Read bahnar Horiso 146 Bible Online

Horiso 146 - bahnar bible

Horiso 146

¹Halêluya! Ơ bơhngol inh hơri ư-ang bĕ kơ Kră Yang.

²Lăm đĭ chăl arih inh gô bơnê ư-ang kơ Kră Yang; Inh oei arih dang yơ inh gô hơri ư-ang kơ Kră Yang 'Bok Kei-Dei dang noh.

³'Nĕ kơ gơnang kơ lu yŏng, kư̆m 'nĕ kơ gơnang kơ kon bơngai yua kơ lu sư ưh kơ gơh dŏng pơklaih.

⁴Bơhngola lĕch boih, akâu lu sư brŏk hơlơ̆k tơ teh, Lăm năr noh hloi dôm tơdrong lu sư wă pơm kư̆m hiong đĭ

⁵Pŭn dêh kơ bơngai bu đei Kră Yang 'Bok Kei-Dei Jakôp tơgŭm Sư. Bơngai bu hơmĕng kơ Kră Yang 'Bok Kei-Dei sư!

⁶Sư boih Tơ'ngla pơjing kơ plĕnh teh, đak dơsĭ păng đĭ-đăng tơmam arih lăm noh; Kră Yang wei jơhngơ̆m tơpăt ling-lang;

⁷Sek tơlang tơpăt, kơ lu bơngai mă đe pơjăm pơjuă; Păng ăn tơmam sa kơ lu bơngai pơngot. Kră Yang pơklaih rơngei bơngai đe phak;

⁸Kră Yang pơih ăn kơ lu bơngai măt tol gơh hơdah. Kră Yang 'bơ̆ tơpăt lu bơngai kơdŭ grŏn, Kră Yang 'mêm kơ lu bơngai tơpăt;

⁹Kră Yang wei-lăng lu bơngai tơmoi. Dŏng tơiung lu mơti păng adro po; Mă-lei Sư pơrăm lê̆ trong lu bơngai pơm kơnê̆.

¹⁰Kră Yang gô pơgơ̆r ling-lang; Ơ Siôn, Kră Yang 'Bok Kei-Dei Ih pơgơ̆r hlŏng hloi đĭ jơhnơr. Halêluya!