Read bahnar Bok 6 Bible Online

Bok 6 - bahnar bible

Bok 6

¹Inh 'bôh dơ̆ng đei minh tơdrong kơnê̆ lăm ala teh âu, tơdrong mă pơm kơ kon bơngai trăp trĭn dêh.

²Đei minh 'nu bơngai mă Kră Yang 'Bok Kei-Dei ăn kơ sư mơdrŏng, đei mŭk tơmam lơ, đe ư-ang, dĭng mah dôm tơdrong jơhngơ̆m sư hơpơi nă đei ngăl, ưh kơ đei kơ'bah kiơ hloi; mă-lei Kră Yang 'Bok Kei-Dei ưh kơ ăn sư yua sa mŭk tơmam sư noh ôh, tă kơ bơngai nai đei yua sa mŭk tơmam sư noh. Noh jơ̆ tơdrong kơđei, noh boih tơdrong tơnat kơhlôh dêh.

³Dah minh 'nu bơngai pơjing đei minh-hrĕng 'nu kon hơ'lơ̆p păng sư arih sot đunh sơnăm, mă-lei lăm jơhngơ̆m sư 'nhŏ mă đei tơdrong hiôk chơt păng sư lôch ưh kơ đei bơngai 'bŭ; Inh khan kon nge rơngăt sư oei păi 'biơ̆ kơ bơngai noh 'mơ̆i.

⁴Yua kơ kon nge rơngăt noh lĕch đơ̆ng klak mĕ sư, đơ̆ng noh sư năm tơ anih măng mu, đe 'bŭ sư lăm teh.

⁵Sư ưh kơ tam 'bôh măt 'năr, kư̆m ưh kơ tam băt kiơ; sư năm pơdơh hiôk hloh kơ bơngai kră noh.

⁶Mă khan bơngai bu arih sot kră truh tơ 'bar-rơbâu sơnăm mă-lei ưh kơ đei arih hiôk chơt lăm chăl arih âu. Kŭm ưh kơ đei hiôk dang nge lôch rơngăt. Hăm trŏ kơ đĭ-đăng bơngai tă kơ wă brŏk tơ minh anih đĕch?

⁷Kon bơngai nŏng kơ adrin jang gleh hrat noh yua kơ wă 'me hơlŏng klak ao hrŭk, mă-lei jơhngơ̆m 'maih wă ưh kơ đei layơ hrăp.

⁸Bơngai hơgei đei yua kiơ hloh kơ bơngai kơtul bơngai dơnuh băt đei đon arih sa 'lơ̆ng hăm đei yua kiơ ưh?

⁹Tơdrong kiơ măt 'bôh sư 'lơ̆ng, sư hloh kơ chă hơpơi rŏ. Noh kư̆m tơdrong kơđei.

¹⁰Tơmam kiơ mă đei dang ei sư đĭ đei anăn boih. Bơ̆n kư̆m băt kơ kon bơngai gô thoi yơ; kon bơngai ưh kơ gơh pơjah plơ̆ hăm tơ'ngla mă pran kơtang hloh kơ bơ̆n.

¹¹Rai đei tơdrong pơma lơ rai tơdrong kơđei hăm đei tơdrong kiơ lơi yua 'biơ̆ kơ kon bơngai ưh?

¹²Yua kơ dôm lu năr lăm chăl arih kon bơngai ưh kơ yua kiơ păr hiong thoi yơ̆p thoi ngôi, hăm đei bu băt tơdrong kiơ 'lơ̆ng đei lơi yua kơ bơ̆n? Hăm đei bơngai bu gơh khan lê̆ adrol tơdrong kiơ wă truh kơ bơngai 'nâu, đơ̆ng rŏng kơ sư lôch?