Read bahnar Horiso 55 Bible Online

Horiso 55 - bahnar bible

Horiso 55

¹Ơ Kră Yang 'Bok Kei-Dei, apinh pơgling đon mơ̆ng nơ̆r inh krao khan. 'Nĕ kơ ôn muh măt Ih, kơ tơdrong inh krao apinh.

²Apinh Ih mơ̆ng păng tơl tơwih kơ inh. Inh sơ'ngon, tơtăm păng rŭng răng.

³Yua kơ đơ̆ng nơ̆r lu ayăt ôr pơret păng đơ̆ng lu bơngai kơnê̆ pơjuă pơđep inh; Yua kơ lu sư thim tơdrong kơnê̆ tơ inh. Pơmat inh krưp tơpă. Păng druh pơm kơ inh hăm hil blĕk dêh.

⁴Inh jĭ lăm jơhngơ̆m inh dêh, Tơdrong hli kơ lôch blah inh.

⁵Tơdrong hli păng tơrơ truh tơ inh. Tơdrong hli krưp kư̆m gom inh.

⁶Inh khan: “Ơ rŏ kơ inh đei pơnăr thoi sem kơtơp, na gô păr pơdơh tơ anih nai.

⁷Tơpă, inh gô kơdâu ôn tơ ataih, na oei tơ lăm char glă. Sêla

⁸Inh hăt hot kơdâu kơ'nơp đơ̆ng kial tih wă weh hlôi đơ̆ng hơbŭt hơbang.”

⁹Ơ Kră Yang, pơrŭng bĕ lu sư, pơm kơ nơ̆r lu sư jing hơwơ̆l; Inh 'bôh tơdrong kơnê̆ tơgar pơjah băl lăm plei tih.

¹⁰Măng păng năr lu sư dăr tăp kơ dur pơlei tih; Đei pơm kơnê̆ băl păng tơhil băl lăm plei tih.

¹¹Tơdrong pơrăm băl oei lăm noh, tơdrong pơjuă băl păng hơlĕnh pơdăr ưh kơ weh đơ̆ng trong tih.

¹²Ưh kơ sĭ lu ayăt kơ inh che bơle kơ inh, tơdah thoi ei, na inh kĕ pŭ iŏk mơ̆n; Kŭm ưh kơ sĭ lu areh kơ inh, pơm kơnê̆ kơ inh; Tơdah thoi ei lei inh kơdâu đơ̆ng sư.

¹³Mă-lei Ih boih lei-lăi kơ inh, bôl hăm inh, buăl juăt inh.

¹⁴Lu nhôn đei pơđâu băl 'lơ̆ng tơpă; lu nhôn năm hơdai tơpôl lơ truh tơ hnam Kră Yang 'Bok Kei-Dei.

¹⁵Ăn tơdrong lôch truh tơ lu ayăt kơ inh! Tơjur lu sư oei arih tơ lăm dêh atâu. Yua kơ tơdrong kơnê̆ oei tơ lăm hnam, lăm jơhngơ̆m lu sư.

¹⁶Gah inh krao apinh Kră Yang 'Bok Kei-Dei. Na Kră Yang 'Bok Kei-Dei gô dŏng pơklaih inh.

¹⁷Pơgê hrôih, 'năr dơ̆ng glơh kơsơ̆, Inh gô sơ'ngon hơdrĭ ôr krao; Sư gô mơ̆ng nơ̆r inh.

¹⁸Sư pơklaih bơhngol inh đơ̆ng tơdrong tơblah, Păng ăn kơ inh hiôk-hian. Yua kơ lơ tơpă bơngai tơblah păng inh.

¹⁹Kră Yang 'Bok Kei-Dei, jơ̆ Tơ'ngla đơ̆ng sơ̆. Gô mơ̆ng păng pơm tơwih pơrăm lu sư. Sêla Yua kơ lu sư ưh kơ đei tơplih lăm tơdrong lu sư pơm. Kŭm ưh kơ hli kơ Kră Yang 'Bok Kei-Dei.

²⁰Lu bơngai noh hiŏng ti pơrăm lu bơngai oei 'lơ̆ng hăm lu sư. Păng plơ̆ plĕch nơ̆r lu sư pơkă.

²¹'Bơ̆r lu sư pơma rơbơ̆r hloh kơ rơmă. Mă-lei lăm jơhngơ̆m lu sư chă tơdrong tơblah. Nơ̆r lu sư rơngơp hloh kơ rơmă, mă-lei nhen đao toh boih đơ̆ng hơnglop.

²²Jao bĕ pŭ trăp ih kơ Kră Yang. Sư gô tơiung Ih; Sư ưh kơ đei lê̆ lu bơngai tơpăt pơ̆k.

²³Ơ Kră Yang 'Bok Kei-Dei ih boih gô. Klơ̆m lu bơngai pơm kơnê̆ chă pơhlŭ đe. Lu sư ưh pă đei arih truh minh puăt chăl đêl pơkă. Gah inh gô lui gơnang kơ Ih.