Read bahnar Horiso 140 Bible Online

Horiso 140 - bahnar bible

Horiso 140

¹Ơ Kră Yang, apinh Ih dŏng pơklaih inh đơ̆ng lu bơngai pơm kơnê̆. Dŏng inh đơ̆ng bơngai pơm kơnê̆ dêh.

²Lăm jơhngơ̆m lu sư chă đon wă pơm kơnê̆ Prăt năr lu sư wă tơblah.

³Lu sư pat hơpiĕt suĕng thoi hơpiĕt 'bih. Đei bih hơkăm 'bih dong lăm hơkŭng lu sư. Sêla

⁴Ơ Kră Yang, apinh Ih wei inh klaih đơ̆ng ti lu bơngai pơm kơnê̆, Dŏng inh đơ̆ng lu bơngai pơm kơnê̆ dêh. Lu bơngai chă đon wă tơpơ̆k inh.

⁵Lu bơngai pơang đăk boih hơđong kơ inh dăng tơlei hơnhuăl wă kơ 'leh inh. Lu sư đăk kap rok trong; wă pơrăm inh.

⁶Inh pơma hăm Ih, ơ Kră Yang: “Ih boih Kră Yang 'Bok Kei-Dei inh. Ơ Kră Yang! Apinh Ih mơ̆ng nơ̆r inh krao apinh.”

⁷Ơ Kră Yang inh, pran kơtang dŏng pơklaih inh, Kră Yang gom pĕng kơ̆l inh lăm năr tơblah.

⁸Ơ Kră Yang, apinh Ih 'nĕ ăn kơ tơdrong lu bơngai pơm kơnê̆ wă. 'Nĕ ăn tơdrong lu sư pơđâu gơh jing, kơnh lu sư pơang. Sêla

⁹Ăn tơdrong kơnê̆ đơ̆ng 'bơ̆r lu bơngai pơm kơnê̆ mă wang inh, huŏng klơ̆p tơ kơ̆l lu sư kơdih.

¹⁰Ăn ngar ŭnh ngŭr tuh kơpal lu sư! Ăn đe klơ̆m tơhuŏng lu sư lăm ŭnh, lăm sơlŭng jrŭ, ưh pă gơh tŏk dơ̆ng!

¹¹Ăn kơ lu bơngai đei hơpiĕt hơlĕnh pơdăr ưh kơ gơh pơjing kơjăp lăm teh đak. Ăn tơdrong răm druh lu bơngai pơm kơnê̆.

¹²Inh băt Kră Yang gô bơwei lu bơngai pơmat-tat. Sek tơlang tơpăt kơ bơngai dơnuh hin.

¹³Lu bơngai tơpăt gô bơnê kơ anăn Ih. Bơngai tơpăt gô oei 'bơ̆t anăp Ih.