Read bahnar Horiso 52 Bible Online

Horiso 52 - bahnar bible

Horiso 52

¹Ơ bơngai nuih pran, liơ ih pơang kơdih tơdrong kơnê̆. Tơdrong 'mêm mơnat Kră Yang 'Bok Kei-Dei oei oei ling-lang.

²Đĭ năr ih chă pơm kơnê̆. Hơpiĕt thoi săng kôih han ih pơma hơlĕnh.

³Ih wă kơ tơdrong kơnê̆ hloh kơ tơdrong 'lơ̆ng, 'Maih pơma hơlĕnh hloh kơ pơma tơpăt Sêla

⁴Ơ hơpiĕt hơlĕnh. Ih 'mêm dêh kơ nơ̆r wă pơrăm.a

⁵Kră Yang 'Bok Kei-Dei gô pơrăm ih hlŏng hloi, Sư gô rôp ih, dui tơlĕch đơ̆ng anih ih. Păng buch lê̆b ih đơ̆ng teh lu bơngai arih. Sêla

⁶Lu bơngai tơpăt gô 'bôh păng hli, Păng hiĕk kơ sư na khan:

⁷“To, bơngai mă ưh kơ gơnang kơ Kră Yang 'Bok Kei-Dei wei sư pran kơjăp. Mă-lei gơnang kơ tơdrong sư mơdrŏng.c Wă pơm kơ sư kơjăp lăm tơdrong sư pơm kơnê̆!”

⁸Gah inh thoi 'long ôliwơ hơdrih 'lơ̆ng lăm Hnam Kră Yang 'Bok Kei-Dei. Inh lui gơnang kơ tơdrong 'mêm Kră Yang 'Bok Kei-Dei ling-lang hlŏng hloi.

⁹Inh gô hơri bơnê kơ Ih ling-lang, yua kơ Ih đei pơm tơdrong noh, Inh gô gơnang kơ Anăn Ih 'bơ̆t anăp lu bơngai lui gơnang kơ Ih,d yua kơ Anăn Ih 'lơ̆ng tơpăt.