Read bahnar Pod 4 Bible Online

Pod 4 - bahnar bible

Pod 4

¹Ơ lu đe kon inh, mơ̆ng bĕ nơ̆r bơtho khan đơ̆ng 'bă, Pơgling bĕ đon, wă kơ lu iĕm băt kơ tơdrong hlôh băt.

²Yua kơ Inh đei ăn kơ iĕm hŏk pơhrăm 'lơ̆ng; 'Nĕ kơ hŭt tơdrong Inh bơtho.

³Kơplah Inh oei 'lơ̆p, Inh jing kon drŏ-nglo 'bă inh, Păng kon pôm mĕ inh.

⁴'Bă inh đei bơtho inh: Wei răk bĕ lăm jơhngơ̆m nơ̆r inh pơma. Chu kơ nơ̆r inh tơtă, na ih gơh arih.

⁵Iŏk bĕ tơdrong gơh hơgei, chă bĕ tơdrong hlôh wao, 'Nĕ kơ hiơt, 'nĕ kơ hŭt lê̆ dôm nơ̆r đơ̆ng 'bơ̆r inh pơma;

⁶'Nĕ kơ achăng tơdrong gơh hơgei, na sư gô wei-lăng ih; 'Mêm bĕ kơ sư, na sư gô dŏng ih.

⁷Tơdrong gơh hơgei gĭt kăl hloh; lei iŏk bĕ tơdrong gơh hơgei; Yua bĕ dôm tơmam ih đei noh, na iŏk tơdrong hlôh wao.

⁸Lăng gĭt tơdrong gơh hơgei, na sư gô pôk atŏk ih, Kuăr krôp bĕ sư, na sư pơm kơ đe ư-ang kơ ih.

⁹Tơdrong gơh hơgei sư gô pơyơ̆l tơ kơpal kơ̆l ih gơwang pơkao tơdrong 'lơ̆ng rŏ. Gô pơyơ̆l tơ kơ̆l ih môk pơtao ư-ang.

¹⁰Ơ dăm, mơ̆ng păng iŏk bĕ nơ̆r inh pơma, Na sơnăm ih arih sot đunh sơnăm;

¹¹Inh ba ih rok trong gơh hơgei dui ih lăm trong tơpăt.

¹²Kơplah ih năm, ih yak huay kơ pơgăn, Mưh ih kơdâu, ih huay kơ kơtơih pơ̆k.

¹³Rôp kơjăp bĕ tơdrong bơtho khan, 'nĕ kơ achăng lê̆; Bơwei sư, yua kơ noh boih tơdrong arih ih.

¹⁴'Nĕ kơ mơ̆t kiơ̆ ôh lăm trong lu bơngai pơm kơnê̆, Păng 'nĕ kơ yak năm lăm trong lu bơngai pơm kư̆ kă.

¹⁵Weh bĕ đơ̆ng trong noh, 'nĕ kơ yak rok trong noh, Weh bĕ trong nai păng kư̆ yak tơpăt hloi.

¹⁶Tơdah lu sư ưh tam mă pơm kơnê̆, lu sư ưh kơsŭk tep; Tơdah lu sư ưh tam mă pơm kơ đe, lu sư kral ưh kơ tep.

¹⁷Lu sư sa 'bĕng tơdrong pơm kơnê̆, Huch sik hơmu tơdrong kơnê̆ krưp.

¹⁸Mă-lei trong lu bơngai tơpăt thoi hơdah pơchrang, Pơchrang hơdah truh tơ 'năr dơ̆ng.

¹⁹Gah trong lu bơngai pơm kơnê̆ thoi măng mu; Lu sư ưh kơ băt kiơ pơm kơ lu sư pơ̆k.

²⁰Ơ dăm, mơ̆ng bĕ nơ̆r inh pơma; Pơgling bĕ đon mơ̆ng bĕ dôm nơ̆r inh khan.

²¹'Nĕ ăn kơ lu nơ̆r noh ataih đơ̆ng măt ih, Iŏk răk bĕ lăm jơhngơ̆m ih.

²²Yua kơ sư jing tơdrong arih kơ lu bơngai bu chă đei sư, Tơdrong pơklaih jĭ jăn lăm akâu.

²³Kơchăng bĕ ling-lang wă kơ wei-lăng jơhngơ̆m ih, Yua kơ tơdrong arih tơm lĕch đơ̆ng noh.

²⁴'Bơ̆r ih 'nĕ pă pơma hơlĕnh, Weh ataih bĕ đơ̆ng hơkŭng pơma kư̆ kă.

²⁵Ăn kơ măt lăng tơpăt anăp, 'Nĕ kơ pơ'ngeh muh tơjruh măt.

²⁶Pơm bĕ trong ih yak mă dơhnă, Lei na trong ih yak kơjăp.

²⁷'Nĕ kơ weh-woh 'ma 'ngiĕo, Jơ̆ng ih weh bĕ đơ̆ng tơdrong kơnê̆.