Read bahnar Bok 8 Bible Online

Bok 8 - bahnar bible

Bok 8

¹Bu kiơ̆ tam lu bơngai hơgei? Bu gơh tơblang dôm tơdrong dôm tơmam? Tơdrong hơgei pơm kơ măt kon bơngai hơdah hơdong, đêl muh măt ưh kơ praih, tơplih jing praih.

²Chu yom bĕ kơ nơ̆r pơtao pơkă, yua kơ Kră Yang 'Bok Kei-Dei, pơkă wă wei-lăng pơtao.

³'Nĕ kơ hăt kơdŭn weh đơ̆ng anăp pơtao. 'Nĕ kơ pơgơ̆p hăm tơdrong kơnê̆, yua kơ pơm kiơ̆ kơ tơdrong thoi sư wă.

⁴Mă loi, nơ̆r pơtao pơma đei tơdrong gơh kĕ; hăm đei bu pơ̆n pơma plơ̆ kơ sư khan: Ih pơm kiơ?

⁵Bơngai bu chu pơm kiơ̆ nơ̆r pơtao wơh, lei bơngai noh ưh kơ đei layơ tơ'bơ̆p tơdrong kơnê̆ ôh păng lu bơngai hơgei băt kơ jơ 'năr păng băt kơ tơdrong kăl kơ pơm.

⁶Yua kơ đĭ-đăng đei tơdrong hơnat păng rŭng răng lăp kơ jơ 'năr păng đei tơdrong ngăl.

⁷Yua kơ kon bơngai ưh kơ đei bu băt adrol tơdrong kiơ wă truh; lei na ưh kơ đei bu gơh khan lê̆ adrol kơ năr dơning sư thoi yơ?

⁸Ưh kơ đei bu gơh chĕp pơgơ̆r tơdrong arih; kư̆m ưh kơ đei bu gơh weh kơ lôch; lăm tơdrong tơblah tơdrong lôch ưh kơ đei lê̆ bu; bu pơm kơnê̆, tơdrong kơnê̆ kư̆m ưh kơ gơh dŏng pơklaih sư đơ̆ng tơdrong lôch ôh.

⁹Inh chă lăng hơlen tôm tơdrong đei pơm ala teh âu, inh 'bôh lu bơngai pơgơ̆r ngăl pơjuă pơđep đe.

¹⁰Inh kư̆m đei 'bôh lu bơngai pơm kơnê̆ lôch, đei kon pơlei 'bŭ hơmet pơ'lơ̆ng; yua kơ sư juăt kơ năm tơ hnam akŭm. Na lu bơngai pơm 'lơ̆ng, oei kơtă lăm pơlei tih đe 'bônh kơ hiơt, noh kư̆m jơ̆ tơdrong kơ đei.

¹¹Yua kơ lu bơngai mă pơm kơnê̆ ră, đe ưh kơ đei phak hloi, lei na jơhngơ̆m kon bơngai oei 'maih pơm kơnê̆ dêh.

¹²Yua kơ lu bơngai mă pơm kơnê̆ hơdôm hrĕng wơ̆t, kư̆m oei arih sot; lei ră inh băt lu bơngai hli yom kơ Kră Yang 'Bok Kei-Dei, sĭt gô đei tơdrong pŭn hiôk yua lu sư hli yom Kră Yang 'Bok Kei-Dei.

¹³Lu bơngai kơnê̆, ưh kơ đei pŭn hiôk ôh; kư̆m ưh kơ arih sot mơ̆n, yua kơ chăl arih lu sư nhen thoi yơ̆p, thoi ngôi 'bônh kơ păr hiong; yua kơ lu sư ưh kơ hli yom kơ Kră Yang 'Bok Kei-Dei.

¹⁴Oei đei minh tơdrong lăm ala teh âu kư̆m tơdrong kơđei. Lơ bơngai pơm 'lơ̆ng tă kơ đe pơm kơnê̆ kơ sư nhen thoi lu bơngai pơm kơnê̆ păng đei lơ bơngai pơm kơnê̆ tă huay pơm kơnê̆ kơ sư thoi lu bơngai pơm 'lơ̆ng. Inh khan tơdrong noh kư̆m tơdrong kơđei.

¹⁵Inh pơư hloi tơdrong hiôk chơt noh 'lơ̆ng, yua kơ lăm ala teh 'nâu ưh kơ đei tơdrong kiơ 'lơ̆ng hloh kơ kon bơngai bơ̆n sŏng sa, nhă đak păng hiôk chơt; noh boih tơdrong mă apah 'mong ăn kơtơ̆ng tơdrong bơ̆n bơ̆jang arih gleh hrat, đơ̆ng Kră Yang 'Bok Kei-Dei đei ăn kơ bơ̆n tơ ala teh âu.

¹⁶Kơplah jơhngơ̆m inh adrin nŏng kơ tơchĕng chơchă wă kơ băt tơdrong gơh hơgei, măng năr măt pă đei pơdơh. Tơchĕng liơ tơdrong jang mă gleh hrat pơmat-tat dêh lăm teh đak âu.

¹⁷Inh kư̆m 'bôh tôm tơdrong jang Kră Yang 'Bok Kei-Dei, inh băt kon bơngai ưh kơ kĕ hlôh đĭ kơ dôm tơdrong đei truh tơ ala teh âu, mă khan nŏng hĭ tôch bơneh kư̆m ưh kơ kĕ hlôh kiơ; păng mă khan bơngai hơgei ngeh khan gô băt, kư̆m ưh kơ kĕ kơ băt 'mơ̆i.