Read bahnar Pod 23 Bible Online

Pod 23 - bahnar bible

Pod 23

¹Tơdah ih hơ-oei sŏng sa hơdai hăm bơngai pơgơ̆r Kơchăng bĕ kơ bơngai 'bơ̆t anăp ih.

²Dan bĕ săng 'bơ̆t dăng-hơlŏng ih tơdah ih sa dư.

³'Nĕ ham sa tơmam 'lơ̆ng sư Yua kơ tơmam sŏng sa 'noh.

⁴'Nĕ pơgleh ih kơdih kơlih wă kơ mơdrŏng. Ăn kơ ih đei đon hơgei 'nei hloh kơ tơdrong noh.

⁵Măt ih nŏng kơ lăng 'bloh tơ mơdrŏng hă? Ưh pă đei boih! Yua kơ sư đĭ chăt pơnăr păr tŏk tơ plĕnh thoi sem kring.

⁶'Nĕ sa tơmam lu bơngai kret tơsen; 'Nĕ kơ ham sa tơmam 'băt 'lơ̆ng đơ̆ng sư.

⁷Sư tơchĕng lăm jơhngơ̆m thoi yơ, sư thoi ei; Sư khan, sŏng sa, et sa bĕ; Mă-lei jơhngơ̆m sư ưh kơ đei thoi ei ôh.

⁸Ih gô hăk lê̆ tơmam đêl ih sa. Nơ̆r ih bơnê gô hiong tơdrong kơ đei.

⁹'Nĕ pơma lăm hla đon bơngai kơtul, Yua kơ sư gô pơjăm nơ̆r ih pơma hơgei.

¹⁰'Nĕ kơ rĭ 'long pơ̆ng hơdral so, Na pơ̆ng pơtăm lăm chŭn mir lu bơngai mơti;

¹¹Yua kơ Kră Yang dŏng pơklaih lu sư noh mơsêh mơyang, Gô dŏng lu sư, na blah ih.

¹²Athei đĭ jơhngơ̆m kơ nơ̆r bơtho. Hăm pơgling đon mơ̆ng nơ̆r hlôh wao.

¹³'Nĕ kơ lê̆ teh bơtho kon hơ'lơ̆p. Mă teh sư hăm sơnguĕt tơlei sư huay kơ lôch ôh.

¹⁴Teh bơtho sư hăm 'long sơnguĕt, 'Lơ̆ng hloh noh wă pơklaih sư đơ̆ng Dơnâu ŭnh.

¹⁵Ơ dăm, dah lăm jơhngơ̆m ih hơgei lei jơhngơ̆m inh kư̆m hiôk chơt.

¹⁶Klơm klak inh kư̆m gô chơt hiôk. Dah nơ̆r đơ̆ng 'bơ̆r ih pơma tơpăt.

¹⁷'Nĕ ăn jơhngơ̆m ih arih 'ngeng kơ lu bơngai yoch. Mă-lei athei arih băt hli yom kơ Kră Yang rim năr.

¹⁸Sĭt tơpă ih wă gô đei apah ning-mônh. Păng tơdrong mă ih hơmĕng gô đei huay kơ tôch.

¹⁹Mơ̆ng bĕ ơ dăm! Na ih gô gơh hơgei; Wei ba jơhngơ̆m ih lăm trong tơpăt.

²⁰'Nĕ pơm juăt hăm lu bơngai suai sik, dah hăm lu bơngai sa dư kơhô.

²¹Yua kơ lu bơngai suai sik păng sa dư kơhô gô jing dơnuh răm; Hăm lu bơngai sa, ĭch 'bĭch tep gô hrŭk hơbĕn ao hiah.

²²Mơ̆ng bĕ nơ̆r 'bă mă bơngai pơjing kơ ih; 'Nĕ areh kơ mĕ đĭ kră pă kĕ jang.

²³Răt bĕ tơdrong sĭt tơpă, 'nĕ kơ tĕch lê̆. Iŏk tơdrong hơgei wei nơ̆r bơtho pơhrăm păng hlôh wao,

²⁴Hiôk tơpă 'bă bơngai tơpăt, Mă đei kon gơh hơgei gô đei chơt hiôk kơ sư.

²⁵Ăn kơ mĕ 'bă ih chơt hiôk, Ăn kơ bu hơiơch kơ ih 'nă hal.

²⁶Ơ dăm, pơjao bĕ jơhngơ̆m ih kơ inh; Măt ih kơchăm rok kiơ̆ trong inh.

²⁷Yua kơ drŏ-kăn đi thoi sơlŭng jrŭ Păng drŏ-kăn luĕl 'blal thoi sơlŭng hrăt.

²⁸Sư răp chop thoi bơngai tơtông, Chông thim lơ lăm lu kon bơngai pơm kư̆ kă kuă kơ lui,

²⁹Bơngai bu đei tơdrong pơmat? Bơngai bu đei tơdrong sơ'ngon bơngai bu đei tơdrong tơhil băl? Bơngai bu jĭ rơka tơdrong kơ đei bơngai bu mă đei măt 'breo?

³⁰Noh jơ̆ bơngai oei đom 'bơ̆t tơm tơdrô boih păng mă lu et bơlŭk yơh,

³¹'Nĕ kơ lăng pơnhen tơ tơdrô, kơplah ih 'bôh sư oei choh đak oei blôk ro 'bônh.

³²Đơ̆ng rŏng sư jŏng choh thoi 'bih kăp jĭ thoi hơguăt.

³³Măt ih gô lăng păng pơglăn hlĭch, Jơhngơ̆m ih jing pha nơ̆r pơma, ih jing kơnê̆.

³⁴Sĭt, ih jing thoi bơngai 'bĭch tep lăm đak dơsĭ, Thoi 'bĭch kơpal kơ̆l jrăng đe dăng che thŏng-nan.

³⁵Ih khan: Đe teh inh, mă-lei huay kơ jĭ. Đe dong inh, mă-lei inh ưh kơ băt, Layơ inh hơdơ̆r, inh gô chă wă et dơ̆ng.