Read bahnar Bok 3 Bible Online

Bok 3 - bahnar bible

Bok 3

¹Đĭ-đăng tôm tơdrong đei hơgăt lê̆ khei 'năr ngăl; rim tơdrong lăm ala teh âu đei hơgăt lê̆ khei 'năr boih.

²Đei năr tơpŭ, đei khei năr lôch; Đei năr pơtăm, đei khei năr kĕch yuă;

³Đei năr pơlôch, đei năr ming pơklaih; Đei năr pơrăm, đei năr pơm tơiung;

⁴Đei năr nhơ̆m hmoi, đei năr hiôk chơt; Đei năr ơh sơ'ngon, đei năr hơri suang;

⁵Đei năr klơ̆m hŭt lê̆ tơmo, đei năr pơpôi ming tơmo; Đei năr pôk kơ'mĭn, đei năr pră achăng;

⁶Đei năr chơchă, đei năr sư hiong, Đei khei năr răk mong, đei năr hŭt lê̆;

⁷Đei năr hek lê̆, đei năr sĭt ming; Đei năr ngăn, đei năr pơma.

⁸Đei năr 'mêm, đei năr areh; đei năr tơblah, đei rơngei hiôk.

⁹Hăm đei yua kơ lu bơngai mă nŏng kơ jang gleh hrat?

¹⁰Inh 'bôh boih tơdrong Kră Yang 'Bok Kei-Dei pơjao ăn kơ kon bơngai.

¹¹Kră Yang 'Bok Kei-Dei pơjing bơih Sư 'lơ̆ng rŏ ngăl lăm jơ 'năr Sư. Sư kư̆m đei ăn kơ kơ̆l 'ngok kon bơngai băt kơ chăl đơ̆ng rŏng. Mă-lei ưh kơ đei bu kĕ băt hlôh kơ Kră Yang 'Bok Kei-Dei pơm đơ̆ng blŭng-a truh tơ ning-mônh.

¹²Lei na, inh băt 'bôh lăm chăl arih kon bơngai ưh kơ đei kiơ 'lơ̆ng hloh kơ hiôk chơt păng pơm 'lơ̆ng lăm đĭ chăl arih âu.

¹³Đĭ-đăng bơ̆n athei hiôk mă sŏng sa, nhă, dah lăm tơdrong jang bơ̆n, noh đơ̆ng Kră Yang 'Bok Kei-Dei asong ăn.

¹⁴Inh 'bôh băt tôm tơdrong Kră Yang 'Bok Kei-Dei pơjing sư oei đei khŏm khŏm, kon bơngai ưh kơ gơh pơthim tơdrong kiơ păng ưh kơ gơh hơtŭch lê̆ ôh; Kră Yang 'Bok Kei-Dei pơm thoi noh, wă kơ kon bơngai hli yom kơ Sư.

¹⁵Tơdrong kiơ đei dang ei, noh đei đơ̆ng sơ̆ boih; tơdrong kiơ wă đei noh đei boih: Kră Yang 'Bok Kei-Dei sư pơm lei-lăi thoi Sư pơm boih.

¹⁶Inh oei 'bôh dơ̆ng lăm teh đak âu. Lăm tơdrong tơpăt kư̆m đei tơdrong kơnê̆ lăm tơdrong khan tơpăt mă-lei oei đei tơdrong ưh kơ tơpăt.

¹⁷Na inh khan: Kră Yang 'Bok Kei-Dei gô sek tơlang kơ lu bơngai pơm 'lơ̆ng păng lu bơngai pơm kơnê̆, yua kơ Sư đei hơgăt ăn boih jơ 'năr kơ tôm tơdrong kiơ kiơ.

¹⁸Inh băt tơpă Kră Yang 'Bok Kei-Dei pơlong lăng kon bơngai, wă kơ lu sư băt, kon bơngai lei-lăi kơ kon sem brem đĕch.

¹⁹Yua kơ tơdrong kon bơngai đei thoi yơ, kon sem brem đei thoi noh mơ̆n; kon bơngai lôch, kon sem brem kư̆m lôch; 'bar khŭl noh tă kơ dui jơhngơ̆m ngăl, kon bơngai ưh kơ đei kiơ hloh kơ kon sem brem; đĭ-đăng tă kơ tơdrong kơđei ngăl.

²⁰Pơđĭ kơ bre sư gô brŏk tơ minh anih, đĭ kơ bre sư jing đơ̆ng 'mui teh, đĭ kơ bre sư kư̆m gô brŏk tơ 'mui teh.

²¹Bu gơh băt tơpă bơhngol kon bơngai păr tŏk tơ plĕnh, dah bơhngol kon sem brem jur tơ teh?

²²Na inh 'bôh kon bơngai bơ̆n 'lơ̆ng hloh noh athei hiôk chơt lăm tơdrong jang kơdih; noh boih tơdrong apah kơ sư; yua kơ ưh kơ đei bu gơh ba bơ̆n wơ̆t hơlơ̆k 'bôh dơ̆ng dôm tơdrong truh đơ̆ng rŏng kơ bơ̆n lôch.