Read bahnar Bok 10 Bible Online

Bok 10 - bahnar bible

Bok 10

¹Minh pôm roi lôch pơm kơ đak 'bâu phu jing 'bâu ôm; wơnh 'bơm tŏ sĕt đĕch pơm ăn kơ anăn bơngai hơgei đe ưh pă ư-ang.

²Jơhngơ̆m bơngai hơgei đei ba sư tơdrong trŏ; na jơhngơ̆m bơngai kơtul pơdrŭt sư pơm tơdrong glăi.

³Truh tơ yak rok trong tih bơngai kơtul nơnăm kư̆m ưh kơ wao; tơ'bôh ăn kơ đĭ-đăng bơngai băt sư bơngai kơtul.

⁴Dah yŏng pơgơ̆r hil, ih 'nĕ hăt kơdâu weh đơ̆ng anih ih, yua kơ đơ̆ng ih chu sư na gơh klaih đơ̆ng tơdrong glăi tih.

⁵Inh 'bôh minh tơdrong glăi tih lăm ala teh âu. Tơdrong pơm glăi đơ̆ng lu bơngai pơgơ̆r:

⁶Lu bơngai kơtul bơlŭk, đe pôk hơtŏk sư jang tơdrong tih, lu bơngai mơdrŏng tơdrong hơgei tă oei tơ ala.

⁷Inh kư̆m 'bôh bơngai đĭch hao aseh, na yŏng tơ'ngla sư tă nơnăm jơ̆ng hoh nhen thoi bơngai đĭch.

⁸Bơngai bu sir sơlŭng phŏ gô puh huŏng lăm sơlŭng, na bơngai bu yuih tơnăr hnam, phŏ 'bih gô choh sư.

⁹Bơngai bu teh tơmo, phŏ tơmo gô kơtĭt sư jĭ; bơngai blah 'long ŭnh, phŏ phŏ gô prâu 'bơm sư jĭ rơka.

¹⁰Pla sung kơmŭl ưh kơ pat măt sư, gô huach hiong jơhngơ̆m lơ; mă-lei tơdrong hơgei gô tơgŭm keh đang.

¹¹Tơdah 'bih choh adrol kơ krao bơngai pơm kơ 'bih 'beh, lei chă bơngai pơm kơ 'bih noh 'beh pă yua kiơ boih.

¹²Nơ̆r bơngai hơgei pơma pơm ăn kơ đe pơyom; mă-lei nơ̆r bơngai kơtul pơma ba tơdrong răm kơdih akâu.

¹³Nơ̆r sư pơma, blŭng-a jơ̆ kơtul, tuch-luch sư kơtul răm rai dêh.

¹⁴Bơngai kơtul kơwao juăt kơ pơma lơ, pơma chơgăm; mă-lei, kon bơngai ưh kơ đei bu băt ôh tơdrong kiơ gô truh păng ưh kơ đei bu băt lê̆ adrol tơdrong kiơ gô truh kơ sư đơ̆ng rŏng kơ lôch.

¹⁵Lu bơngai kơtul jang, pơgleh lu sư kơdih, yua kơ lu sư mah ưh pă băt wă brŏk trong ayơ wă gơh truh tơ pơlei.

¹⁶Răm-'băm tơpă kơ dêh char ayơ đei pơtao oei 'lơ̆p păng lu yŏng pơgơ̆r hăt kơ et sa pơrŏ đơ̆ng pơgê hrôih.

¹⁷Pŭn hiôk dêh kơ teh đak đei pơtao adrĕch yŏng mơng păng lu yŏng pơgơ̆r băt sŏng sa trŏ kơ jơ, wă tơgŭm jơhngơ̆m pran, ưh kơ sĭ et wă kơ suai.

¹⁸Kơlih yua kơ đơ̆ng nơng hơlah kơ jang na anih ưh kơ gram hnam ưh kơ hơnĭl.

¹⁹Đe pơih et sa wă kơ chơt hiôk; et tơdrô pơthim ăn kơ chăl arih chơt; đei jên kăk gơh răt tôm tơdrong.

²⁰Mă khan lăm tơdrong ih tơchĕng, ih 'nĕ kơ hiap pơtê̆ pơtao ôh; mă khan lăm anih ih tep, ih kư̆m 'nĕ kơ hiap lu bơngai mơdrŏng mơng; yua kơ lu sem păr anhăk pơđông roi tơdrong ih pơm tơ ataih.