Read bahnar Pod 9 Bible Online

Pod 9 - bahnar bible

Pod 9

¹Tơdrong gơh hơgei đei boih pơjing hnam kơdih. Sư traih boih tơpơh tŏ jrăng sư.

²'Bet sa sem dơrong, hrâu bơlŭ hăm sik hơmu sư boih. Păng hơmet gơ'bang sŏng sa boih.

³Sư đei wơh boih đam drŏ-kăn sư, Sư krao ôr đơ̆ng anih kơjung hloh lăm pơlei tih,

⁴Bơngai bu kơ hlôh mơ̆t bĕ tơ âu, Sư khan kơ lu bơngai ưh kơ hlôh:

⁵Hiăng bĕ, năm sa tơmam inh, Păng huch sik hơmu inh hrâu boih.

⁶Lê̆ bĕ tơdrong kơwao, na ih đei arih; Kiơ̆ bĕ trong tơdrong hlôh wao.

⁷Bơngai bu hơmet bơtho bơngai blei hiap pŭ iŏk tơdrong mơlâu kơdih. Bu chrih kơ bơngai kơnê̆ gô jĭ jơhngơ̆m.

⁸'Nĕ chrih bơtho bơngai juăt kơ blei hiap đe, kơnh sư hil kơ ih. Chrih bĕ kơ bơngai gơh hơgei, na sư gô 'mêm kơ ih.

⁹Bơtho pơhrăm bĕ bơngai gơh hơgei, na sư gô gơh hơgei hloh. Pơhrăm bơngai tơpăt, na sư rai tơpăt hloh. Bơtho bơngai tơpăt, na sư gô rai thim hơgei.

¹⁰Băt hli yom kơ Kră Yang, noh tơm tơdrong gơh hơgei; Băt hlôh kơ Kră Yang Rơgoh, noh boih tơdrong hlôh wao.

¹¹Yua kơ đơ̆ng Inh, na năr ih arih sot hloh, Lu sơnăm ih arih thim rai kơjung sot hloi.

¹²Tơdah ih gơh hơgei, đei yua kơ ih kơdih; Tơdah ih blei hiap, sĭt ih gô pŭ hơngiap kơdih.

¹³Drŏ-kăn kơtul kơwao ngăl pơma ôr kư̆ kă, Hơleng ưh kơ băt tơdrong kiơ.

¹⁴Sư hơ-oei ngôi 'bơ̆t 'măng hnam sư, Kơpal tang-dŏ kơjung lăm pơlei,

¹⁵Wă krao lu bơngai oei yak rok trong, Lu bơngai yak tơpăt kiơ̆ trong kơdih:

¹⁶Mơ̆t bĕ tơ âu bơngai kơhlôh; Sư kư̆m khan kơ bơngai kơwao thoi âu:

¹⁷Nhă đak đe tơtông 'ngam, sa tơmam ôn noh hiôk tơpă.

¹⁸Mă-lei lu sư ưh kơ băt ôh noh anih lôch nhơ̆m hmoi, Păng lu bơngai drŏ-kăn wơ̆n noh tă kơ oei lăm sơlŭng jrŭ dêh atâu.