Read bahnar Horiso 33 Bible Online

Horiso 33 - bahnar bible

Horiso 33

¹Ơ lu bơngai tơpăt, chơt hiôk bĕ lăm Kră Yang. Tơdrong bơnê trŏ kơ lu bơngai tơpăt.

²Iŏk bĕ tĭng-nĭng bơnê kơ Kră Yang, Yua bĕ brŏ mam mơjĭt dăng tơlei na hơri bơnê kơ Sư,

³Hơri bĕ Kơ Sư minh 'bai hơri 'nao, reh brŏ tơlei mă hiôk păng hơri nơ̆r re chơt hiôk.

⁴Yua kơ nơ̆r Kră Yang tơpăt, Lu tơdrong jang Sư pơm tă kơ 'blep trŏ ngăl.

⁵Mơnat Sư lăp đon kơ tơdrong tơpăt păng tơdrong trŏ Tơdrong 'mêm mơnat Sư 'bĕnh-'bang kơ teh đak.

⁶Lu plĕnh mă đei pơjing đơ̆ng nơ̆r Kră Yang. Đĭ lu linh tơ plĕnh đơ̆ng hơyuh dui jơhngơ̆m đơ̆ng 'bơ̆r Sư na đei.

⁷Sư akŭm mong đak dơsĭ lăm đak poh-yă, Păng 'măn lu đak jrŭ lăm hnam mong lu sư.

⁸Jơ̆p kơ teh đak hli yom bĕ kơ Kră Yang Đĭ kon bơngai lăm teh đak hli bĕ kơ Sư.

⁹Đơ̆ng Sư sơkat, na đei hloi, Sư athei, na tơmam kơjăp hlŏng hloi.

¹⁰Kră Yang pơrăm lê̆ lu dêh char chă đon wă pơm kơnê̆. Tơhiong lê̆ tơdrong kon bơngai pơđâu wă pơm.

¹¹Mă-lei tơdrong Kră Yang pơđâu kơjăp ling-lang, Jơhngơ̆m đon Sư tơchĕng oei đei dĭng truh đĭ jơhnơr.

¹²Pŭn dêh char ayơ đei Kră Yang pơm 'Bok Kei-Dei sư. Adrĕch adrung ayơ mă Sư rơih pơm thoi tơmam Sư!

¹³Kră Yang đơ̆ng plĕnh nger lăng, 'Bôh đĭ-đăng kon bơngai.

¹⁴Sư lăng đơ̆ng anih Sư oei. Tơ đĭ-đăng bơngai oei lăm teh đak,

¹⁵Sư pơjing jơhngơ̆m kon bơngai, Sư lăng đĭ dôm tơdrong lu sư pơm.

¹⁶Pơtao mă gơh klaih ưh kơ sĭ. Yua kơ Linh sư lơ. Bơngai mă pran kơtang kư̆m ưh kơ klaih hlôi đơ̆ng pran kơtang sư noh.

¹⁷Gơnang kơ aseh wă kơ gơh klaih noh tơdrong kơ đei. Mă khan jơhngơ̆m sư pran kơtang kư̆m ưh kơ gơh klaih hlôi.

¹⁸To măt Kră Yang lăng tơ lu bơngai mă hli yom kơ sư păng chang gô tơdrong 'mêm mơnat.

¹⁹Wă pơklaih bơhngol lu sư đơ̆ng lôch, Păng bơwei tơdrong arih lu sư lăm năr pơngot rơwĕt.

²⁰Bơhngol lu nhôn chang gô Kră Yang, Sư boih tơdrong dŏng tơgŭm păng khêl lu nhôn.

²¹Jơhngơ̆m lu nhôn chơt hiôk lăm Sư, Yua kơ lu nhôn 'măn boih jơhngơ̆m lui yom lăm Anăn rơgoh Sư.

²²Ơ Kră Yang, ăn tơdrong 'mêm mơnat ih jruh tơ lu nhôn, yua kơ lu nhôn chang hơmĕng lăm Ih.