Read bahnar Horiso 96 Bible Online

Horiso 96 - bahnar bible

Horiso 96

¹Hơri bĕ kơ Kră Yang; minh tơdrong hơri 'nao Ơ đĭ-đăng kon bơngai jơ̆p-jang kơ teh đak hơri bĕ kơ Kră Yang.

²Hơri bĕ kơ Kră Yang păng bơnê ư-ang kơ anăn Sư; Rim năr athei ră roi tơdrong Sư dŏng pơklaih,

³Ră roi tơdrong ư-ang kơ Sư tơ jơ̆p dêh char. Roi tơbăt dôm tơdrong jang hlĭch chrơp Sư kơ rim adrĕch kon bơngai.

⁴Yua kơ Kră Yang Tih Hloh, trŏ kơkuh bơnê; Sư noh trŏ kơ hli yom hloh kơ đĭ-đăng yang,

⁵Yua kơ đĭ-đăng yang mă kon pơlei kơkuh noh jơ̆ yang man kơdih; Mă-lei Kră Yang Sư pơjing plĕnh.

⁶Tơdrong 'lơ̆ng rŏ păng tơdrong rŏ krưp oei 'bơ̆t anăp Sư. Tơdrong mơsêh păng tơdrong 'lơ̆ng rŏ oei tơ anih rơgoh Sư.

⁷Ơ lu adrĕch adrung kon pơlei pơla. Pơyơ̆r ăn bĕ kơ Kră Yang; pơyơ̆r ăn bĕ kơ Kră Yang tơdrong ư-ang pran kơtang,

⁸Pơyơ̆r ăn bĕ tơdrong ư-ang Kră Yang. Mă trŏ kơ Anăn Sư. Athei chĕp tơmam soi na mơ̆t tơ cham hnam Sư.

⁹Athei hrŭk hơbĕn ao rơgoh na kơkuh kơ Kră Yang; Ơ đĭ-đăng teh đak, hli tơtey bĕ 'bơ̆t anăp Sư.

¹⁰Athei roi bĕ kơ lu dêh char: “Kră Yang pơgơ̆r. Teh đak đei pơjing kơjăp, ưh kơ đei pơpơ̆. Sư gô sek tơlang kơ kon pơlei pơla tơpăt.”

¹¹Ơ lu plĕnh chơt hiôk păng teh 'nă hal bĕ. Ơ đak dơsĭ păng lu kon sem brem oei lăm dơsĭ ôr jreo chơt hiôk bĕ.

¹²Ăn kơ mir chŭn păng tơmam lăm noh chơt hiôk bĕ; Na lu 'long pơle lăm bri brah gô hơri chơt hiôk. 'Bơ̆t anăp Kră Yang;

¹³Sư truh wă sek tơlang kơ teh đak, Sư gô sek tơlang kơ teh đak hăm tơdrong tơpăt. Yua tơdrong tơpăt sĭt Sư na sek kơ kon pơlei pơla.