Read bahnar Pod 8 Bible Online

Pod 8 - bahnar bible

Pod 8

¹Tơdrong gơh hơgei ưh kơ oei krao? Tơdrong hlôh wao ưh kơ oei ôr hă?

²Tơdrong gơh hơgei hơ-oei tơ kơpal kông kơjung hloh, 'Bơ̆t trong; tơ rim trong tơklah puăn;

³Jê̆ 'măng jang; 'bơ̆t anăp 'măng mơ̆t tơ pơlei tih, Tơ trong mơ̆t, sư krao ôr:

⁴“Ơ lu kon bơngai, inh krao lu iĕm boih; Nơ̆r inh krao lu kon bơngai!

⁵Ơ lu bơngai kơ hlôh, hŏk pơhrăm bĕ tơdrong hlôh wao, Ơ lu bơngai kơtul, iŏk bĕ tơdrong hlôh wao.

⁶Mơ̆ng bĕ yua kơ Inh gô bơtho tơdrong gĭt kăl, Đơ̆ng 'bơ̆r Inh khan tơdrong tơpăt.

⁷'Bơ̆r inh pơma tơpăt sĭt; Hơkŭng inh areh kơ tơdrong kơnê̆.

⁸Dôm nơ̆r đơ̆ng 'bơ̆r Inh pơma tơdrong tơpăt ngăl, lăm noh hoh-hoy kơ tơdrong glăi.

⁹Đĭ-đăng hơdah hơdong kơ lu bơngai hlôh wao. Păng tơbăt tơpă kơ bơngai mă chă đei gơh hơgei.

¹⁰Iŏk bĕ nơ̆r Inh bơtho pơkă hloh kơ jên kăk. Răk bĕ tơdrong gơh hơgei 'nei hloh kơ maih se;

¹¹Tơdrong hlôh wao gĭt hloh kơ jơmŏng; Kŏng pơting hloh kơ dôm mŭk ih 'maih wă.

¹²Inh boih tơm tơdrong gơh hơgei, oei hơdai hăm đon hlôh wao, Păng đei tơdrong băt hlôh, 'bôh nhen tơdrong lăng hơlen.

¹³Băt hli yom kơ Kră Yang jing areh kơ tơdrong kơnê̆, Inh areh kơ tơdrong pơrŏ, pơang tơdrong pơma kơnê̆, ưh kơ tơpăt.

¹⁴Tơdrong pơgơ̆r, gơh hơgei noh gah Inh. Inh đei pran kơtang.

¹⁵Đơ̆ng Inh na đei lu pơtao gơh pơgơ̆r, Păng lu yŏng gơh pơgơ̆r pơm tơpăt gơh băt pơkă trŏ.

¹⁶Đơ̆ng Inh, na đei lu yŏng gơh pơgơ̆r păng lu yŏng wei-lăng teh đak.

¹⁷Inh 'mêm kơ lu bơngai 'mêm kơ Inh. Bơngai bu adrin chă Inh gô tơ'bơ̆p Inh.

¹⁸Tơdrong mơdrŏng, yŏng đe ư-ang Mŭk tơmam kơjăp lăm Inh.

¹⁹Plei yua đơ̆ng Inh 'lơ̆ng hloh kơ maih se, mă maih rơgoh, Hloh kơ hu đe 'nao hling.

²⁰Inh yak lăm trong tơpăt, băt oei lăm trong trŏ lăp.

²¹Ăn mơdrŏng kơ lu bơngai 'mêm kơ Inh, Tuh tơ'bĕnh ăn kơ pơk mong tơmam sư.

²²Kră Yang pơjing Inh adrol hloh. Mă blŭng-a Sư pơjing sơ̆.

²³Inh boih đei blŭng-a ala chă kơ đĭ-đăng, Păng tơm rơh adrol hloh kơ pơjing teh đak.

²⁴Kơplah tam đei đak dơsĭ, đei Inh bơih, Lu tu đak tam mă lĕch, đak tam mă lơ.

²⁵Adrol kơ kông đak tam mă đei, groi kông tam mă 'bôh, đei Inh boih.

²⁶Adrol kơ Kră Yang pơjing teh mir na, adrol kơ đei 'mui teh, đei Inh boih.

²⁷Kơplah Kră Yang pơjing kơ plĕnh, păng gơwang kơ đak dơsĭ jrŭ, đei inh tơ noh.

²⁸Kơplah Sư pơjing kơjăp kơpal plĕnh, Păng đak lĕch tih lăm dơsĭ jrŭ,

²⁹Hơgat kơ đak dơsĭ, wă kơ đak huay kơ tŏk hloh kơ Sư hơgăt, Kơplah Sư pơjing hơnă teh đak,

³⁰Kơplah noh Inh oei gah cheng Sư bơ̆jang, Rim năr Inh pơhiôk Sư. Ling-lang chơt hiôk 'bơ̆t anăp Sư.

³¹Chơt hiôk lăm teh đak Sư pơjing, Păng ling-lang chơt hiôk hơdai hăm kon bơngai.

³²Dang ei, ơ dăm, mơ̆ng bĕ nơ̆r Inh; Pŭn hiôk tơpă bơngai bu oei rok kiơ̆ trong inh.

³³Mơ̆ng bĕ nơ̆r bơtho khan. Athei mă hơgei, 'nĕ kơ sơngah ôh.

³⁴Pŭn hiôk dêh bơngai bu mơ̆ng kiơ̆ nơ̆r Inh; Oei lăng măng năr 'bơ̆t 'măng jang Inh, gô răp 'bơ̆t 'măng hnam Inh.

³⁵Yua kơ bơngai bu tơ'bơ̆p Inh, chă 'bôh tơdrong arih. Păng đei iŏk tơdrong mơnat đơ̆ng Kră Yang.

³⁶Mă-lei bơngai bu sơngah kơ Inh, gô pơrăm bơhngol sư kơdih; Bơngai bu areh kơ Inh, chă tơdrong lôch.