Read bahnar Horiso 27 Bible Online

Horiso 27 - bahnar bible

Horiso 27

¹Kră Yang boih tơdrong hơdah păng tơdrong dŏng pơklaih inh: Inh wă hli kơ bu dơ̆ng? Kră Yang anih kơjăp kơ tơdrong arih inh: Inh wă hli kơ bu dơ̆ng?

²Mưh lu bơngai pơm kơnê̆ bruh Wă hek sa sĕch inh, lu ayăt hăm lu bơngai wă blah inh. Na lu sư pơ̆k đĭ-đăng.

³Mă khan khŭl linh wang tăp kơ inh, Jơhngơ̆m inh ưh kơ hli, Mă khan ayăt iung blah inh, jơhngơ̆m inh oei hơđơ̆ng.

⁴Inh đei apinh boih Kră Yang minh tơdrong, Tơdrong mă inh chơchă, Noh inh wă kơ đĭ chăl arih inh oei lăm hnam Kră Yang. Wă kơ lăng dôm tơdrong 'lơ̆ng tơpăt Kră Yang păng wă chă Sư tơ lăm Hnam Sư.

⁵Yua kơ lăm năr đei tơdrong truh, Kră Yang gô krôp inh lăm bơsŭn Sư, Ôn inh hlơp lăm kơđông Sư; păng pôk hơtŏk inh tơ kơpal tơmo tih.

⁶Dang ei kơ̆l inh gô ngơk kơjung. Hloh kơ lu ayăt mă wang tăp kơ inh. Lăm kơđông Sư inh pơyơ̆r tơmam soi. Hăm nơ̆r ôr chơt hiôk, Inh gô hơri, bơnê kơ Kră Yang.

⁷Ơ Kră Yang, mơ̆ng bĕ dôm nơ̆r inh krao apinh. Mơnat kơ inh păng tơl nơ̆r inh krao khan.

⁸Jơhngơ̆m inh khan kơ Ih, “chơchă bĕ muh măt Sư,”a Na inh khan! Inh gô chơchă muh măt Ih.

⁹Ơ Kră Yang 'Bok Kei-Dei mă dŏng pơklaih inh, Apinh 'nĕ ôn muh măt Ih kơ inh. 'Nĕ kơ pơpuh lu đĭch đam Ih Kơplah Ih hil blĕk. Ih jơ̆ Kră Yang tơgŭm dŏng inh, 'nĕ kơ lê̆ inh, 'nĕ kơ achăng inh.

¹⁰Mă mĕ 'bă achăng lê̆ inh, Kră Yang, gô sơng iŏk inh

¹¹Ơ Kră Yang, bơtho tơ'bôh kơ inh trong Ih, Yua kơ đei lu bơngai pơm kơnê̆ kơ inh, Apinh Ih dui ba inh lăm trong tơhnă.

¹²'Nĕ jao inhb tơ lu ayăt kơ inh kiơ̆ thoi lu sư wă, Yua kơ nơ̆r pơm kơdranh hơlĕnh Păng lu bơngai trĕn wă pơm kơnê̆ kơ inh.

¹³Ngeh tơpă Inh gô 'bôh tơdrong pŭn hiôk đơ̆ng Kră Yang tơ lăm teh đak lu bơngai arih.

¹⁴Chang gô bĕ Kră Yang Athei chơ̆n jơhngơ̆m păng hơđơ̆ng đon! Tơpă, chang gô bĕ Kră Yang.