Read bahnar Pod 17 Bible Online

Pod 17 - bahnar bible

Pod 17

¹Sa minh pôm 'bĕng mi kro tơhiôk băl, 'lơ̆ng hloh kơ đei 'nhĕm soi sa 'bĕnh kơ hnam mă-lei đei tơdrong tơhil băl.

²Minh 'nu đĭch gơh hơgei gô pơm yŏng kơ kon drŏ-nglo bơngai mă pơm kơ đe mơlâu. Bơngai 'nâu gơh iŏk mŭk tơmam thoi 'nhŏng oh sư.

³Gŏ pơtŏ rơ̆ hu, lu tơnuh ŭnh 'buh pơlong maih; Mă-lei đei Kră Yang pơlong lăng jơhngơ̆m.

⁴Bơngai kơnê̆ pơgling đon mơ̆ng nơ̆r đơ̆ng 'bơ̆r lu bơngai pơm kơnê̆. Bơngai hơlĕnh hlŭ kơ nơ̆r 'bơ̆r đe pơma kơnê̆.

⁵Bơngai bu pơjăm bơngai dơnuh hin, noh pơjăm Kră Yang Tơ'ngla pơjing sư; Bơngai bu chơt hiôk kơ tơdrong pơmat truh ưh kơ klaih ôh đơ̆ng phak.

⁶Sâu se jing môk ư-ang pơtao kơ lu kră, Mĕ 'bă jing tơdrong ư-ang kơ lu kon hơ'lơ̆p.

⁷Nơ̆r pơma 'lơ̆ng ưh kơ lăp ôh hăm lu bơngai kơwao, Hloh kơ noh nơ̆r pơma hơlĕnh rai ưh kơ lăp kơ bơngai pơgơ̆r.

⁸Mŭk tơmam sa pơgâm thoi jơmŏng gĭt kơ bơngai bu mă yua sư. Mă sư năm gah yơ kư̆m kĕ ngăl.

⁹Bơngai huay kơ jô̆ đe yoch chă tơdrong 'mêm. Bơngai tơ'blŏk tơdrong yoch đe gô hiong buăl juăt.

¹⁰Nơ̆r chrih mơ̆t jrŭ lăm jơhngơ̆m bơngai hơgei. Đei hloh kơ minh-hrĕng wơ̆t teh lu bơngai kơwao.

¹¹Bơngai kơnê̆ chă tơdrong tơblah. Mă-lei đei đe wơh bơngai yŏng kơnê̆ hloh năm blah sư.

¹²Kơtrơ̆m tơ'bơ̆p chơgơu yŏng đe tơgar iŏk kon sư. Hloh kơ tơ'bơ̆p bơngai kơwao kơplah sư hil hơwĕng.

¹³Bơngai bu pơm kơnê̆ tơwih kơ đe pơm 'lơ̆ng, Tơdrong truh pơmat ưh kơ weh ôh đơ̆ng hnam sư.

¹⁴Pơtơm tơhil pơjah noh nhen thoi bơnơ̆ bơ̆ đak pơchah. Thoi noh na jah pơdơh tơhil adrol kơ blĕk rai dêh.

¹⁵Bu dŏng bơngai kơnê̆ khan bơngai tơpăt. Bu băt jâu bơngai 'lơ̆ng tơpăt khan kơnê̆, 'Bar 'nu bre noh Kră Yang areh pơđĭ.

¹⁶Hăm yua kiơ bơngai kơwao chĕp jên hu, Sư ưh kơ 'maih răt tơdrong hơgei.

¹⁷Buăl juăt băt 'mêm băl ling-lang. Đei 'nhŏng oh noh lăp wă tơgŭm băl lăm đei tơdrong gleh.

¹⁸Bơngai kơhlôh kơwao 'bônh kơ pơkă drơ̆ng, Dơ̆ng pơkă pơkăm hăm rông 'bôt sư.

¹⁹Bơngai bu 'maih pơjah, chơchă tơdrong glăi. Bơngai bu tơiung 'măng jang rai kơjung chă tơdrong răm 'bônh.

²⁰Đe bu đei đon jơhngơ̆m kơnê̆ ưh kơ đei pŭn hiôk ôh; Păng bu đei hơpiĕt pơma kư̆ kă gô huŏng lăm tơdrong răm.

²¹Bu đei kon kơhlôh kơwao gô ơh sơ'ngon; 'Bă mă đei kon kơtul ưh kơ đei chơt hiôk ôh.

²²Jơhngơ̆m chơt hiôk thoi pơgang sĭt. Mă-lei đei jơhngơ̆m sơ'ngon pơm kơ kơting kro krĕnh.

²³Bơngai kơnê̆ iŏk sa pơgâm. Wă pơlơ̆m tơdrong tơpăt.

²⁴Bơngai hlôh 'bôh tơdrong hơgei 'bơ̆t anăp sư; Mă-lei đei măt lu kơwao lăng tơ tôch teh đak.

²⁵Kon drŏ-nglo kơtul pơm kơ 'bă sư sơ'ngon, Kon kơwao pơm kơ mĕ mă tơpŭ kơ sư ơh.

²⁶Phak lu bơngai tơpăt noh glăi Kŭm thoi teh lu bơngai pơgơ̆r 'lơ̆ng.

²⁷Bơngai bu wei nơ̆r sư pơma noh gơh hơgei; Lei bu tơchĕng kĕ ĕnh noh wă jing bơngai hlôh wao.

²⁸Bu kĕ ngăn mă kơwao jô̆ jing hơgei; Wei pơŏm 'bơ̆r gơh kĕ jô̆ hlôh wao.