Read bahnar Horiso 116 Bible Online

Horiso 116 - bahnar bible

Horiso 116

¹Inh 'mêm bơnê kơ Kră Yang, yua kơ Sư kơtơ̆ng nơ̆r inh. Păng kơtơ̆ng nơ̆r inh krao apinh

²Inh gô krao apinh Kră Yang đĭ chăl arih inh. Yua kơ Sư pơgling đon mơ̆ng inh.

³Bră tơdrong lôch chô̆ tăp kơ inh, Tơdrong pơmat dêh atâu rôp inh, tơdrong truh kơ inh pơmat păng sơ'ngon.

⁴Lei na inh ôr krao Kră Yang: “Ơ Kră Yang! Apinh ih dŏng pơklaih bơhngola inh.”

⁵Kră Yang 'lơ̆ng tơpăt păng ăn tơdrong mơnat. Kră Yang 'Bok Kei-Dei lu bơ̆n đei jơhngơ̆m mơnat.

⁶Kră Yang wei-lăng lu bơngai tơpăt; Tơdah inh pơmat-tat Sư pơklaih inh hloi,

⁷Ơ bơhngol inh, brŏk dơ̆ng tơ anih pơdơh ih, Yua kơ Kră Yang pơm 'lơ̆ng kơ ih.

⁸Yua kơ Ih ơ Kră Yang dŏng pơklaih boih inh đơ̆ng tơdrong lôch. Măt inh huay pă lĕch đak măt, Păng jơ̆ng inh huay kơtơih pơ̆k.

⁹Inh gô yak năm 'bơ̆t anăp Kră Yang. Lăm teh đak lu bơngai arih.

¹⁰Inh oei lui mă inh đei khan. “Inh pơmat-tat dêh.”

¹¹Lăm năr inh hli tơtăm inh khan: “Rim 'nu bơngai tă kơ pơma hơlĕnh ngăl.”

¹²Inh gô iŏk kiơ wă 'mong kơ Kră Yang. Gah dôm tơdrong 'lơ̆ng mă Sư đei pơm kơ inh?

¹³Inh gô yơ̆r pơnhan dŏng pơklaih na krao apinh hăm anăn Kră Yang.

¹⁴Inh gô pơkeh ăn đĭ kơ Kră Yang dôm tơdrong đêl nơ̆r inh pơkă. 'Bơ̆t anăp đĭ-đăng kon pơlei Sư

¹⁵Tơdrong lôch lu bơngai 'lơ̆ng rơgoh jơ̆ gĭt tơpă 'bơ̆t anăp Kră Yang.

¹⁶Ơ Kră Yang inh đĭch đam Ih tơpă. Inh đĭch đam Ih, jơ̆ kon drŏ-nglo đam drŏ-kăn Ih, Ih yaih boih inh đơ̆ng bră đe chô̆.

¹⁷Inh gô pơyơ̆r tơmam soi bơnê kơ Ih Kră Yang. Păng krao apinh hăm anăn Kră Yang.

¹⁸Inh gô pơkeh ăn đĭ kơ Kră Yang dôm tơdrong đêl nơ̆r inh pơkă, 'Bơ̆t anăp đĭ-đăng kon pơlei Sư.

¹⁹Lăm cham hnam Kră Yang. Tơ tŏk-bŏk pơlei Jêrusalem, Halêluya!