Read bahnar Horiso 35 Bible Online

Horiso 35 - bahnar bible

Horiso 35

¹Ơ Kră Yang, pơjah pơjăng bĕ, a hăm lu bơngai pơjah pơjăng hăm inh. Tơblah bĕ hăm lu bơngai tơblah păng inh.

²Apinh ih chĕp khêl Ih hăm khêl iĕ. Iung na tơgŭm dŏng inh.

³Iŏk bĕ hơlă, găn trong lu đe druh inh. Pơma bĕ hăm bơhngol inh. “Inh jơ̆ tơdrong dŏng pơklaih ih.”

⁴Ăn kơ lu bơngai chă pơlôch tơ rŏng arih inh gô mơlâu păng hlơ̆l lĕm. Rŏ kơ pơm ăn kơ lu bơngai chă pơrăm inh kơdŭn tơ rŏng păng mơlâu.

⁵Ăn kơ lu sư thoi hơkam 'ba kial bơbơ̆t, Ăn kơ Linh jang Kră Yang puh tơweh lu sư!

⁶Ăn kơ trong lu sư măng mu păng rơbơ̆r tơsĕr. Apinh Linh jang Kră Yang puh tơweh lu sư!

⁷Yua kơ lu sư dăng hơnhuăl kơ inh tơdrong kơ đei. Păng lu sư sir sơlŭng jrŭ wă kơ inhb puh tơdrong kơ đei.

⁸Ăn tơdrong răm truh kơ lu sư ưh kơ tam băt. Rŏ kơ hơnhuăl lu sư dăng 'leh lu sư kơdih. Ăn kơ lu sư huŏng tơ sơlŭng noh păng lôch đĭ.

⁹Bơhngol inh gô chơt hiôk lăm Kră Yang. Chhôk hal lăm Sư dŏng pơklaih

¹⁰Lu kơting inh khan: “Ơ Kră Yang. Bu thoi Ih, Ih pơklaih lu bơngai tơrăn đơ̆ng lu bơngai pran hloh kơ sư. Tơgŭm lu bơngai pơmat păng lu bơngai dơnuh hoh kơđei đơ̆ng ti lu bơngai tơtông tơgar.”

¹¹Lu bơngai hơlĕnh pơdăr lu sư iung apinh dôm tơdrong mă inh ưh kơ băt

¹²Lu sư iŏk tơdrong kơnê̆ mong đêl inh pơm 'lơ̆ng Achăng lê̆ bơhngol inh pă đei hơmĕng kiơ.

¹³Gah inh 'bơ̆t năr sư jĭ, inh hrŭk 'bi. Ơ̆t kơ por pơmat akâu inh Nơ̆r inh krao khan ưh kơ đei tơl tơwih.c

¹⁴Inh lăng lu sư thoi buăl juăt, thoi 'nhŏng oh. Inh sơ'ngon kŭp thoi đe hmoi ơh kơ mĕ sư lôch.

¹⁵Mă-lei lăm năr inh đei tơdrong truh, lu sư akŭm băl chơt hiôk, Lu sư akŭm pơđâu wă pơm kơnê̆ kơ inh, na inh ưh kơ băt, Lu sư hek sa inh pă đei pơdơh.

¹⁶Lu sư kăp hơnĕnh wă pơm kơ inh. Lu bơngai kơnê̆ nŏng kơ blei hiap inh.

¹⁷Ơ Kră Yang! Ih wă gô lăng dĭng dang yơ? Apinh Ih pơklaih bơhngol inh đơ̆ng lu sư wă pơrăm. Păng dui iŏk tơdrong arih inh đơ̆ng dăm-brang.

¹⁸Inh gô bơnê ư-ang kơ Ih lăm năr akŭm tih, Ư-ang kơ Ih 'bơ̆t tŏk-bŏk kon pơlei pơla lơ.

¹⁹'Nĕ ăn kơ lu bơngai pơm kơnê̆ kơ inh tơdrong kơ đei chơt hiôk. Kŭm 'nĕ kơ lê̆ lu areh kơ inh, kơ'mreh măt tơdrong kơ đei yua kơ Ih.

²⁰Yua kơ lu sư ưh kơ đei nơ̆r hiôk 'biơ̆ Mă-lei tă kơ pơma hơlĕnh pơdăr. Blah lu bơngai dim iơ̆m lăm teh đak.

²¹Lu sư ha 'bơ̆r wă pơm kơ inh, Na khan: “Ơ, ơ! Măt lu bơ̆n 'bôh boih.”

²²Ơ Kră Yang! Ih 'bôh boih tơdrong noh, Apinh lê̆ kơ ngăn. Kră Yang ơi! 'Nĕ kơ achăng inh.

²³Ơ Kră Yang 'Bok Kei-Dei, jơ̆ Kră Yang inh, hơđơ̆r bĕ, iung bĕ, Dŏng tơgŭm inh, d Păng dŏng bơwei inh.

²⁴Ơ Kră Yang 'Bok Kei-Dei inh, Dŏng inh kiơ̆ kơ tơdrong tơpăt Ih. 'Nĕ ăn kơ lu sư chơt hiôk yua kơ inh.

²⁵'Nĕ ăn kơ lu sư khan lăm jơhngơ̆m: “Ơ! To, tơdrong mă lu bơ̆n wă,”e Dah khan: “Lu bơ̆n luăn đĭ sư boih.”

²⁶Rŏ kơ bơngai bu chơt hiôk kơ tơdrong pơmat inh hơdai mơlâu păng hlơ̆l đĭ-đăng. Rŏ kơ Lu bơngai mă pơang kơ inh, lê̆ lu sư mơlâu păng hlơ̆l pă kĕ.

²⁷Ăn kơ đe bu mă chơt hiôk kơ tơdrong tơpăt inh, gô ôr chơt, hiôk-hian. Ăn kơ lu sư pơư ưh kơ pơdơh, “Kră Yang tih hloh tơpă! Sư hiôk tơpă ăn kơ lu đĭch đam Sư đei tơdrong hiôk-hian.”

²⁸Thoi noh, hơpiĕt inh gô roi tơdrong tơpăt Sư. Inh bơnê kơ Kră Yang prăt năr.