Read bahnar Horiso 84 Bible Online

Horiso 84 - bahnar bible

Horiso 84

¹Ơ Kră Yang 'Bok Kei-Dei Tih Hloh. Anih Ih oei trŏ kơ 'mêm dêh hloh:

²Bơhngol inh 'maih dêh năm tơ cham hnam Kră Yang, Inh ôr krao Kră Yang 'Bok Kei-Dei mă arih ling-lang hăm đĭ jơhngơ̆m sĕch akar inh.

³Ơ Kră Yang Tih Hloh, pơtao inh păng Kră Yang 'Bok Kei-Dei inh, Sem rĕch chă đei boih anih oei păng sem pleng chă pơm boih tơpu wă kơ cheh kon, jê̆ tơ chơnang soi Ih.

⁴Pŭn dêh kơ bu mă oei lăm hnam Kră Yang! Lu sư gô kơkuh hơri bơnê kơ ih ling-lang. Sêla

⁵Pŭn dêh kơ bu mă đei jơhngơ̆m pran lăm Ih, Păng đei jơhngơ̆m 'maih năm truh tơ Siôn!

⁶Kơplah năm rok thŭng thong tơdrong nhơ̆m hmoi lu sư pơm kơ thong ei jing đei tu đak lĕch ro; 'Mi hrôih kư̆m pơm kơ anih noh đei đak dơnâu 'bĕnh lơ̆p pŭn hiôk.

⁷Lu sư yak năm tơ anăp lu sư rai pran kơtang dêh, Dĭng truh 'bơ̆t anăp Kră Yang 'Bok Kei-Dei tơ Siôn.

⁸Ơ Kră Yang 'Bok Kei-Dei Tih Hloh, apinh Ih mơ̆ng bĕ nơ̆r inh krao khan; Ơ Kră Yang 'Bok Kei-Dei Jakôp, pơgling đon Ih mơ̆ng inh. Sêla

⁹Ơ Kră Yang 'Bok Kei-Dei, Ih jơ̆ khêl pĕng lu nhôn, Lăng mơnat bĕ kơ tơ'ngla mă Ih đei hling đak rơmă pôk pơm pơtao.

¹⁰Minh năr lăm cham hnam akŭm Ih gĭt hloh kơ minh-rơbâu năr tơ anih nai. Lê̆ inh jing bơngai wei 'măng dur lăm hnam Ih, Hloh kơ oei lăm hnam lu bơngai pơm kơnê̆.

¹¹Kră Yang 'Bok Kei-Dei jơ̆ măt 'năr păng khêl; Kră Yang ăn tơdrong mơnat păng ư-ang, Sư ưh kơ đei sơngah ôh ăn tơdrong 'lơ̆ng rŏ. Kơ bu mă oei arih sa tơpăt.

¹²Ơ Kră Yang 'Bok Kei-Dei Tih Hloh, pŭn dêh kơ bơngai bu mă gơnang kơ Ih!