Read bahnar Horiso 60 Bible Online

Horiso 60 - bahnar bible

Horiso 60

¹Ơ Kră Yang 'Bok Kei-Dei! Ih achăng lê̆ lu nhôn, pă đei dŏng lu nhôn; Ih hil boih, apinh Ih tơiung lu nhôn dơ̆ng.

²Ih pơm boih kơ teh tơdrŏ, păng pơm kơ lu sư hơđang. Apinh Ih hơmet ming lu hơđang sư noh, yua kơ đêl sư pơpơ̆.

³Ih pơm boih kơ lu kon pơlei 'bôh tơdrong pơmat. Ăn kơ lu nhôn et sik, suai wing măt.

⁴Ih ăn boih kơ lu bơngai mă chu yom hla-kơ Ih. Wă kơ pơdah sư kơ tơdrong tơpăt sĭt. Sêla

⁵Wă kơ bơngai bu mă Ih 'mêm gơh klaih hlôi. Apinh Kră Yang yua ti 'ma Ih pơklaih păng tơl tơwih kơ nhôn.

⁶Kră Yang đei khan đơ̆ng lăm anih rơgoh Sư. “Inh chơt hiôk, Inh gô asong tơring Sichem păng pơtŏ thŭng Sikôt.

⁷Gileat gah inh, Manase kư̆m lei lai; Êphraim môk kơlăm pĕng kơ̆l inh. Juđa jơ̆ 'long jra pơtao inh.

⁸Môap jơ̆ anih inh hum, 'nhao. Inh plôh chơkhŏ inh tơ Eđôm. Chơt hiôk bĕ yua kơ jei inh boih char Philistin.”

⁹Bu gô ba inh mơ̆t tơ anih pơlei kơjăp? Bu gô ba inh truh tơ Eđôm?

¹⁰Ơ Kră Yang 'Bok Kei-Dei, Ih hăm trŏ Kră Yang mă achăng lê̆ lu nhôn? Ơ Kră Yang 'Bok Kei-Dei, Ih ưh pă năm tơblah hơdai hăm linh lu nhôn boih hă?

¹¹Apinh Ih dŏng pơklaih nhôn đơ̆ng lu ayăt. Yua kơ tơduă kon bơngai dŏng tơgŭm jing tơdrong kơ đei.

¹²Đơ̆ng Kră Yang 'Bok Kei-Dei lu bơ̆n gơh kĕ jei; Yua kơ sư gô juă bơhlơ̆r lu ayăt kơ nhôn.