Read bahnar Pod 12 Bible Online

Pod 12 - bahnar bible

Pod 12

¹Bơngai bu 'maih chă đe teh bơtho noh thoi wă 'maih đei đon gơh hơgei. Bơngai bu areh kơ đe teh bơtho bơngai noh kơtul kơwao.

²Bơngai 'lơ̆ng đei tơdrong mơnat đơ̆ng Kră Yang, Mă-lei Sư jô̆ yoch lu bơngai pơm kơnê̆.

³Kon bơngai bơ̆n kơjăp ưh kơ sĭ đơ̆ng pơm tơdrong kơnê̆. Mă-lei bơngai tơpăt gô chăt rơh kơjăp.

⁴Bơngai drŏ-kăn iơ̆m dim thoi môk pơtao ăn kơ klo sư. Mă-lei đei bơngai drŏ-kăn mơkoh noh thoi tơmam pơm kơ kơting bŭk.

⁵Tơdrong tơdă lu bơngai tơpăt jing trŏ. Mă-lei đei lu bơngai kơnê̆ pơđâu chă hơlĕnh.

⁶Tơdrong lu bơngai kơnê̆ pơma chă răp pơlôch tuh pham. Mă-lei 'bơ̆r lu bơngai tơpăt dŏng pơklaih kon bơngai.

⁷Đe teh tơhuŏng lu bơngai kơnê̆ lu sư gô ưh pă đei. Mă-lei lu bơngai tơpăt oei kơjăp.

⁸Bơngai bu gơh hơgei đei đon tơpăt đe bơnê. Mă-lei bơngai bu jơhngơ̆m kơnê̆ đe pơchê pơjăm.

⁹Kơtrơ̆m iŏk đon ala na pơm păi đei đĭch đam, Hloh kơ pơm pơrŏ pơang na tơmam sa ưh kơ đei.

¹⁰Bơngai tơpăt băt wei sem dơrong; tơdrong bơngai kơnê̆ khan 'mêm noh lăp pơm kơnê̆.

¹¹Bơngai bu choh jang mir na gô đei tơmam sa rơkah rơkai. Bơngai bu kiơ̆ chă tơdrong kơđei oei kơ'bah tơdrong hlôh wao.

¹²Lu bơngai kơnê̆ ham 'maih chă tơgar đơ̆ng đe, Mă-lei bơngai tơpăt chăt rơh đei plei yua.

¹³Bơngai pơm kơnê̆ pơm yoch đơ̆ng 'bơ̆r pơma, thoi 'leh hơđong, Lu bơngai tơpăt gô klaih đơ̆ng tơdrong truh.

¹⁴Đei plei 'lơ̆ng đơ̆ng nơ̆r 'bơ̆r pơma, na ih đei tôm tơdrong 'lơ̆ng. Na đe ăn trŏ thoi tơdrong jang đêl sư pơm.

¹⁵Trong lu bơngai kơnê̆ khan tơpăt kiơ̆ kơ măt lu sư lăng. Gah bơngai hơgei đei đon băt mơ̆ng đe bơtho khan.

¹⁶Bơngai kơtul 'bôh hloi tơdrong sư hil, Mă-lei bơngai hơgei huay kơ hiơ̆k ôh mă đe pơjăm pơjuă.

¹⁷Bơngai bu pơma tơpăt băt pơm kơdranh trŏ, bơngai kơnê̆ băt pôm pơm kơdranh hơlĕnh.

¹⁸Bơngai kư̆ kă chă pơma han thoi 'bet klĕch hăm đao. Mă-lei hơpiĕt lu bơngai hơgei đei hơmet klaih.

¹⁹Hơpiĕt pơma tơdrong sĭt gô oei ling-lang, Hơpiĕt pơma hơlĕnh đei hrei 'nâu đĕch.

²⁰Tơdrong hơlĕnh pơdăr oei lăm jơhngơ̆m lu bơngai chă đon kơnê̆. Mă-lei bu đei jơhngơ̆m hiôk wă chă pơhiôk đe.

²¹Ưh kơ đei tơdrong kiơ truh kơ lu bơngai 'lơ̆ng tơpăt; Mă-lei đei tơdrong truh răm kơ lu bơngai pơm kơnê̆.

²²Kră Yang areh kơ lu bơngai pơma hơlĕnh pơdăr; Mă-lei Sư lăp đon kơ lu bơngai pơma tơpăt.

²³Bơngai hơgei wei ôn nơ̆r bơ̆n hlôh wao, Gah bơngai kơhlôh tơ'bôh hloi bơ̆n kơwao.

²⁴Lu bơngai alah gô pơm đam. Ti lu bơngai pơnam gô pơgơ̆r;

²⁵Tơdrong ơh sơ'ngon kon bơngai pơm kơ sư rai trăp; Mă-lei đei nơ̆r rơngơp pơm kơ sư chơt hiôk.

²⁶Bơngai tơpăt băt chông ba lu buăl juăt sư; Trong lu bơngai kơnê̆ pơm lê̆ kơ buăl rai jrok.

²⁷Bơngai alah ưh kơ hơmet 'nhĕm đêl sư prah; Mă-lei lu bơngai pơnam gram tơmam gĭt sư.

²⁸Tơdrong arih oei 'bih tơdrong tơpăt; Lăm trong gơlong sư ưh kơ đei lôch.