Read bahnar Horiso 83 Bible Online

Horiso 83 - bahnar bible

Horiso 83

¹Ơ Kră Yang 'Bok Kei-Dei 'nĕ kơ ngăn, ơ Kră Yang 'Bok Kei-Dei, 'nĕ kơ ĕnh 'nĕ kơ dơ̆ng đĕch.

²Yua kơ to, lu ayăt kơ Ih iung boih, Păng lu bơngai hil areh kơ Ih ngơk kơ̆l boih.

³Lu sư pơđâu wă blah kon pơlei Ih, Lu sư chă đon wă pơm kơ lu bơngai mă Ih đei bơwei.

⁴Lu sư khan: “Bĕ bơ̆n năm pơlôch pơđĭ adrĕch lu sư đơ̆ng teh đak, Wă kơ pă đei bu 'blŏk kơ anăn Isơrael dơ̆ng.”

⁵Yua kơ lu sư minh jơhngơ̆m pơđâu băl. Lu sư pơkă băl wă blah Ih

⁶Kơđông lu bơngai Eđôm păng bơngai Ismael, bơngai Môap păng bơngai Hagrit.

⁷Gêbal, Ammôn păng Amalek, bơngai Philistin, hăm kon pơlei Tirơ,

⁸Asiri kư̆m mơ̆t lu sư, na tơgŭm kon sâu Lot. Sêla

⁹Pơm bĕ kơ lu sư thoi Ih pơm kơ Madian kơ Sisêra păng Jabin tơ đak krong Kisôn,

¹⁰Đe pơlôch lu sư tơ Endôr, jing pơm mơ̆r kơ teh.

¹¹Pơm kơ yŏng lu sư thoi Ih pơm kơ Ôrep păng Sêep. Păng đĭ-đăng kơ kon pơtao kră pơgơ̆r lu sư thoi Sêba păng Salmuna;

¹²Khan: “Bĕ bơ̆n blah iŏk teh tơmăn 'nhĕt Kră Yang 'Bok Kei-Dei jing tơmam bơ̆n.”

¹³Ơ Kră Yang 'Bok Kei-Dei inh! Pơm bĕ kơ lu sư thoi 'mui teh đông kơ phŭt huơ̆r. Thoi hơkam 'ba kial bơbơ̆t.

¹⁴Thoi ŭnh sa bri, thoi pla ŭnh sa kông groi, thoi yơ,

¹⁵ăn bĕ hơbŭt hơbang Ih druh drŭt lu sư. Păng yua hơbŭt hơbang Ih, pơm kơ lu sư hli krưp thoi noh.

¹⁶Ơ Kră Yang, apinh Ih pơm ăn kơ muh măt lu sư kơdơ̆ mơlâu, wă kơ lu sư krao chă Ih.

¹⁷Pơm kơ lu sư kơdơ̆ mơlâu păng hli tơrơ ling-lang hlŏng hloi; Pơm kơ lu sư mơlâu păng lôch hiong;

¹⁸Wă kơ lu sư băt, lăp minh 'nu Ih đĕch, anăn Kră Yang; Kră Yang Tih Hloh pơgơ̆r kơpal teh âu.