Read bahnar Horiso 59 Bible Online

Horiso 59 - bahnar bible

Horiso 59

¹Ơ Kră Yang 'Bok Kei-Dei! Apinh ih dŏng pơklaih inh, đơ̆ng lu ayăt kơ inh. Tơgŭm dŏng inh đơ̆ng lu bơngai iung blah inh

²Apinh pơklaih inh đơ̆ng lu bơngai pơm kơnê̆! Păng pơklaih inh đơ̆ng lu bơngai chă pơlôch đe.

³Yua kơ to, lu sư răp wă pơlôch inh; Lu bơngai pơm kơnê̆ pơđâu băl wă pơm kơ inh. Ưh kơ trŏ yua kơ inh pơm glăi. Kŭm ưh kơ trŏ yua kơ tơdrong yoch inh.

⁴Ơ Kră Yang. Inh huay kơ glăi ră mă-lei lu sư wă druh blah inh. Apinh Ih, hơđơ̆r bĕ tơgŭm dŏng inh păng lăng inh.

⁵Ơ Kră Yang Ih boih 'Bok Kei-Dei Tih Hloh, jơ̆ Kră Yang 'Bok Kei-Dei Isơrael. Iung bĕ na phak đĭ kơ teh đak. 'Nĕ kơ mơnat kơ lu bơngai pơm kơnê̆. Sêla

⁶Kơsơ̆ lu sư hơlơ̆k dơ̆ng, lu sư grĕnh thoi kŏ, Păng dăr tăp pơlei.

⁷To 'bơ̆r lu sư lĕch nơ̆r blei hiap. Hơkŭng lu sư thoi đao. Yua kơ lu sư khan: “Kơbĭ bu kơtơ̆ng.”

⁸Mă-lei ơ Kră Yang 'Bok Kei-Dei! Ih gô hiĕk kơ lu sư. Păng pơjăm đĭ lu teh đak noh.

⁹Ơ pran kơtang inh, inh gô lăng tơ Ih. Yua kơ Kră Yang 'Bok Kei-Dei jơ̆ anih kơjăp mă inh kơ'nơp.

¹⁰Kră Yang 'Bok Kei-Dei mă 'mêm kơ inh Sư gô năm tơ'bơ̆p inh. Kră Yang 'Bok Kei-Dei gô tơ'bôh ăn kơ inh tơdrong jei jơnei inh lu ayăt kơ inh.

¹¹Ơ Kră Yang, jơ̆ khêl pĕng dŏng lu nhôn. 'Nĕ kơ pơlôch lu sư, hli kơ kon pơlei pơla hiơt; Yua bĕ tơdrong mơsêh Ih na pơm kơ lu sư tơklah tơklang păng tơhuŏng lu sư.

¹²Yua kơ yoch đơ̆ng 'bơ̆r lu sư, nơ̆r đơ̆ng hơkŭng lu sư păng yua kơ lu sư pơma blei hiap hăm hơlĕnh. Ăn kơ lu sư 'leh đom lăm tơdrong pơang lu sư kơdih!

¹³Apinh Kră Yang hil păng pơlôch lu sư, tơpă pơlôch pơrăm đĭ lu sư. Wă kơ lu sư ưh pă đei dơ̆ng; Ăn kơ kon bơngai băt Kră Yang 'Bok Kei-Dei wei-lăng păng pơgơ̆r? Jakôp! Truh tơ tôch teh đak. Sêla

¹⁴Mưh kơsơ̆ lu sư hơlơ̆k dơ̆ng, grĕnh thoi kŏ. Păng dăr tăp pơlei.

¹⁵Lu sư chă sa yak tơ âu tơ to; Dah ưh kơ phĭ lu sư grĕnh oei kơtă prăt măng.

¹⁶Mă-lei inh gô hơri bơnê, tơdrong mơsêh Ih Pơgê hrôih drôih hơri re kơ tơdrong Ih 'mêm mơnat; Yua kơ Ih jing anih kơjăp inh kơ'nơp. Minh anih inh kơ'nơp lăm năr đei tơdrong anat anot.

¹⁷Ơ tơdrong pran kơtang inh, inh gô hơri bơnê kơ Ih. Ơ Kră Yang 'Bok Kei-Dei Ih anih kơjăp inh kơ'nơp, Kră Yang 'Bok Kei-Dei mă 'mêm kơ inh.