Read bahnar Pod 28 Bible Online

Pod 28 - bahnar bible

Pod 28

¹Lu bơngai pơm kơnê̆ kơdâu ôn mă ưh kơ đei bu druh. Mă-lei lu bơngai oei arih tơpăt nuih thoi dăm-brang.

²Dêh char pơm kơnê̆, na đei lơ lu bơngai pơgơ̆r; Mă-lei bơngai hlôh wao na pơgơ̆r dêh char gei oei kơjăp đunh.

³Bơngai dơnuh pơgŏ pơđep bơngai pơmat-tat. Nhen thoi đak 'mi tih pơhoch đĭ 'ba hơ'bo.

⁴Bơngai achăng lê̆ khôi juăt hăt bơnê kơ bơngai pơm kơnê̆; Mă-lei đei bơngai kiơ̆ khôi juăt tơblah hăm lu sư.

⁵Bơngai pơm kơnê̆ đê̆ pă băt tơdrong tơpăt; Mă-lei đei bơngai bu băt chă Kră Yang na băt hlôh đĭ-đăng.

⁶Kơtrơ̆m dơnuh hoh oei sa tơpăt. 'Lơ̆ng hloh kơ mơdrŏng nŏng kiơ̆ tơdrong hơlĕnh pơdăr.

⁷Bu wei răk khôi juăt noh kon drŏ-nglo bơngai hơgei; Gah bu pơm juăt hăm lu bơngai sa dư noh wă pơm kơ 'bă sư mơlâu.

⁸Bơngai bu pơm kơ mơdrŏng rai tŏk iŏk đơ̆ng sa kiĕng lơ. Jên kăk răt pơpôi ăn kơ bơngai băt mơnat kơ lu dơnuh hin.

⁹Bơngai bu ưh kơ wă kuă pơgling đon mơ̆ng kiơ̆ khôi juăt. Nơ̆r krao apinh sư Kră Yang areh krưp.

¹⁰Bơngai bu ba lu bơngai tơpăt kiơ̆ trong kơnê̆. Gô huŏng lăm sơlŭng đêl lu sư sir; Mă-lei đei tơdrong pŭn hiôk kơ lu bơngai 'lơ̆ng tơpăt.

¹¹Bơngai mơdrŏng dŏng kơdih akâu khan bơngai hơgei. Mă-lei đei bơngai dơnuh hlôh 'bôh đĭ bơngai noh?

¹²Tơdah bơngai tơpăt jei jơnei, đei hiôk chơt tih; Mă-lei đei bơngai pơm kơnê̆ iung lei đei bơngai kơdâu ôn.

¹³Bơngai bu ôn tơdrong yoch sư ưh kơ đei pŭn hiôk; Mă-lei đei bu tơbral păng achăng lê̆ sư gô đei mơnat.

¹⁴Bơngai bu băt hli yom kơ Kră Yang gô đei pŭn hiôk; Bơngai bu ưh kơ chu arăng kơ̆l gô răm.

¹⁵Bơngai kơnê̆ pơgơ̆r kon pơlei dơnuh hin; Nhen thoi dăm-brang grĕnh gơhuh nhen thoi chơgơu druh sem bri wă rôp sa.

¹⁶Yŏng pơgơ̆r kơhlôh ngăl pơjuă pơđep. Mă-lei dah đei bu areh kơ sa lơi lơ gô arih sot.

¹⁷Bơngai bu tuh pham pơlôch đe, lê̆ sư kơdâu ôn truh tơ lôch; 'nĕ ăn bu tơgŭm sư.

¹⁸Bơngai bu oei arih sa 'lơ̆ng tơpăt gô đei dŏng pơklaih; Bơngai bu kiơ̆ trong đŏng gô huŏng ưh kơ tam băt.

¹⁹Bơngai bu choh mir 'ba gô đei sa rơkah rơkai. Bơngai bu hơlah noh gô hoh răm.

²⁰Bơngai tơpăt gô đei pŭn hiôk lơ; Bơngai bu hăt chă mơdrŏng pă jor gô phak pơmat.

²¹Mơ̆t dŏng đe noh ưh kơ 'lơ̆ng. Mă đơ̆ng minh pôm 'bĕng mi ră mă-lei gô pơm glăi.

²²Bơngai bu kret ham, pơnam chă wă kơ mơdrŏng, Gah rŏng ưh kơ băt tơdrong kơ'bah gô truh kơ sư.

²³Bơngai chrih kơ đe, Đơ̆ng rŏng đei đe bơnê. Hloh kơ bơngai yua hơpiĕt pơma pơhlom.

²⁴Bơngai bu tơtông đơ̆ng mĕ 'bă sư, păng khan: “Ưh kơ pơm yoch ôh,” Bơngai noh buăl juăt lu đe wă chă pơrăm.

²⁵Bơngai bu đei jơhngơ̆m ham chă sơlam pơdrŭt đe tơhil băl. Mă-lei bơngai bu băt gơnang kơ Kră Yang gô phĭ jơnap.

²⁶Bơngai bu gơnang kơ akâu kơdih gô jing bơlŭk. Mă-lei đei bu yak kiơ̆ trong gơh hơgei gô đei hiôk hơđơ̆ng.

²⁷Bơngai bu asong ăn kơ bơngai dơnuh hin ưh kơ kơ'bah ôh. Mă-lei bơngai bu ưh kơ băt mơnat gô đei đe blei hiap.

²⁸Layơ tơdah lu bơngai kơnê̆ iung pơgơ̆r, đe kơdâu ôn đĭ, Mă-lei dah lu sư lôch, lu bơngai tơpăt jing rai lơ.