Read bahnar Horiso 88 Bible Online

Horiso 88 - bahnar bible

Horiso 88

¹Ơ Kră Yang, 'Bok Kei-Dei, Tơ'ngla dŏng pơklaih inh măng năr inh krao ôr 'bơ̆t anăp Ih.

²Ăn kơ nơ̆r inh krao khan truh tơ Ih. Apinh Ih pơgling đon mơ̆ng nơ̆r inh krao apinh.

³Yua kơ bơhngol inh 'bĕnh kơ tơdrong pơmat. Tơdrong arih inh năm wă jê̆ dêh atâu.

⁴Đe đĭ jô̆ inh hăm khŭl jur lăm sơlŭng lôch; Inh thoi bơngai mă ưh kơ đei jơhngơ̆m pran,

⁵Đe lê̆ inh hăm lu bơngai lôch, thoi bơngai mă đe pơlôch tơ'bĭch lăm bơsat. Thoi bơngai mă Ih ưh pă 'blŏk boih, thoi lu bơngai mă ti Ih pă bơwei.

⁶Ih 'măn boih inh tơ kơđĕl sơlŭng jrŭ. Tơ anih măng mu gueo lăm sơlŭng jrŭ hơnhuey.

⁷Tơdrong Ih hil trăp kơtĭt kơpal inh, Ih yua lu đak poh-yă pơmat inh. Sêla

⁸Ih pơm kơ lu buăl inh weh achăng lê̆ inh. Ih pơm kơ inh jing minh 'nu bơngai lu sư areh. Đe chĭt lê̆ inh, pă gơh lĕch dơ̆ng

⁹Măt inh đĭ hrŏ, yua kơ ơh sơ'ngon pơmat. Ơ Kră Yang, rim năr inh krao apinh Ih, Inh yơ̆r ti apinh Ih.

¹⁰Ih wă pơm tơdrong mơsêh kơ lu bơngai lôch hă? Lu bơngai mă lôch gô iung arih na kơkuh bơnê kơ Ih hă? Sêla

¹¹Tơdrong 'mêm Ih, đe gô ră roi tơ lăm bơsat hă? Tơdrong tơpăt Ih đe gô bơtho tơ lăm anih lôch răm mơ̆n hă?

¹²Tơdrong mơsêh Ih gô tơbăt tơ anih măng mu mơ̆n hă? Păng hăm trŏ tơdrong tơpăt Ih gô tơ'bôh tơ lăm dêh mă đĭ pă 'blŏk?

¹³Gah inh ơ Kră Yang! Inh krao apinh Ih Lăp 'brưch pơgê hrôih nơ̆r inh apinh truh boih 'bơ̆t anăp Ih.

¹⁴Ơ Kră Yang! Yua kơ kiơ Ih achăng lê̆ bơhngol inh păng liơ ôn muh măt Ih kơ Inh?

¹⁵Inh pơmat-tat wă lôch iŏk đơ̆ng oei 'lơ̆p. Inh hli krưp păng tơrơ dêh.

¹⁶Tơdrong Ih hil dêh 'bơm tơ inh. Tơdrong Ih tơhli pơlôch pơrăm inh.

¹⁷Prăt năr dôm tơdrong noh wang tăp kơ inh thoi đak lơ̆p. Lu sư wang klơ̆p tăp dăr kơ inh,

¹⁸Ih pơm kơ lu buăl juăt bơngai inh 'mêm weh achăng lê̆ inh. Anih măng mu pơm buăl juăt jê̆ inh anih măng mu.