Read bahnar Pod 27 Bible Online

Pod 27 - bahnar bible

Pod 27

¹'Nĕ pơư kơ năr dơning, Yua kơ ih ưh kơ băt năr dơning sư jing liơ.

²Lê̆ kơ đe pơư kơ ih, kơdih akâu ih 'nĕ kơ pơma 'bơm. Lê̆ kơ đe pơư pơma, tơ'ngla ih 'nĕ yua 'bơ̆r ih kơdih ôh.

³Tơmo trăp, chuơh kư̆m trăp, Mă-lei đei pơdrŭt lu bơngai kơtul kơwao noh trăp hloh kơ 'bar noh.

⁴Tơdrong hil mĭl kơnê̆ tơpă, Tơdrong hil thoi đak lĕch ro blai lơ̆p, Bu kĕ dơ̆ng 'bơ̆t anăp tơdrong hil gar.

⁵Kơtrơ̆m chrih hơdah tơm măt noh, 'Lơ̆ng hloh khan 'mêm mă-lei oei ngâm lăm to.

⁶Buăl juăt pơjĭ bơ̆n rơka, noh 'lơ̆ng đơ̆ng jơhngơ̆m tơpăt. Bơngai ayăt hil chŭm hơlêm khan 'mêm noh hơlĕnh.

⁷Lu bơngai phĭ đĭ kuă pơjuă lê̆ kơ̆l hơkoh sut tơ ala jơ̆ng. Mă-lei lu bơngai pơngot mă sa tăng lăng thoi 'ngam.

⁸Bơngai thông mang huang ataih đơ̆ng hnam sư, Thoi sem păr ataih đơ̆ng tơpu sư.

⁹Tơmam 'bâu phu păng pơgang 'bâu phu pik pơm kơ jơhngơ̆m hiôk chơt. Nơ̆r pơlung đơ̆ng lu bôl buăl kư̆m hiôk chhơp thoi noh.

¹⁰'Nĕ kơ achăng bôl buăl ih dah buăl juăt 'bă ih, 'Nĕ kơ năm tơ hnam 'nhŏng oh năr ih đei tơdrong gleh pơmat, Bơngai rông 'bôt ih noh 'lơ̆ng hloh kơ 'nhŏng oei ataih.

¹¹Ơ dăm, mă gơh hơgei, lei na pơm pơhiôk jơhngơ̆m inh, Wă kơ gơh tơl tơwih kơ bơngai mă pơm kơ inh mơlâu.

¹²Bơngai gơh hơgei đei tơdrong gleh băt weh ôn. Bơngai kơtul kơwao kư̆ năm tơ anăp, răp pŭ răm.

¹³Rôp pơkơ̆ng hơbĕn ao đơ̆ng sư pơkă wă pơkăm kơ bơngai tơmoi; Sư athei đei tơmam pơdơ̆ng đơ̆ng nơ̆r sư pơkă wă pơkăm kơ drŏ-kăn đi.

¹⁴Bu iung đơ̆ng hrôih drôih sơkat pŭn hiôk kơ rông 'bôt sư hăm nơ̆r re ôr. Nơ̆r noh đe jô̆ nơ̆r hiap pơtê̆.

¹⁵Hngăt lĕch ling-lang năr 'mi tih, Thoi bơngai drŏ-kăn mơkoh noh tơhil ling-lang

¹⁶Bu wă khă sư, thoi khă kial, Kŭm thoi tơpang ti 'ma rôp kơđôp rơmă.

¹⁷Bơsei pat bơsei suĕng, Kŭm thoi bơngai pat pơhrăm buăl sư.

¹⁸Bơngai bu bơwei tơm hơra, gô sa plei sư; Bu chu bơwei yŏng sư, đe gô pơyom.

¹⁹Lăng muh măt lăm đak 'bôh thoi yơ. Jơhngơ̆m bơngai kư̆m tơ'bôh thoi noh mơ̆n.

²⁰Măt kon bơngai lăng ưh kơ đei layơ bơ̆l hăl. Dêh atâu păng lôch răm ưh kơ đei layơ hrăp.

²¹Anih 'buh hu wă rơgoh, tơnuh ŭnh soh maih wă kơ hlăng; Mă-lei đe lăng jơhngơ̆m bơngai thoi đe bơnê kơ sư noh.

²²Mă ih iŏk hơdrei peh hrol lu bơngai kơhlôh kơwao lăm tơpăl, hăm 'ba. Tơdrong kơhlôh kơwao sư oei ưh kơ tơkloh đơ̆ng sư ôh.

²³Ih lăng băt kơnăl kơ triu ih sư thoi yơ, Păng bơwei lu khŭl rơmo ih mă 'lơ̆ng.

²⁴Tơdrong mơdrŏng ưh kơ đei oei ling-lang ôh, Mă jing pơtao kư̆m ưh kơ ling-lang mơ̆n.

²⁵'Nhĕt kro hiong đĭ, 'nhĕt hơdrih bluh plơ̆ng, 'Nhĕt 'nhot lăm bri kông đe phĕ broch akŭm.

²⁶Sŏk triu pơm hơbĕn ao tai ih hrŭk, Bơbe bram tĕch pơm tơmam răt chŭn mir.

²⁷Đak toh bơbe pơm tơmam sa kơ ih hăm lu bơngai lăm hnam, Ih păng kơ lu đam drŏ-kăn ih arih sa.