Read bahnar Bok 7 Bible Online

Bok 7 - bahnar bible

Bok 7

¹Anăn đe ư-ang 'lơ̆ng hloh kơ đak pơgang 'bâu phu mă gĭt; năr lôch 'lơ̆ng hloh kơ năr hơiơch.

²Năm tơ hnam đe lôch, 'lơ̆ng hloh kơ năm tơ hnam đe et sa tih; yua kơ lei bơngai arih athei 'blŏk dah đei jơ wă tơchĕng kơ tơdrong noh.

³Ơh sơ'ngon 'lơ̆ng hloh kơ hiĕk chơt, yua kơ đơ̆ng sơ'ngon pơih kơ̆l 'ngok hơdah.

⁴Bơngai hơgei ling-lang tơchĕng kơ tơdrong lôch, bơngai kơtul nŏng kơ tơchĕng kơ tơdrong hiôk chơt đĕch.

⁵Mơ̆ng nơ̆r lu bơngai hơgei hil bơtho. Sư 'lơ̆ng hloh kơ mơ̆ng nơ̆r bơngai kơtul hơri chơt.

⁶Nơ̆r hiĕk lu bơngai kơtul re nhen ŭnh sa bơmreh jơla đe tơkuh ala gŏ. Re mơ̆ng tơdrong kơ đei.

⁷Mưh pơjuă pơđep đe pơm kơ lu bơngai hơgei jing kơtul păng sa pơgâm sư pơm kơ kơ̆l 'ngok măng mu.

⁸Pơkeh ming tơdrong jang 'lơ̆ng hloh kơ 'nao pơtơm pơm plơ̆ng, chơ̆n jơhngơ̆m 'lơ̆ng hloh 'bônh kơ pơang.

⁹'Nĕ hăt kơ hil, yua đơ̆ng tơdrong hơgei na gơh wei tơdrong arih kơdih akâu.

¹⁰'Nĕ kơ jet: “Yua kơ kiơ chăl adrol sơ̆ 'lơ̆ng 'biơ̆ kơ chăl ahrei?” Yua kơ apinh thoi noh ưh kơ hơgei ôh.

¹¹Tơdrong hơgei gĭt kăl nhen thoi bơngai đei tơmam chŭn mir ioi đơ̆ng adrĕch sư, păng chĕp ba tơdrong đei yua đunh sơnăm kơ lơ bơngai lăm chăl arih.

¹²Kŭm nhen thoi jên kăk, tơdrong hơgei nhen thoi ngôi pĕng akâu jăn, mă-lei tơdrong hlôh băt kơ bơngai hơgei đei yua đunh sơnăm hloh, yua kơ đơ̆ng tơdrong hơgei na gơh wei tơdrong arih lu bơ̆n.

¹³Lăng bĕ tơdrong jang Kră Yang 'Bok Kei-Dei. Tơmam kiơ sư gŭt pơđŏng yŏng kiơ kĕ 'bơ̆ tơpăt.

¹⁴Lăm năr hiôk athei chơt, lăm năr pơmat-tat, lăng bĕ. Pŭn hiôk dah pơmat-tat. 'Bar tơdrong noh đơ̆ng Kră Yang 'Bok Kei-Dei ăn.

¹⁵Đĭ lăm chăl arih tơdrong ưh kơđei, inh hlôi 'bôh băt boih kơ đĭ-đăng tơdrong 'nâu. Đei bơngai pơm 'lơ̆ng tơpăt tă kơ lôch 'bônh; bơngai pơm kơnê̆, tă kơ lê̆ arih sot.

¹⁶'Nĕ gan pơrŏ dêh khan bơ̆n bơngai 'lơ̆ng tơpăt, kư̆m 'nĕ khan kơ bơ̆n bơngai hơgei hloh. Đei yua kiơ rai pơrăm kơdih akâu.

¹⁷'Nĕ kiơ̆ lu trong pơm kơnê̆ păng 'nĕ kơ oei sa thoi bơngai kơtul bơlŭk; đei yua kiơ rai jah lôch adrol kơ jơ 'năr hơgăt.

¹⁸'Lơ̆ng hloh kơ ih athei 'nĕ kơ pơư kơdih akâu 'lơ̆ng tơpăt, gơh hơgei păng athei areh kơ tơdrong kơnê̆. Yua kơ bơngai bu hli yom kơ Kră Yang 'Bok Kei-Dei sư gơh weh đơ̆ng 'bar tơdrong noh.

¹⁹Bơngai hơgei gơh đei jơhngơ̆m pran hloh kơ mơjĭt 'nu bơngai pơgơ̆r lăm pơlei tih.

²⁰Tơpă, lăm teh đak âu ưh kơ đei minh 'nu tơpăt, pơm 'lơ̆ng ling-lang ưh kơlah pơm yoch.

²¹Thoi ei 'nĕ kơ mơ̆ng dôm nơ̆r đe pơma, kơnh ih kơtơ̆ng 'bơ̆r đĭch đam ih blei hiap ih.

²²Lăm jơhngơ̆m ih kư̆m băt boih. Đei lơ wơ̆t ih kư̆m đei hiap lơ bơngai.

²³Inh hlôi pơlong lăng boih tơdrong hơgei inh, inh khan: Inh bơngai gơh hơgei; mă-lei tơdrong hơgei oei ataih dêh kơ inh.

²⁴Dôm, tơdrong hơgei tă kơ ataih jrŭ dêh, kơ̆l 'ngok kon bơngai.

²⁵Inh adrin chơchă đĭ jơhngơ̆m wă kơ băt, hơlen wă kơ 'bôh tơdrong hơgei, wă kơ gơh tơlang tôm tơdrong, inh đei 'bôh tơdrong kơnê̆ noh lĕch đơ̆ng tơdrong kơtul kơwao na jing wơnh.

²⁶Inh 'bôh drŏ-kăn 'bĕnh tơdrong pơhlŭ sơ'ngon trăp hloh kơ tơdrong lôch. Tơdrong hưch sư thoi hơnhuăl, ti sư thoi tơlei glang. Bơngai bu băt hli yom kơ Kră Yang 'Bok Kei-Dei gơh klaih đơ̆ng ti sư. Mă-lei bơngai bu pơm yoch, sư 'leh lăm hơnhuăl noh.

²⁷'Bok bơtho khan: “Đơ̆ng rŏng kơ tơchĕng lăng rim tơdrong, wă kơ chă tơdrong tơlang trŏ, lei 'nâu mă tơdrong inh chă 'bôh;

²⁸Noh boih jơ̆ tơdrong inh oei wă chơchă ling-lang mă ưh tam 'bôh: Lăm minh-rơbâu 'nu bơngai drŏ-nglo, inh chă 'bôh boih lăp minh 'nu đĕch bơngai tơpăt; na lăm đĭ-đăng lu bơngai drŏ-kăn, inh chă ưh kơ đei minh 'nu bu hloi tơpăt.

²⁹Mă-lei 'nâu mă tơdrong inh chă 'bôh: Kră Yang 'Bok Kei-Dei pơjing boih bơngai tơpăt; mă-lei kon bơngai chơchă đon kơdih tơdrong kơnê̆.”