Read bahnar Horiso 139 Bible Online

Horiso 139 - bahnar bible

Horiso 139

¹Ơ Kră Yang, Ih đei lăng lăng inh boih păng băt kơ inh.

²Ih băt 'bơ̆t inh hơ-oei, kơplah inh iung. Mă đơ̆ng ataih Ih băt đĭ tơdrong inh tơchĕng.

³Ih 'bôh hơđăl trong inh yak păng 'bơ̆t inh 'bĭch. Dôm trong inh Ih băt nhen.

⁴Adrol kơ hơpiĕt inh wă pơma. Ih băt đĭ tôm tĕch boih, ơ Kră Yang.

⁵Ih wei inh gah rŏng gah anăp. Dan ti Ih kơpal inh.

⁶Tơdrong hơgei Ih, inh lăng hlĭch mơsêh tơpă. Kơjung dêh inh mah 'mơn pă truh!

⁷Inh năm tơ yơ gơh weh ataih đơ̆ng Yang Bơhngol Ih Inh wă klĕnh tơ yơ gơh hlơp đơ̆ng muh măt Ih?

⁸Dah inh tŏk tơ plĕnh, Ih oei tơ noh, Mă inh jur 'bĭch lăm dêh hơtâu to Ih kư̆m tơ noh.

⁹Tơdah inh đei pơnăr păr đơ̆ng pơgê năm oei tơ tôch đak dơsĭ.

¹⁰Tơ noh ti Ih kư̆m chông ba inh. Ti 'ma Ih gô rôp wei inh.

¹¹Tơdah inh khan: “Măng mu gô gom inh hlơp. Tơdrong hơdah tăp dăr kơ inh gô jing măng mu.”

¹²Mă kơmăng kư̆m ưh kơ măng mu 'bơ̆t anăp Ih. Mă kơmăng kư̆m hơdah thoi kơ'năr, păng măng mu kư̆m thoi hơdah 'bơ̆t anăp Ih.

¹³Yua kơ Ih pơjing boih tơ lăm akâu inh. Păng pơjing boih inh tơ lăm klak mĕ inh.

¹⁴Inh bơnê kơ Ih, yua kơ Ih đei pơjing inh hlĭch chrơp tơpă. Tơdrong jang Ih hlĭch chrơp mă jơhngơ̆m inh băt nhen tơpă.a

¹⁵Kơting inh ưh kơ gơh ôn hlơp kơ Ih. Kơplah đei pơjing inh lăm anih hlơp, tanh pơjing inh lăm anih jrŭ teh đak.

¹⁶Măt Ih 'bôh boih inh kơplah oei tam mă jing bơngai. Dôm năr mă đei hơgăt boih kơ inh đei chih jô̆ boih lăm sơ̆p hla bơar Ih. Adrol kơ tim mă đei 'năr kơ inh lăm lu năr noh.

¹⁷Ơ Kră Yang 'Bok Kei-Dei, dôm tơdrong tơchĕng Ih gĭt kăl dêh kơ inh. Jô̆ lu sư lơ dêh tơpă

¹⁸Tơdah inh jô̆ dôm tơdrong tơchĕng noh lơ hloh kơ găr chuơh. Wă inh hơđơ̆r inh oei oei hăm Ih.

¹⁹Ơ Kră Yang 'Bok Kei-Dei, trŏ kơ Ih pơlôch lu bơngai pơm kơnê̆! Lu bơngai 'maih pơlôch đe weh bĕ đơ̆ng inh.

²⁰Lu sư pơma kơnê̆ kơ Ih, yua anăn Ih pơma kư̆ kă.

²¹Ơ Kră Yang, Inh ưh kơ areh kơ lu bơngai mă areh kơ Ih hă? Ưh kơ areh krưp hă lu bơngai iung blah Ih?

²²Inh areh kơ lu sư, areh dêh tơpă. Lăng lu sư jing ayăt kơ inh.

²³Ơ Kră Yang 'Bok Kei-Dei, apinh Ih lăng lăng inh păng băt kơ jơhngơ̆m inh. Pơlong lăng inh bĕ păng băt kơ tơdrong tơchĕng inh;

²⁴Apinh Ih lăng lăng inh hăm đei yoch kơnê̆ kiơ ưh? Apinh Ih chông anhăk inh lăm trong arih ling-lang. Anih jrŭ wă khan lăm tơpu kon.