Read bahnar Horiso 72 Bible Online

Horiso 72 - bahnar bible

Horiso 72

¹Ơ Kră Yang 'Bok Kei-Dei, apinh Ih ăn kơ pơtao gơh sek tơlang, Păng ăn kơ kon pơtao tơdrong 'lơ̆ng tơpăt đơ̆ng Ih.

²Sư gô sek tơlang kon pơlei Ih tơpăt hơnơ̆ng. Sek lu bơngai dơnuh hin trŏ tơpăt.

³Ăn lu kông gô ba tơdrong hiôk jơnap kơ kon pơlei pơla, lu groi đei plei tơdrong 'lơ̆ng tơpăt

⁴Sư gô sek dŏng lu bơngai dơnuh hin lăm kon pơlei. Dŏng pơklaih lu kon lu bơngai kơ'bah kơ'bôch păng pơrăm lu bơngai pơjuă pơđep đe

⁵Măt 'năr măt khei oei đei truh dang yơ. Lu sư kư̆m hli yom kơ Kră Yang dang noh, truh tơ lăm đĭ jơhnơr

⁶Pơtao gô jur thoi 'mi jruh tơ kơpal mir nhen thoi 'mi tih jruh hơiuh tơ teh.

⁷Lăm kơplah pơtao oei pơgơ̆r ăn kơ bơngai tơpăt hiôk jơnap. Ăn tơdrong rơnŭk rơnua dĭng măt khei pă đei.

⁸Ăn kơ sư pơgơ̆r đơ̆ng đak dơsĭ âu truh tơ đak dơsĭ nai. Đơ̆ng krong âu truh tơ tôch teh đak.

⁹Lu bơngai oei tơ lăm char 'blach gô kŭp kơ̆l kơkuh 'bơ̆t anăp sư. Lu ayăt kơ sư gô liah 'mui teh

¹⁰Lu pơtao Tarêsi păng lu bŏl đak dơsĭ gô ăn thuê̆ kơ sư. Pơtao Seba păng Seba gô pơyơ̆r ăn kơ sư.

¹¹Đĭ-đăng pơtao gô drap kơkuh 'bơ̆t anăp sư; Rim teh đak gô bơ̆jang kơ sư.

¹²Yua kơ sư gô pơklaih lu bơngai dơnuh hin, dah lu sư krao apinh. Păng dŏng pơklaih lu pơmat-tat mă ưh kơ đei bu tơgŭm.

¹³Sư gô mơnat kơ lu pơmat-tat păng lu hoh kơ đei, Păng pơklaih tơdrong arih lu bơngai kơ'bah kơ'bôch.

¹⁴Sư gô pơklaih tơdrong arih lu bơngai đe pơjuă pơđep păng đơ̆ng lu bơngai pơm kơnê̆. Păng lăng pham lu sư gĭt tơpă.

¹⁵Sư gô oei arih sot, na gô pơyơ̆r maih Seba ăn kơ sư. Đe gô krao khan kơ sư ling-lang; Păng rim năr sơkat pŭn hiôk kơ sư.

¹⁶Ăn kơ đei 'ba hơbŏ rơkah rơkai tơ kơpal teh păng 'bĕnh tơ kơpal kông; plei 'long sa lơlap thoi bri tơ char Liban. Ăn kơ kon pơlei oei lăm pơlei tih gô hrôh ngôh thoi 'nhĕt tơ mir.

¹⁷Anăn sư gô oei đei ling-lang. Măt 'năr sư oei đei dang yơ, anăn sư gô oei dang noh; Kon pơlei đei pŭn hiôk đơ̆ng sư! Lu kon pơlei gô sơkat kơ sư đei pŭn hiôk.

¹⁸Trŏ kơkuh bơnê kơ Kră Yang 'Bok Kei-Dei bơngai Isơrael, Lăp minh 'nu Sư đĕch pơm tơdrong hlĭch chrơp!

¹⁹Trŏ hơri bơnê ư-ang anăn Sư ling-lang truh ning-mônh. Ăn tơdrong ư-ang Sư 'bĕnh-'bang jơ̆p kơ teh đak! A-men! A-men!

²⁰Tơdrong Đawit, kon drŏ-nglo Êsai krao khan tôch dâu.