Read bahnar Pod 1 Bible Online

Pod 1 - bahnar bible

Pod 1

¹Tơdrong pơđơ̆k Sôlômôn pơtao đe Isơrael kon drŏ-nglo Đawit.

²Wă kơ băt hlôh tơdrong gơh hơgei păng tơdrong bơtho pơhrăm iŏk, wă kơ hlôh kơ nơ̆r hlôh wao.

³Wă kơ đei iŏk nơ̆r bơtho gơh hơgei, tơdrong tơpăt, tơdrong trŏ, tơdrong hơnơ̆ng lăm chăl arih.

⁴Wă ăn kơ lu bơngai kơtul kơwao gơh kơchăng, bơngai hơmuh hơmŏng băt hlôh păng băt tơchĕng.

⁵Bơngai gơh hơgei gô mơ̆ng păng rai hŏk pơhrăm, Bơngai hlôh wao gô đei iŏk tơdrong bơtho tơ'bôh.

⁶Wă kơ hlôh tơdrong pơđơ̆k păng tơdrong pơtih, Lu nơ̆r bơngai gơh hơgei pơma, hăm nơ̆r lu sư pơpơn.

⁷Hli yom kơ Kră Yang jing tơm tơdrong hlôh wao. Lu bơngai kơtul areh kơ tơdrong gơh hơgei păng nơ̆r bơtho pơhrăm.

⁸Ơ dăm, mơ̆ng bĕ nơ̆r mĕ bơtho pơkă; păng 'nĕ hiơt kơ nơ̆r 'bă ih bơtho khan,

⁹Noh boih thoi hơgăl pơkao 'lơ̆ng kơpal kơ̆l ih, thoi rơbưn glang 'băk tơ hơko ih.

¹⁰Ơ dăm, tơdah lu bơngai yoch wă pơhlŭ ih, ih 'nĕ kơ chu hŏ.

¹¹Tơdah lu sư khan, bĕ năm kiơ̆ nhôn; chă răp pơlôch đe. Chop pơlôch pơrăm lu bơngai ưh kơ đei yoch.

¹²Lu bơ̆n gô luăn lu sư oei arih thoi dêh hơtâu, Păng luăn oei akâu hơpôm thoi đe huŏng lăm sơlŭng bơsat.

¹³Lu bơ̆n gô iŏk đĭ dôm tơmam gĭt, Tah mong 'bĕnh kơ hnam lu bơ̆n tơmam đơ̆ng chă plah tơgar;

¹⁴Iŏk akŭm hơbĭ hăm nhôn, lu bơ̆n gô đei minh pôm kơdŭng jên đĕch.

¹⁵Ơ dăm, 'nĕ kơ năm kiơ̆ lu sư ôh, Jơ̆ng ih weh bĕ, 'nĕ kơ yak kiơ̆ trong lu sư.

¹⁶Yua kơ jơ̆ng lu sư kơdâu kiơ̆ trong pơm kơnê̆, hăt hot chă pơlôch đe.

¹⁷Ưh kơ yua ôh dăng hơnhuăl 'bơ̆t anăp lu sem 'bôh, pih pang tơdrong kơđei.

¹⁸Mă-lei lu sư wă chă pơlôch kơdih akâu, Păng răp wă pơrăm tơdrong arih kơdih.

¹⁹Noh boih trong lu bơngai ham kơ pơm kơnê̆ wă chă sa lơi; Tơdrong plah tơgar gô hiong tơdrong arih lu bơngai bu đei iŏk tơmam noh.

²⁰Tơdrong gơh hơgei krao ôr tơ rok trong tih, Pơma re tơ lăm anih đe akŭm tih.

²¹Tơdrong gơh hơgei sư krao 'bơ̆t trong tơklah, sư pơma 'bơ̆t 'măng jang pơlei tih.

²²Ơ lu bơngai kơtul kơwao, Lu iĕm 'mêm kơ tơdrong kơtul kơwao dĭng dang yơ? Lu bơngai pơjăm pơjuă chơt hiôk pơjăm pơjuă dĭng dang yơ? Lu bơngai kơtul areh kơ tơdrong hơgei dĭng dang yơ?

²³'Bơ̆t Inh chrih, lu iĕm wih mơ̆ng bĕ, 'nâu, Inh wă tuh jơhngơ̆m đon Inh tơ lu iĕm; Inh gô tơbăt ăn kơ iĕm nơ̆r Inh.

²⁴Yua kơ Inh krao, mă-lei lu iĕm sơngah, Inh yơ̆r ti, kư̆m ưh kơ đei bơngai bu wă lăng;

²⁵Yua kơ lu iĕm sơngah boih đĭ-đăng dôm nơ̆r Inh bơtho khan, Ưh kơ chu iŏk tơdrong inh chrih hơmet;

²⁶Na dah lu iĕm đei tơdrong pơmat-tat, Inh gô hiĕk ăr, păng lu iĕm đei tơdrong hli tơrơ, Inh gô tơhuăi;

²⁷Kơplah tơdrong hli krưp truh tơ lu iĕm thoi kial hơbŭt, păng tơdrong pơmat-tat truh tơ lu iĕm thoi kial phŭt, Tơdrong jĭ jăn pơmat-tat truh tơ lu iĕm.

²⁸Kơplah noh kơnh lu sư gô krao apinh Inh, Mă-lei Inh ưh kơ tơl tơwih; Lu sư adrin chă Inh, Mă-lei ưh kơ đei tơ'bơ̆p.

²⁹Yua kơ đơ̆ng lu sư areh kơ tơdrong hlôh wao, Ưh kơ wă rơih chă tơdrong hli yom kơ Kră Yang.

³⁰Ưh kơ wă chu tơdrong inh bơtho khan, Pơhơi kơ tơdrong Inh chrih;

³¹Na lu sư gô luăn sa pŭ iŏk thoi trong lu sư kiơ̆, Păng phĭ hrăp lăm tơdrong lu sư hơlĕnh.

³²Lu bơngai bơlŭk lôch yua kơ lu sư kiơ̆ trong kơnê̆ đŏng đĕo. Păng tơdrong lu sư mă ưh kơ hiơ̆k gô pơrăm lu sư.

³³Mă-lei bơngai bu mơ̆ng kiơ̆ Inh gô oei hiôk-hian. Oei hơđơ̆ng ưh kơ đei hli kơ tơdrong kiơ truh.