Read bahnar Horiso 89 Bible Online

Horiso 89 - bahnar bible

Horiso 89

¹Inh gô hơri bơnê kơ tơdrong 'mêm tih Kră Yang ling-lang; 'Bơ̆r inh gô ră roi tơdrong tơpăt Ih lăm đĭ jơhnơr.

²Inh gô khan: “Tơdrong 'mêm mơnat Ih oei oei ling-lang hlŏng hloi. Tơdrong tơpăt ih pơjing kơjăp thoi kơ plĕnh ti.”

³Ih khan: “Inh pơjing boih nơ̆r pơgơ̆p hăm lu bơngai mă Inh đei rơih. Inh đei pơkă hăm Đawit, đĭch đam Inh;

⁴‘Inh gô tơiung adrĕch adrung ih kơjăp ling-lang hlŏng hloi, Păng ăn tang-dŏ pơtao kơjăp ling-lang hloi.’ ” Sêla

⁵Ơ Kră Yang, jơ̆p kơ plĕnh, gô kơkuh bơnê kơ tơdrong hlĭch chrơp Ih. Tơdrong tơpăt Ih đe kư̆m gô kơkuh bơnê. Tơ lăm khŭl 'lơ̆ng rơgoh.

⁶Yua kơ tơ plĕnh, hăm đei bu gơh pơtŏ hăm Kră Yang? Hăm đei bu lăm lu yang nhen thoi Kră Yang.

⁷Kră Yang 'Bok Kei-Dei trŏ kơ hli yom tơpă lăm khŭl Yang 'lơ̆ng rơgoh. Sư Kră Yang Tih Hloh. Trŏ kơ hli krưp hloh kơ lu Yang tăp dăr kơ Sư.

⁸Ơ Kră Yang 'Bok Kei-Dei Tih Hloh, bu mơsêh thoi Ih? Tơdrong 'lơ̆ng tơpăt Ih oei tăp dăr kơ Ih.

⁹Ih boih pơgơ̆r đĭ đak dơsĭ, tơdrŏ poh-yă. Mưh sư poh-yă Ih khă sư thĕng hơđơ̆ng.

¹⁰Kră Yang teh pơjuă Rahap.a Thoi akâu bơngai lôch. Ih yua kơkŏng ti pran Ih teh tơklah lu ayăt kơ Ih.

¹¹Đĭ kơ plĕnh hăm teh đak jơ̆ tơmam Ih, Ih đei pơjing teh đak păng dôm tơmam kơpal teh.

¹²Ih pơjing boih yă-nơ̆m păng gơal Kông Ta'bor păng Hermôn hơri chơt hiôk kơ anăn Ih.

¹³Ih đei kơkŏng ti mơsêh mơyang Tơpang ti Ih pran kơtang Ti 'ma Ih yơ̆r kơjung.

¹⁴Tơdrong 'lơ̆ng tơpăt păng tơdrong tơpăt hơnơ̆ng jing hơnă tăng dŏ pơtao Ih. Tơdrong 'mêm, tơdrong 'lơ̆ng tơpăt năm 'bơ̆t anăp Ih.

¹⁵Pŭn dêh kơ kon pơlei ayơ mă băt đei nơ̆r chơt hiôk hơri bơnê kơ Ih, Ơ Kră Yang, lu sư yak lăm hơdah đơ̆ng anăp muh măt Ih

¹⁶Prăt năr lu sư chơt hiôk lăm anăn Ih, lu sư đe pơyom đơ̆ng tơdrong tơpăt Ih.

¹⁷Yua kơ Ih jơ̆ tơdrong ư-ang pran kơtang lu sư; Đơ̆ng Ih mơnat na hơke lu nhôn tưk kơjung.b

¹⁸Ih jơ̆ khêl pĕng lu nhôn. Kră Yang 'lơ̆ng rơgoh Isơrael jơ̆ pơtao lu nhôn.

¹⁹Sơ̆ lăm tơdrong tơ'bôh, Ih đei pơma hăm lu bơngai 'lơ̆ng rơgoh Ih. Na khan: “Inh tơgŭm ăn boih kơ bơngai pran kơtang Inh hơtŏk bơngai mă đei rơih iŏk boih đơ̆ng lăm kon pơlei

²⁰Inh chă 'bôh boih Đawit, đĭch đam Inh, Tuh boih kơ sư đak rơmă 'lơ̆ng rơgoh Inh.

²¹Ti Inh gô dŏng tơiung sư. Kơkŏng ti Inh gô pơm ăn kơ sư pran kơtang.

²²Lu ayăt pă kĕ pơjuă sư boih, Lu bơngai kơnê̆ kư̆m pă đei pơjuă pơđep sư dơ̆ng,

²³Inh gô blah tơhuŏng lu ayăt kơ sư 'bơ̆t anăp sư. Păng kư̆m teh pơrăm lu bơngai hil areh kơ sư.

²⁴Tơdrong tơpăt Inh păng tơdrong 'mêm Inh gô oei hơdai hăm sư. Đơ̆ng anăn Inh, hơke sư gô rai tŏk kơjung.c

²⁵Inh gô dan ti sư tơ kơpal đak dơsĭ, Păng ti 'ma sư tơ kơpal đak krong.

²⁶Sư gô krao Inh: Ih boih 'Bă Inh. Kră Yang 'Bok Kei-Dei inh păng Tơmo Tih tơdrong dŏng pơklaih inh.

²⁷Inh gô ăn kơ sư jing kon kơdră drŏ-nglo Inh, jing pơtao tih hloh kơ đĭ-đăng pơtao lăm teh âu.

²⁸Inh gô 'măn lê̆ kơ sư tơdrong 'mêm inh ling-lang, Inh gô pơgơ̆p hăm sư kơjăp.

²⁹Inh gô ăn kơ adrĕch adrung sư kơjăp ling-lang. Păng tang-dŏ pơtao sư oei sot jơnoi thoi năr tơ plĕnh.

³⁰Tơdah kon sâu sư achăng lê̆ tơdrong juăt Inh, ưh kơ kiơ̆ nơ̆r Inh tơtă.

³¹Tơdah lu sư ưh kơ chu kiơ̆ tơdrong juăt Inh, ưh kơ wei nơ̆r Inh tơtă,

³²Na Inh gô yua sơnguĕt teh bơtho tơdrong lu sư pơm glăi. Păng teh bơtho lu sư yua kơ tơdrong kơnê̆ lu sư.

³³Mă-lei inh ưh kơ đei lê̆ ôh tơdrong 'mêm kơ lu sư. Păng inh kư̆m ưh kơ lê̆ mơ̆n pơm 'lơ̆ng tơpăt hăm sư.

³⁴Inh kư̆m ưh kơ layơ pơm yoch kơ nơ̆r Inh pơgơ̆p. Kŭm ưh kơ đei tơplih nơ̆r mă lĕch đơ̆ng 'bơ̆r Inh đei pơma.

³⁵Inh yua anăn 'lơ̆ng rơgoh Inh na pơkă pơkăm minh wơ̆t đĕch keh boih. Păng ưh kơ đei pơma hơlĕnh hăm Đawit,

³⁶Adrĕch adrung sư oei oei ling-lang, Tang-dŏ pơtao sư gô sot thoi măt 'năr 'bơ̆t anăp Inh.

³⁷Sư gô kơjăp ling-lang thoi măt khei. Thoi đei tơ'bôh sĭt tơ kơpal plĕnh noh.” Sêla

³⁸Mă-lei Ih sơngah păng achăng lê̆ sư. Ih hil mĭl bơngai mă Ih đei hling đak rơmă.

³⁹Ih lăng krưp dêh boih kơ tơdrong pơgơ̆p hăm lu đĭch đam Ih. Ih hŭt lê̆ boih môk pơtao tơ teh rơpŭk 'mê̆-'mach.

⁴⁰Ih teh tơlơ̆ lê̆ boih dur sư, pơrăm lê̆ kơđông kơjăp sư pơchah đĭ.

⁴¹Đĭ kơ lu bơngai yak rok noh tơgar iŏk tơmam đơ̆ng sư. Sư jing bơngai rông 'bôt pơjăm.

⁴²Ih tưk ti 'ma lu ayăt kơ sư. Ih pơm ăn kơ lu bơngai ayăt kơ sư hiôk chơt.

⁴³Tơpă Ih plơ̆ lê̆ pla đao sư, Ưh kơ đei tơgŭm sư wă kơ kĕ dơ̆ng tơblah,

⁴⁴Ih tơhiong lê̆ 'lơ̆ng rŏ sư tơhuŏng lê̆ tang-dŏ pơtao sư tơ teh,

⁴⁵Pơm kơ sơnăm hơmuh hơmŏng sư jing djăl. Păng gom lê̆ sư hăm tơdrong mơlâu. Sêla

⁴⁶Ơ Kră Yang, Ih ôn akâu Ih dĭng truh dang yơ? Wă khŏm khŏm hloi hă? Tơdrong Ih hil mĭl thoi ŭnh sa dĭng dang yơ?

⁴⁷Apinh Ih 'blŏk kơ măng năr inh kơđeh dêh. Ih pơjing boih kon bơngai tơdrong kơ đei.

⁴⁸Bu gơh arih hloi mă ưh kơ đei lôch? Bu gơh dŏng pơklaih bơhngol sư kơdih dơ̆ng dêh atâu pơgơ̆r.

⁴⁹Ơ Kră Yang, tơ yơ tơdrong 'mêm tih Ih, tơ yơ tơdrong 'lơ̆ng tơpăt Ih mă đei pơkă pơkăm hăm Đawit sơ̆?

⁵⁰Ơ Kră Yang! 'Blŏk bĕ kơ tơdrong mơlâu đe pơjăm lu đĭch đam Ih pŭ, jơhngơ̆m inh pŭ đĭ tơdrong mơlâu đơ̆ng lu kon pơlei,

⁵¹Ơ Kră Yang, tơdrong mă lu ayăt kơ Ih pơjăm. Lu sư pơjăm boih kơnao yak lu bơngai mă Ih đei hling đak 'bâu phu tơ kơ̆l.

⁵²Hơri bơnê ư-ang kơ Kră Yang ling-lang! A-men! A-men!