Read bahnar Pod 26 Bible Online

Pod 26 - bahnar bible

Pod 26

¹Tơdrong pơyom ưh kơ lăp hăm lu bơngai bơlŭk. Thoi prĕl bơyan phang, thoi 'mi bơyan kĕch.

²Thoi sem rĕch păr tơ âu tơ to, Thoi sem pleng păr juang suang plơ̆ plĕch. Nơ̆r đe hiap tơdrong kơ đei huay kơ truh ôh.

³Tơnguĕt yua teh aseh, dam pơhơ̆p ăn aseh iĕ. 'Long băl 'măn kơ teh rŏng lu bơngai kơtul.

⁴'Nĕ tơl tơwih 'bih bơngai kơwao thoi tơdrong kơtul sư. Hli kơ ih jing nhen ten thoi sư.

⁵'Nĕ tơl tơwih kơ bơngai kơwao thoi tơdrong kơtul sư. Kơnh sư khan sư bơngai hơgei đei đon hlôh wao.

⁶Bu gơnang kơ bơngai kơwao năm roi tơbăt kơ đe. Thoi koh lê̆ jơ̆ng chơ̆ng lê̆ blu sư kơdih păng huch iŏk tơdrong răm.

⁷Nơ̆r pơđơ̆k lăm 'bơ̆r lu bơngai kơtul kơwao. Kŭm thoi jơ̆ng bơngai jo ưh kơ gơh yak.

⁸Pơyom kơ bơngai kơhlôh kơwao. Thoi tah tơmo lăm hră tơ'bla.

⁹Nơ̆r pơđơ̆k lăm 'bơ̆r lu bơngai kơtul kơwao. Thoi jơla trŏ ti bơngai suai sik.

¹⁰Bơngai bu mưng bơngai kơtul kơwao păng bơngai tơmoi rok trong. Thoi minh 'nu bơngai prah hră 'bơm lơ bơngai rơka.

¹¹Lu bơngai kơhlôh pơm pơlơ̆k ming tơdrong kơtul sư. Thoi kŏ hăk boih sa dơ̆ng.

¹²Ih hăm 'bôh minh 'nu bơngai khan kơ sư kơdih bơngai hlôh wao, Bơngai kơtul bơlŭk oei đei hơmĕng hloh kơ sư.

¹³Bơngai hơlah khan đei dăm-brang tơ trong. Đei minh pôm dăm-brang tơ rok trong pơlei to!

¹⁴'Măng dăr plơ̆ plĕch kơ gơwŏk sư thoi yơ bơngai hơlah 'bĭch plơ̆ plĕch kơ giơng sư kư̆m thoi noh.

¹⁵Bơngai hơlah chro ti lăm pơnhan, Kŭm hơnat pat pơmat dêh wă tah tơ lăm 'bơ̆r.

¹⁶Bơngai hơlah khan sư hlôh wao, Hloh mă đei tơpơh 'nu tơl lăp kư̆m tim mă tam sư.

¹⁷Bơngai bu yak rok trong drong mơ̆t tơhil tơdrong noh ưh kơ 'bơm sư. Thoi bơngai mă pet wĕnh đon kŏ.

¹⁸Thoi bơngai wơnh prah ngar ŭnh ngŭr, 'Brơ̆m păng tơdrong lôch.

¹⁹Bơngai bu hơlĕnh sơlam kơ rông 'bôt sư, păng khan: Inh hơnul đĕch măi!

²⁰Ưh kơ đei 'long ŭnh, ŭnh păt; Dah ưh kơ đei roi sơlam lei tơdrong tơhil pơjah gô pơdơh.

²¹Ngar soh lăm ŭnh jing ngŭr, 'long ŭnh tơkuh lăm ŭnh jing khơ̆ng, Bơngai juăt tơhil kư̆m ngăl pơm kơ đe tơhil băl thoi noh.

²²Nơ̆r lu bơngai sơlam hơlĕnh 'ngam thoi tơmam sa 'lơ̆ng. Mơ̆t jrŭ truh tơ klơm tơ klak.

²³'Bơ̆r pơma 'lơ̆ng, mă-lei đơ̆ng lăm jơhngơ̆m kơnê̆, Thoi ge gŏ teh đe pik hu gah 'nguaih.

²⁴Bơngai bu hil areh, pơm 'brach gah 'nguaih praih pơrŏ. Lăm jơhngơ̆m hơ-ơ̆m oei răk tơdrong kơnê̆.

²⁵Tơdah sư pơma 'ngam 'nĕ kơ lui kơ sư. Yua kơ sư đei tơpơh tŏ tơdrong kơnê̆ krưp lăm jơhngơ̆m.

²⁶Mă sư ôn hlơp tơdrong hil chă pơm pơrŏ, Tơdrong trŏ khĕnh hơwĕng sư gô lĕch tơ tơpôl 'bôh.

²⁷Bu sir sơlŭng sư gô huŏng tơ lăm noh, Bu tơgrŏl tơmo, tơmo gô grŏl kơtĭt plơ̆ sư.

²⁸Hơpiĕt hơlĕnh areh lu bơngai sư pơjuă; Mă 'bơ̆r lu sư pơma pơkă wă pơrăm.