Read bahnar Horiso 40 Bible Online

Horiso 40 - bahnar bible

Horiso 40

¹Inh adrin chang gô Kră Yang. Sư pơgling đon mơ̆ng nơ̆r inh krao ôr.

²Sư dui hơtŏk inh đơ̆ng sơlŭng hli krưp. Pơklaih đơ̆ng hlŭt jrŭ, Sư dan jơ̆ng inh kơpal tơmo, Păng pơm ăn kơ rim yak inh kơjăp hơđơ̆ng.

³Sư ăn kơ 'bơ̆r inh đei 'bai hơri 'nao, Hơri bơnê kơkuh kơ Kră Yang 'Bok Kei-Dei lu bơ̆n. Lơ bơngai gô 'bôh păng hli, Păng gơnang kơ Kră Yang.

⁴Pŭn dêh kơ đe bu mă gơnang kơ Kră Yang. Ưh kơ kiơ̆ lu bơngai pơang Păng lu bơngai chă yang glăi!a

⁵Ơ Kră Yang, 'Bok Kei-Dei inh, tơdrong jang hlĭch chrơp Ih đei pơm boih, Păng lu tơdrong Ih tơchĕng kơ lu nhôn. Ưh kơ gơh pơting bu hăm Ih.b Tơdah inh wă ră roi dah tơbăt. Tơpă lơlap dêh ưh kơ kĕ kơ jô̆,

⁶Ih ưh kơ wă ôh tơmam soi pơyơ̆r dah tơmam soi 'buh. Ih pơih đon inh boih. Ih ưh pă wă tơmam soh 'buh dah tơmam soi huai yoch.

⁷Dang ei inh khan: “Âu inh truh, Lăm sơ̆p hla bơar đei chih boih gah inh.”

⁸Ơ Kră Yang 'Bok Kei-Dei, inh hiôk tơpă pơm kiơ̆ nơ̆r Ih. Khôi juăt Ih oei tơ lăm jơhngơ̆m inh.

⁹Lăm năr akŭm tih inh ră roi boih kơ tơdrong 'nao 'lơ̆ng tơpăt Ih; to, inh ưh kơ đei ôn 'bơ̆r, Ơ Kră Yang, inh băt boih tơdrong noh.

¹⁰Inh ưh kơ đei ôn tơdrong tơpăt Ih lăm jơhngơ̆m inh, Inh roi tơbăt boih 'lơ̆ng tơpăt păng tơdrong Ih dŏng pơklaih, Inh ưh kơ đei ôn lăm năr akŭm tih gah tơdrong Ih 'mêm păng tơdrong Ih mơnat sĭt tơpă.

¹¹Ơ Kră Yang! 'Nĕ chĭt jơhngơ̆m Ih 'mêm mơnat kơ inh. Apinh tơdrong 'mêm păng mơnat sĭt tơpă Ih wei-lăng inh ling-lang.

¹²Yua kơ đei tơdrong kơnê̆ lơ pă kĕ jô̆ wang tăp kơ inh. Tơdrong kơnê̆ inh druh tam inh boih, Dĭng inh pă gơh 'bôh. Sư lơ tơpă hloh kơ găr sŏk tơ kơpal kơ̆l inh. Jơhngơ̆m inh rơdu.c

¹³Ơ Kră Yang! Apinh Ih pơklaih inh, Ơ Kră Yang, tĕnh tĕnh bĕ tơgŭm inh.

¹⁴Dôm lu bơngai mă wă pơlôch tơdrong arih inh. Ăn kơ lu sư kơdơ̆ mơlâu păng rŭng răng đĭ-đăng bĕ. Dôm kơ lu bơngai mă wă kơ pơrăm inh Ăn kơ lu sư kơdŭn tơ rŏng mơlâu rŭng răng,

¹⁵Lu đe bu mă khan kơ inh: “Ha ha!” Ăn kơ lu sư hơwơ̆l yua kơ tơdrong mơlâu lu sư.

¹⁶Apinh ăn kơ đĭ-đăng lu bơngai mă krao chă Ih. Đei tơdrong chơt hiôk păng rơnŭk rơnua lăm Ih. Ăn kơ lu đe bu mă 'mêm kơ tơdrong Ih dŏng pơklaih ling-lang pơma khan thoi âu: “Kră Yang tih hloh?”

¹⁷Gah inh jing dơnuh păng pơmat-tat. Apinh, Kră Yang 'blŏk kơ inh. Ih jơ̆ Kră Yang tơgŭm dŏng inh, Păng Kră Yang pơklaih inh. Ơ Kră Yang 'Bok Kei-Dei apinh Ih 'nĕ pă hiơ̆.