Read bahnar Pod 7 Bible Online

Pod 7 - bahnar bible

Pod 7

¹Ơ dăm wei răk bĕ nơ̆r Inh, wei răk lăm jơhngơ̆m ih nơ̆r Inh tơtă.

²Pơm kiơ̆ nơ̆r Inh tơtă, lei na ih gô arih. Păng wei nơ̆r Inh bơtho khan thoi ih wei-lăng kon-ngai lăm măt ih.

³Chô̆ sư tơ hơnglâu ti ih, chih sư tơ lăm jơhngơ̆m ih.

⁴Khan bĕ kơ tơdrong gơh hơgei: “Ih jing mai oh Inh!” Păng krao tơdrong hlôh wao jing adrĕch adrung ih;

⁵Wă kơ sư wei ih huay kơ hlŭ kơ drŏ-kăn đi, Drŏ-kăn đi ngăl pơhlŭ hơgei đei nơ̆r 'ngam.

⁶Đơ̆ng 'măng-'mŏk Inh lăng păng tơmang 'bôh.

⁷Đei bơngai kơhlôh kơwao lăm lu bơngai 'nao iung tơdăm, Lăm lu tơdăm mơlôh đei minh 'nu ưh kơ hlôh băt.

⁸Sư năm rok trong drong weh tơ hnam drŏ-kăn đi. Sư yak tơklă wă mơ̆t tơ hnam drŏ-kăn đi.

⁹Kơplah huơ huĭnh drơ̆m kơsơ̆, kiơ̆ kơ măng mu găm, măng klăm gueo.

¹⁰Lăng to, minh 'nu adruh năm tơ'bơ̆p sư, Hrŭk hơbĕn ao 'nao pơguăng thoi drŏ-kăn đi jơhngơ̆m hơlĕnh bơkuĕch.

¹¹Pơma 'bơ̆r re lơlial, pơm 'blal ưh kơ băt mơlâu. Jơ̆ng hrăn chă huang pă đei oei hnam.

¹²Phŏ tơ rok trong phŏ tơ kơchơ hơwơ chă kiơ̆ mum trong kueng.

¹³Drŏ-kăn noh rôp kuăr sư boih păng chŭm sư. 'Bơ̆r pơma kư̆ kă, wă pơhlŭ bơngai tơdăm noh khan:

¹⁴Inh đei tơmam soi pơyơ̆r bơnê tơ hnam inh, Năr 'nâu inh pơyơ̆r pơkeh boih kơ nơ̆r đêl pơkă.

¹⁵Thoi noh inh wă năm sơng ih wă chă ih, na inh tơ'bơ̆p ih boih.

¹⁶Inh lơ̆k boih kơpal giơng khăn che brông 'lơ̆ng. Đơ̆ng dêh char Êyiptơ.

¹⁷Iŏk 'long pơgang 'bâu phu lu 'long hol, pik lê̆ sư kơpal giơng inh 'bĭch.

¹⁸Năm ngôi bĕ mă hrăp lăp thoi jơhngơ̆m hưch wă dĭng truh pơgê. Hơnul pơhiôk hăm tơdrong hưch wă.

¹⁹Klo inh, ưh kơ đei oei hnam ôh, sư năm tơ ataih boih.

²⁰Sư chĕp ba kơdŭng jên boih, rŏ lăng sư brŏk truh khei pơnil kơnh.

²¹Drŏ-kăn pơhlŭ pơlung hăm nơ̆r 'bơ̆r pơma rơngơp hơgei, lei wă kơ drŏ-nglo puh huŏng.

²²Na drŏ-nglo kiơ̆ hloi, Thoi rơmo tơno năm tơ đe 'buh sa, na thoi juei 'leh hơđong,

²³Dĭng 'brơ̆m hră 'bet hlom lăm plei nuih; Thoi sem năm puh hơnhuăl, Mă ưh kơ băt 'nâu boih wă pơrăm tơdrong arih.

²⁴Na dang ei ơ dăm, mơ̆ng bĕ nơ̆r Inh, Pơgling bĕ đon kơ lu nơ̆r 'bơ̆r inh khan.

²⁵'Nĕ ăn jơhngơ̆m ih wih kiơ̆ trong drŏ-kăn noh, Păng yak kiơ̆ jrok rok trong sư.

²⁶Pơm kơ lơ bơngai pơ̆k huŏng păng pơlôch pơrăm kư̆m lơ.

²⁷Hnam sư thoi trong năm tơ dêh atâu; 'nâu trong jur năm lăm dơnâu ŭnh.