Read bahnar Horiso 85 Bible Online

Horiso 85 - bahnar bible

Horiso 85

¹Ơ Kră Yang, Ih mơnat ăn boih tơdrong 'lơ̆ng kơ dêh char Ih; Ih chông adrĕch Jakôp đêl pơm bơnă wih brŏk.

²Ih mơnat ăn boih kon pơlei Ih, đêl pơm kơnê̆. Păng klơ̆p lê̆ đĭ dôm yoch glăi lu sư. Sêla

³Ih lê̆ boih tơdrong hil mĭl, iŏk lê̆ boih tơdrong Ih blĕk tơtŏ.

⁴Ơ Kră Yang 'Bok Kei-Dei Tơ'ngla dŏng pơklaih lu nhôn, apinh Ih tơiung lu nhôn dơ̆ng bĕ. Apinh Ih lê̆ pă blĕk kơ lu nhôn.

⁵Ih oei wă hil kơ lu nhôn ling-lang aah? Tơdrong blĕk Ih oei khŏm khŏm hă?

⁶Ih ưh pă tơiung lu nhôn dơ̆ng boih hă? Wă kơ kon pơlei Ih chơt hiôk lăm Ih?

⁷Ơ Kră Yang, apinh ăn kơ lu nhôn 'bôh tơdrong Ih 'mêm mơnat, Păng ăn kơ lu nhôn tơdrong Ih dŏng pơklaih.

⁸Inh gô mơ̆ng dôm tơdrong kiơ Kră Yang 'Bok Kei-Dei khan; Sư gô ăn hiôk-hian kơ kon pơlei pơla Sư păng ăn kơ lu bơngai lui yom kơ Sư, Mă-lei 'nĕ pă lê̆ lu sư hơlơ̆k pơm kơtul kơwao dơ̆ng

⁹Tơpă tơdrong sư dŏng pơklaih oei jê̆ tơ lu đe bu mă hli yom kơ sư. Wă kơ tơdrong ư-ang đei oei lăm char bơ̆n.

¹⁰Na tơdrong 'mêm mơnat hăm tơdrong 'lơ̆ng tơpăt tơ'bơ̆p băl; Tơdrong tơpăt hăm tơdrong hiôk-hian tơchŭm băl.

¹¹Tơdrong tơpăt bluh đơ̆ng teh đak. Tơdrong 'lơ̆ng tơpăt Kră Yang bơngai đơ̆ng plĕnh nger tơ ala teh.

¹²Sĭt tơpă, Kră Yang gô ăn pŭn hiôk, Păng teh bơ̆n gô đei plei sa.

¹³Tơdrong tơpăt 'lơ̆ng gô năm adrol 'bơ̆t anăp Sư, gô pơm ăn trong kơ jơ̆ng Sư rok.