Read bahnar Horiso 22 Bible Online

Horiso 22 - bahnar bible

Horiso 22

¹Ơ Kră Yang 'Bok Kei-Dei! Kră Yang 'Bok Kei-Dei ơi! Liơ Ih achăng lê̆ inh? Yua kơ kiơ Ih dơ̆ng tơ ataih, Ưh kơ tơgŭm dŏng inh, ưh kơ mơ̆ng nơ̆r inh ôr krao?

²Ơ Kră Yang 'Bok Kei-Dei inh! Prăt năr inh krao khan, Ih ưh kơ tơl tơwih. Kơmăng inh kư̆m pă đei pơdơh.a

³Mă-lei gah Kră Yang Ih Tơ'ngla 'lơ̆ng rơgoh, Ih jơ̆ Yang oei tŏk-bŏk tơdrong bơnê lu bơngai Isơrael.b

⁴'Bok yă nhôn sơ̆, gơnang kơ Ih. Lu sư lui gơnang na Ih pơklaih lu sư.

⁵Lu sư krao apinh Ih, na Ih dŏng pơklaih lu sư. Lu sư gơnang kơ Ih huay kơ mơlâu.

⁶Mă-lei inh nhen thoi hơdrông ưh kơ trŏ kon bơngai. Inh jing tơmam pơm kơ kon bơngai pơjăm, Păng tơmam pơm ăn kơ kon pơlei hiĕk ăr.

⁷Dah bu 'bôh inh lu sư hiĕk ăr. Lu sư gô pơpơm 'bơ̆r cheng păng tơtreh kơ̆l na khan:

⁸“Sư gơnang kơ Kră Yang, wă kơ Kră Yang dŏng pơklaih sư; Tơpă Kră Yang gô pơklaih sư; Yua kơ Kră Yang 'mêm kơ sư.”

⁹Trŏ boih, Ih tơlĕch inh đơ̆ng klak mĕ inh. Ăn kơ inh gơnang kơ Ih kơplah inh gơning 'bơ̆t kơtơh mĕ inh.

¹⁰Đơ̆ng inh oei lăm klak, jao inh kơ Kră Yang boih; Ih boih Kră Yang 'Bok Kei-Dei inh, đơ̆ng năr mĕ inh 'nao tơpŭ kơ inh.

¹¹'Nĕ kơ oei ataih đơ̆ng inh, yua kơ tơdrong rŭng răng wă jê̆ boih, păng ưh kơ đei bu dŏng inh.

¹²Đei lơ rơmo bri tơno tăp dăr kơ inh, Lu rơmo tơno pran kơtang đơ̆ng Basan wang tăp kơ inh.

¹³Lu sư ha 'bơ̆r wă pơm kơ inh thoi dăm-brang châu hek sa păng grĕnh.

¹⁴Inh thoi đak đe tuh, đĭ kơting inh pă đei tơklep băl. Plei nuih inh thoi jrĕnh, lek đĭ tơ lăm kơtơh inh.

¹⁵Jơhngơ̆m pran inh kro thoi lơ̆n 'buh păng hơpiĕt inh klep tơ păk-'ngơk. Kră Yang dan inh tơ lăm 'mui teh thoi lôch.

¹⁶Yua kơ lu kŏ tăp dăr kơ inh, Minh khŭl bơngai kơnê̆ wang tăp kơ inh boih; Lu sư 'bet klĕch ti păng jơ̆ng inh boih.

¹⁷Inh gơh jô̆ đĭ-đăng kơting inh, Lu sư lăng pơglăn tơ inh păng hiĕk ăr kơ inh.

¹⁸Lu sư asong băl hơbĕn ao inh, Hlang lăng ao tai inh.

¹⁹Mă-lei Ih ơ Kră Yang! 'Nĕ dơ̆ng ataih đơ̆ng inh, Ơ Kră Yang pran kơtang inh! Tĕnh bĕ tơgŭm dŏng inh.

²⁰Dŏng pơklaih bơhngol inh đơ̆ng đao gưm. Păng tơdrong arih inh đơ̆ng khŭl kŏ.

²¹Pơklaih inh đơ̆ng 'bơ̆r dăm-brang, Đơ̆ng hơke rơmo bri, yua kơ Ih kơtơ̆ng boih nơ̆r inh krao.

²²Inh gô ră roi anăn Ih kơ lu 'nhŏng oh inh, Păng bơnê kơ Ih lăm kon pơlei inh.

²³Ơ lu bơngai băt hli yom kơ Kră Yang, bơnê bĕ kơ Sư, Ơ đĭ-đăng adrĕch Jakôp, kơkuh ư-ang bĕ kơ Sư, Ơ đĭ-đăng adrĕch adrung Isơrael hli yom bĕ kơ sư.

²⁴Yua kơ Sư ưh kơ đei pơdê, ưh kơ krưp. Tơdrong pơmat kơ lu đe bu mă pơmat-tat, Kŭm ưh kơ đei ôn muh măt Sư kơ đe noh; Mưh lu sư krao apinh Sư, Sư tơl tơwih hloi

²⁵Tơdrong inh hơri bơnê tơ anih akŭm tih lĕch đơ̆ng Ih, Inh gô pơm keh dôm nơ̆r đêl inh pơkă 'bơ̆t anăp lu bơngai hli yom kơ Kră Yang.

²⁶Lu bơngai dơnuh hin gô sa phĭ jơnap; Lu bơngai chơchă Kră Yang gô kơkuh bơnê kơ Sư; Ăn kơ jơhngơ̆m ih đei arih ling-lang.

²⁷Đơ̆ng tôch kơ teh đak gô 'blŏk păng wih tơ Kră Yang; Đĭ adrĕch adrung kon bơngai gô kơkuh 'bơ̆t anăp Sư.

²⁸Tơdrong Kră Yang pơgơ̆r, Sư pơgơ̆r đĭ kon bơngai.

²⁹Đĭ kơ lu bơngai mơdrŏng tih lăm teh đak kư̆m gô sŏng sa păng kơkuh; Đĭ-đăng lu bơngai brŏk tơ 'mui teh, gô drap kơkuh 'bơ̆t anăp Sư Păng dôm lu bơngai mă ưh kơ gơh bơwei tơdrong arih sư,

³⁰Minh adrĕch adrung gô bơ̆jang kơ Sư; Đe gô roi tơdrong Kră Yang kơ adrĕch adrung đơ̆ng rŏng.

³¹Adrĕch adrung noh gô ră roi gah tơdrong tơpăt Kră Yang, Roi tơbăt kơ adrĕch adrung đơ̆ng rŏng khan. Kră Yang boih pơm tơdrong noh.