Read bahnar Horiso 31 Bible Online

Horiso 31 - bahnar bible

Horiso 31

¹Ơ Kră Yang, inh ôn kơ'nơp lăm Ih. 'Nĕ ăn kơ inh mơlâu ling-lang. Apinh tơdrong tơpăt Ih tơgŭm dŏng inh.

²Apinh Ih pơgling đon mơ̆ng inh, mă kuăng kuăng dŏng pơklaih inh; Pơm bĕ thoi tơmo tih kơjăp ăn kơ inh kơ'nơp, Păng thoi kơđông kơjăp dŏng pơklaih inh.

³Yua kơ Ih boih thoi tơmo tih păng anih kơjăp inh gơnang, yua kơ Anăn Ih Apinh chông ba inh.

⁴Pơklaih bĕ inh đơ̆ng hơnhuăl. Mă lu sư dăng tăp kơ inh, Yua kơ Ih boih anih mă inh kơ'nơp.

⁵Inh jao bơhngol ih lăm ti Kră Yang. Ơ Kră Yang, 'Bok Kei-Dei tơpăt sĭt tơpă. Ih huai iŏk inh boih.

⁶Inha areh kơ lu bơngai kơkuh kơ rup man, hiong răm, Mă-lei inh gơnang kơ Kră Yang.

⁷Inh gô chơt hiôk păng 'nă hal, Lăm tơdrong Ih 'mêm mơnat. Yua kơ Ih 'bôh boih tơdrong pơmat-tat inh, Băt boih kơ tơdrong bơhngol inh sơ'ngon.

⁸Ih ưh kơ đei jao inh tơ lu ayăt. Mă-lei ăn kơ jơ̆ng inh dơ̆ng tơ anih rơhơi.

⁹Ơ Kră Yang! Mơnat bĕ kơ inh, yua kơ inh rŭng răng. Măt inh hrŏ yua kơ ơh sơ'ngon. Bơhngol păng akâu jăn inh kư̆m lei-lăi.

¹⁰Tơdrong arih inh hiong hiach yua kơ ơh sơ'ngon. Lu sơnăm inh jur yua kơ tơtok tơtăm. Yua kơ tơdrong kơnê̆ inh, b Tơdrong pran kơtang inh huach hiong păng Kơting inh hach răm.

¹¹Yua kơ lu bơngai ayăt kơ inh, inh jing bơngai đe pơjăm pơjuă. Pơm kơ lu rông 'bôt rai pơjăm păng pơm kơ đe hli krê kơ inh, c Lu đe bu mă 'bôh inh oei tơ rok trong kơdâu weh ngăl.

¹²Inh jing bơngai lu sư hiơt, d thoi lôch boih, Inh thoi minh pôm ge pơchah pơchek.

¹³Inh kơtơ̆ng boih lơ nơ̆r lu sư chă pơm tơdrong.e Hli krưp tăp kơ inh. Thoi lu sư pơđâu wă blah inh, Wă tơhiong lê̆ tơdrong arih inh.

¹⁴Mă-lei, ơ Kră Yang! Inh gơnang kơ Ih. Inh khan: “Ih boih Kră Yang 'Bok Kei-Dei inh.”

¹⁵Chăl arihf inh, lăm ti Ih, Apinh Ih dŏng pơklaih inh dơ̆ng ti lu bơngai ayăt păng đơ̆ng lu bơngai pơmat inh,

¹⁶Apinh pơdah muh măt Ih kơ lu đĭch đam Ih. Đơ̆ng tơdrong 'mêm Ih, dŏng pơklaih inh,

¹⁷Ơ Kră Yang! 'Nĕ ăn kơ inh mơlâu, yua kơ inh krao apinh ih. Ăn kơ lu bơngai kơnê̆ mơlâu păng ngăn hreh jur tơ lăm dêh atâu!g

¹⁸Pơm bĕ kơ 'bơ̆r lu bơngai hơlĕnh kơmlo. Lu nơ̆r pơang, lu sư pơma pơjăm lu bơngai tơpăt.

¹⁹Tơdrong 'lơ̆ng tơpăt Ih tih dêh, Mă ăn boih kơ lu bơngai hli yom kơ Ih păng ăn boih kơ lu bơngai năm kơ'nơp lăm Ih. 'Bơ̆t anăp lu kon bơngai.

²⁰Ih ôn lu sư tơ anih hlơp 'bơ̆t anăp Ih. Klaih đơ̆ng lu đe wă pơm kơnê̆, Ih ôn lu sư lăm bơsŭn. Klaih đơ̆ng hơpiĕt lu bơngai blah tơgar.

²¹Bơnê ư-ang kơ Kră Yang. Yua kơ tơ lăm pơlei kơjăp Sư. Sư tơ'bôh ăn boih kơ inh tơdrong 'mêm mơnat hlĭch chrơp Sư!

²²Lăm năr chhŭr nuih inh khan thoi âu: “Đe tơweh inh ataih boih đơ̆ng anăp Ih.” Mă-lei Ih mơ̆ng nơ̆r inh krao apinh. Kơplah inh krao Ih dŏng pơklaih.

²³Ơ lu bơngai 'lơ̆ng rơgoh Kră Yang, 'mêm bĕ kơ Sư. Kră Yang wei-lăng lu bơngai tơnen tơnăp. Mă-lei pơm 'mong tơpă kơ lu đe bu mă oei sa pơang.

²⁴Ơ lu bơngai mă chang gô Kră Yang. Chơ̆n jơhngơ̆m, hơđơ̆ng đon bĕ.