Read bahnar Pod 29 Bible Online

Pod 29 - bahnar bible

Pod 29

¹Bơngai bu đei chrih ling-lang, Mă-lei oei arăng kơ̆l, Gô đei tơdrong truh blư bla na ưh pă kơ đei gơh dŏng pơklaih.

²Mưh bơngai tơpăt rai lơ, kon pơlei đei chơt hiôk; Mă-lei dah đei bơngai kơnê̆ pơgơ̆r, kon pơlei đei ôr krao.

³Bơngai bu chă tơdrong gơh hơgei lei 'bă sư đei chơt hiôk, Bơngai bu ngôi hăm bơngai đi gô pơrăm mŭk tơmam sư.

⁴Đơ̆ng tơdrong tơpăt pơtao băt wei dêh char sư kơjăp; Mă-lei bơngai sa pơgâm pơgô̆ gô pơrăm char sư.

⁵Bơngai bu hơlĕnh pơhlom kơ rông 'bôt sư, Dăng hơnhuăl dăr kơ jơ̆ng sư kơdih.

⁶Lu bơngai kơnê̆ 'leh hơđong đơ̆ng tơdrong yoch sư kơdih. Mă-lei bơngai tơpăt hat hơri chơt hiôk.

⁷Bơngai tơpăt băt pơm 'lơ̆ng kơ bơngai dơnuh hin; Mă-lei bơngai pơm kơnê̆ ưh kơ đei băt thoi ei ôh.

⁸Bơngai kư̆ kă wă iŏk ŭnh soh pơlei tih; Mă-lei bơngai đon hơgei pơm ngach tơdrong hil.

⁹Dah đei bơngai hơgei oei pơjah hăm bơngai kơtul, Lăp tơhil tơblĕk hiĕk ăr ưh kơ gơh pơtruh băl.

¹⁰Bơngai juăt kơ tuh pham pơlôch đe areh kơ bơngai ưh kơ yoch, Mă-lei đei bơngai tơpăt băt bơwei tơdrong arih bơngai mă yoch.

¹¹Bơngai kơtul kơhlôh tơ'bôh tơdrong blĕk sư; Mă-lei bơngai hơgei pơkơ̆ng ĕnh tơdrong sư hil.

¹²Tơdah lu kră pơgơ̆r mơ̆ng nơ̆r pơma hơlĕnh. Lei đĭ lu bơngai jang tă jing pơm kơnê̆ ngăl.

¹³Bơngai dơnuh hin păng bơngai đe pơjuă pơđep đei minh trong hơbĭ. Đơ̆ng Kră Yang ba tơdrong hơdah kơ măt bre sư.

¹⁴Pơtao ayơ sek tơlang tơpăt kơ bơngai dơnuh hin. Tang-dŏ pơtao sư gô oei kơjăp ling-lang.

¹⁵'Long băl teh chrih bơtho ăn tơdrong gơh hơgei: Mă-lei đei kon hơ'lơ̆p pơm kiơ̆ kơ sư wă pơm kơ mĕ sư mơlâu.

¹⁶Mưh bơngai pơm kơnê̆ rai lơ tơdrong yoch thim rai lơ; Mă-lei bơngai tơpăt băt 'bôh tơdrong lu sư pơ̆k huŏng.

¹⁷Phak bơtho kon hơ'lơ̆p, na ih gô đei oei hiôk-hian; Pơm ăn kơ bơhngol ih gơh arih hiôk.

¹⁸Tơ yơ ưh kơ đei pơdah tơ'bôh ôh kon pơlei oei rơngei pơm yoch, Mă-lei bu wei khôi juăt đei pŭn hiôk!

¹⁹Ưh kơ trŏ đơ̆ng 'bơ̆r nơ̆r pơma 'bơ̆r hoh đĕch na teh bơtho đĭch đam; Mă sư băt ră kư̆m kuă kơ mơ̆ng kiơ̆.

²⁰Ih hăm 'bôh bơngai hăt pơma? Bơngai kơhlôh kơwao ră mă-lei đei đe hơmĕng hloh kơ sư.

²¹Bơngai bu 'me rong đĭch đam đơ̆ng oei 'lơ̆p tơ̆p sư 'lŏ ning-mônh gô đei ơh sơ'ngon

²²Bơngai juăt kơ hil khĕnh tĕnh kơ pơjah; Bơngai jơhngơ̆m tơtŏ pơm ưh kơ trŏ lơ hloh.

²³Bơngai pơang kang rai pơm kơ sư jur; Mă-lei bơngai bu đei iŏk đon ala đe gô pơyom.

²⁴Bơngai bu ngôi hơdai hăm bơngai tơtông ayăt kơ bơhngol sư; Đe ăn sư pơkă pơkăm ră mă-lei ưh kơ pơ̆n pơma kiơ.

²⁵Tơdrong hli kơ kon bơngai thoi hơđong hơ'năk; Mă-lei bơngai bu đei gơnang kơ Kră Yang oei hơđơ̆ng.

²⁶Lơ bơngai chă tơdrong mơnat đơ̆ng yŏng pơgơ̆r, Mă-lei gơh đei jô̆ 'lơ̆ng noh đơ̆ng Kră Yang ăn.

²⁷Bơngai kư̆ kă mă lăng krưp kơnê̆ dêh kơ bơngai tơpăt; Bơngai arih sa tơpăt lu bơngai pơm kơnê̆ kư̆m băt lăng krưp