Read bahnar Horiso 80 Bible Online

Horiso 80 - bahnar bible

Horiso 80

¹Ơ Kră Yang mă wei-lăng Isơrael. Ơ Kră Yang chông anhăk adrĕch Jôsep thoi khŭl triu. Pơgling đon mơ̆ng bĕ. Ơ Kră Yang oei tơ kơpal chêrubim pơchrang bĕ hơdah Ih,

²'Bơ̆t anăp Êphraim, Bênjamin păng Manase, pơdah bĕ tơdrong mơsêh Ih. Păng năm dŏng pơklaih lu nhôn.

³Ơ Kră Yang 'Bok Kei-Dei, apinh Ih tơiung lu nhôn dơ̆ng. Pơdah bĕ muh măt Ih wă kơ lu nhôn gơh klaih.

⁴Ơ Kră Yang, 'Bok Kei-Dei Tih Hloh. Ih hil mĭl dêh ưh kơ wă mơ̆ng nơ̆r kon pơlei pơla Ih krao khan dĭng dang yơ?

⁵Ih 'me rong lu sư hăm đak măt. Păng ăn kơ lu sư nhă đak măt hrăp hreng.

⁶Ih pơm ăn kơ lu bơngai jih 'ma pơjah tơgar kơ lu nhôn; Păng lu ayăt kơ nhôn lu sư hiĕk pơjăm lu nhôn.

⁷Ơ Kră Yang 'Bok Kei-Dei Tih Hloh, apinh Ih tơiung lu nhôn dơ̆ng, pơdah bĕ muh măt Ih wă kơ lu nhôn gơh klaih.

⁸Đơ̆ng char Êyiptơ Ih rô̆ ba boih minh tơnơm hơmu; Ih pơpuh boih lu dêh char na pơtăm tơnơm hơmu noh,

⁹Ih bơ'nguơih teh kơ tơm hơmu. Sư sôr rơh păng chăt hro jơ̆p kơ teh.

¹⁰Yơ̆p sư jơ̆p kơ groi kông păng lu dơng sư hro jơ̆p kơ 'long hơngo Kră Yang 'Bok Kei-Dei.

¹¹Lu dơng sư hro truh tơ đak dơsĭ, Păng tơmơ̆ng sư bluh truh tơ đak Krong.

¹²Yua kơ kiơ Ih teh tơpăk lê̆ dur sư Achăng lê̆ kơ lu bơngai năm rok noh phĕ tơtông plei hơmu?

¹³Lê̆ hơke chưk sa păng lu kon sem bri sa sư,

¹⁴Ơ Kră Yang 'Bok Kei-Dei Tih Hloh! Apinh Ih hơlơ̆k dơ̆ng bĕ, đơ̆ng plĕnh nger lăng tơ teh, lăng păng bơwei tơm hơmu âu,

¹⁵Tơm hơmu mă đơ̆ng ti 'ma Ih pơtăm. Mă kon tơdăm Ih đei rong bơwei kơdih boih,

¹⁶Tơm hơmu noh chơ̆ng lê̆ păng ŭnh đĭ sa. Ăn kơ lu sư hiong răm đĭ yua kơ đơ̆ng Ih chrih hil.

¹⁷Hơpơi kơ Ih tơgŭm bơngai hơ-oei cheng 'ma Ih. Bơngai drŏ-nglo mă Ih đei bơwei rong kơdih boih.

¹⁸Na lu nhôn pă đei tơklah đơ̆ng Ih dơ̆ng; Apinh Ih ăn kơ lu nhôn arih dơ̆ng. Kơna lu nhôn gô krao apinh hăm anăn Ih.

¹⁹Ơ Kră Yang, 'Bok Kei-Dei Tih Hloh, apinh Ih tơiung lu nhôn dơ̆ng. Păng pơdah bĕ muh măt Ih wă kơ lu nhôn gơh klaih.