Read bahnar Horiso 32 Bible Online

Horiso 32 - bahnar bible

Horiso 32

¹Pŭn dêh kơ bơngai bu mă tơdrong yoch sư gơh mơnat ăn, Huay pă jô̆ yoch.

²Pŭn dêh kơ bu mă Kră Yang huay kơ jô̆ kơnê̆, Păng lăm jơhngơ̆m ưh kơ đei hơlĕnh!

³Mưh inh ĕnh, lu kơting inh hiong hiach đĭ păng inh ôr krao prăt năr.

⁴Kơmăng kơ'năr ti Kră Yang kơtĭt inh trăp dêh.a Tơdrong pran kơtang inh hrĕng krob thoi tŏ bơyan phang,

⁵Inh tơbral yoch hăm Kră Yang 'Bok Kei-Dei, Ưh pă đei ôn dôm yoch kơnê̆ inh. Inh khan: “Inh tơbral roi đĭ dôm tơdrong yoch glăi inh kơ Kră Yang. Ih huay pă jô̆ yoch inh.” Sêla

⁶Thoi noh lu bơngai tơpătc băt chu yom krao khan kơ Ih. Lăm jơ mă oei gơh tơ'bơ̆p hăm Ih, Mă khan đei đak lơ̆p rai tih, kư̆m ưh kơ đei lơ̆p truh tơ sư.

⁷Ih bơih anih inh kơ'nơp, Ih tơgŭm inh lăm năr đei tơdrong truh, Ih wang tăp kơ inh hăm tơdrong hơrid dŏng pơklaih. Sêla

⁸Inh gô bơtho tơ'bôh kơ lu iĕm trong lu iĕm athei năm kiơ̆. Măt Inh gô wei-lăng păng na bơtho tơ'bôh kơ lu iĕm.e

⁹'Nĕ kơ thoi aseh păng aseh iĕ, ưh kơ đei đon tơchĕng, Iŏk bĕ dam pơhơ̆p, tơlei pơhơ̆p 'nao na gơh pơhơ̆p 'bơ̆r lu sư. Tơdah ưh, lu sư ưh kơ năm jê̆ Ih.

¹⁰Lu bơngai yoch đei tơdrong pơmat-tat. Mă-lei bơngai bu băt gơnang kơ Kră Yang, tơdrong 'mêm mơnat war tăp kơ bơngai noh.

¹¹Ơ lu bơngai tơpăt, chơt hiôk bĕ Păng 'nă hal bĕ lăm Kră Yang! Ơ lu bơngai đei jơhngơ̆m tơpăt, ôr jreo chơt bĕ!