Read bahnar Horiso 97 Bible Online

Horiso 97 - bahnar bible

Horiso 97

¹Kră Yang pơgơ̆r, ơ teh chhôk hal bĕ; Ơ lu bŏl đaka chơt hiôk bĕ.

²Hơmơ̆l păng măng mu gom tăp dăr kơ Sư; Tơdrong tơpăt tơdrong hơnơ̆ng pơm hơnă tang-dŏ pơtao Sư.

³Ŭnh năm adrol tơ anăp Sư soh pơrăm lê̆ lu ayăt tăp dăr kơ sư.

⁴Kơmlat đơ̆ng Sư pơchrang hơdah tơ lăm teh đak, Plei teh 'bôh na hli pơpơ̆,

⁵Lu kông lek hach thoi jrĕnh 'bơ̆t anăp Kră Yang, 'bơ̆t anăp Kră Yang kơ đĭ-đăng teh đak.

⁶Tơ jơ̆p kơ plĕnh roi tơdrong tơpăt Sư, păng đĭ-đăng kon pơlei 'bôh boih tơdrong ư-ang Sư.

⁷Pơm bĕ kơ đĭ-đăng lu bơngai kơkuh kơ rup yang mơlâu. Lu gơnang kơ rup yang tơdrong kơ đei. Ơ lu yang, kơkuh bĕ kơ Kră Yang.

⁸Ơ Kră Yang, Siôn kơtơ̆ng na chơt hiôk, Păng lu pơlei Juđa đei jơhngơ̆m 'nă hal, Yua kơ tơdrong Ih sek tơlang

⁹Ơ Kră Yang, Ih boih jơ̆ Kră Yang Tih Hloh, kơpal hloh kơ đĭ-đăng lăm teh. Ih đei tơdrong pơyom hloh loi kơ đĭ-đăng lu yang.

¹⁰Ơ lu bơngai mă 'mêm kơ Kră Yang areh bĕ kơ tơdrong kơnê̆; Sư wei wêr tơdrong arih bơngai 'lơ̆ng rơgoh Sư. Păng dŏng pơklaih lu sư đơ̆ng ti lu bơngai pơm kơnê̆.

¹¹Tơdrong hơdahb pơchrang kơ lu bơngai tơpăt. Păng chơt hiôk kơ lu bơngai đei jơhngơ̆m tơpăt.

¹²Ơ lu bơngai tơpăt lu iĕm chơt hiôk bĕ lăm Kră Yang. Bơnê kơ Anăn 'lơ̆ng rơgoh Sư.