ăn tơdrong pŭn hiôk kơ lu đe bu mă hli yom kơ Kră Yang. Mă lu iĕ dah tih kư̆m lei-lăi.

¹⁴Apinh Kră Yang ăn kơ iĕm hrôh ngôh. Ăn kơ lu iĕm păng lu kon sâu iĕm.

¹⁵Hơpơi sư ăn pŭn hiôk kơ lu iĕm. Kră Yang Tơ'ngla pơjing kơ plĕnh păng teh.

¹⁶Lu hơtăl plĕnh ti jơ̆ tơmam Kră Yang ngăl. Mă-lei Sư ăn teh âu kơ kon bơngai.

¹⁷Lu bơngai lôch dah lu bơngai jur tơ pơlei lôch. Ưh kơ đei hơri bơnê kơ Kră Yang ôh.

¹⁸Mă-lei lu nhôn gô hơri bơnê kơ Kră Yang. Đơ̆ng dang ei dĭng truh tơ ning-mônh ling-lang hloi, Halêluya!