Read bahnar Horiso 65 Bible Online

Horiso 65 - bahnar bible

Horiso 65

¹Ơ Kră Yang 'Bok Kei-Dei, tơ Siôn Ih trŏ kơ đe kơkuh bơnê. Lu sư gô pơkeh dôm nơ̆r đêl lu sư pơkă, hăm Ih!

²Ơ Kră Yang mă mơ̆ng nơ̆r krao khan, Đĭ-đăng kon bơngai gô năm tơ Ih.

³Tơdah jei tơdrong kơnê̆. Tơdrong mă lu nhôn pơm yoch Ih gô mơnat ăn.

⁴Pŭn dêh kơ bơngai bu mă Ih đei rơih păng ăn jê̆ Ih. Wă kơ oei tơ cham Ih: Lu nhôn gô phĭ jơnap đei tơmam 'lơ̆ng đơ̆ng hnam Ih.

⁵Ơ Kră Yang 'Bok Kei-Dei Tơ'ngla dŏng pơklaih lu nhôn. Hăm tơdrong trŏ Ih gô tơl tơwih kơ lu nhôn kiơ̆ tơdrong tơpăt. Ih jơ̆ anih lu bơngai đơ̆ng tôch kơ teh đak păng jơ̆p kơpal đak dơsĭ ataih hơđơ̆ng hơmĕng.

⁶Ih yua tơdrong mơsêh pơjing lu kông gei kơjăp, yua kơ ih tơ̆n păng tơlei tơ̆n pran kơtang;

⁷Ih khă lu jơwa đak dơsĭ poh-yă kial hơbŭt ngăn hreh. Păng tơdrong kon pơlei iung pơm kơnê̆.

⁸Lu bơngai oei tôch kơ teh đak. 'Bôh tơdrong hlĭch chrơp đơ̆ng Ih na hli tơrơ: Ih pơm kơ tơdrong hơdah pơgê hrôih păng kơsơ̆ 'năr mơ̆t đei chơt hiôk.

⁹Ih wei-lăng teh păng ruh kơ teh hơiuh. Pơm ăn kơ sư đei mơ̆r; glung Kră Yang 'Bok Kei-Dei 'bĕnh kơ đak. Yua kơ Ih pơjing boih teh, chăt Ih ăn 'ba hơ'bo kơ kon bơngai.

¹⁰Ih ruh rim trong lu sư rơuơ pơm ăn kơ teh hơiuh. Ăn 'mi chruh pơm kơ sư rơmuăn păng ăn pŭn kơ tơmam bluh chăt wơ̆.

¹¹Ih pơyơ̆l ăn môk pŭn hiôk kơ sơnăm. Rim trong Ih năm tơ noh đei hiôk jơnap.

¹²Lu tơmăn 'nhĕt lăm char glă bluh 'lơ̆ng, Păng lu kông groi đei chơt hiôk.

¹³Anih 'nhĕt hơdrih 'bĕnh kơ sem dơrong. Dôm lu thŭng 'bĕnh kơ hơ'bo 'ba pia tôl: Jơ̆p-jang anih noh chơt hiôk păng hơri 'nă hal.