Read bahnar Hor 7 Bible Online

Hor 7 - bahnar bible

Hor 7

¹Tơdăm Ơ kon adruh pơtao, Lăng jơ̆ng ih 'bot chơkhŏ mơ̆t dêh! Kơiĕng ih hơpôm thoi tơmo gĭt, Jing đơ̆ng ti lu thơ̆ pơm.

²Klŏk ih hơpôm thoi kơchŏk đei sik hơmu ling-lang lăm noh. Klak ih hơlôk thoi pôi 'ba mi, Pơkao kok jơk jum dăr.

³'Bar pah toh ih hmŭng hmăng thoi kon kơtŏng kơmar.

⁴Hơko ih nhen thoi hnam thôt pơm păng bơla. Măt ih hlăng thoi đak dơnâu tơ pơlei Hesbôn, Jê̆ 'măng jang Bat Rabim. Muh ih nhen thoi hnam thôt char Liban. Lăng tơklă pơlei Đamas.

⁵Kơ̆l ih thoi kông Karmel, Sŏk ih kơjung nhen thoi che găm gôh. 'Bơ̆t pơtao lăng tơ sŏk ih, jơhngơ̆m sư huŏng hloi.

⁶Ơ bơngai inh hơyuh ih guăng tơpă.

⁷Akâu ih hơpơ̆r thoi tơm 'long gao. Toh ih thoi hơie plei sư.

⁸Inh khan kơ inh gô hao tơm 'long gao noh. Păng rôp kơjăp lu hơie sư. Ơ, hơpơi wă dêh kơ 'bar pah toh ih thoi hơie hơmu, Păng 'bâu phu đơ̆ng ih dui jơhngơ̆m thoi 'bâu phu hơra mi.

⁹Ih Chŭm inh 'ngam thoi đak hơmu. Ro hloi tơ hơkŭng păng hơnĕnh inh.

¹⁰Inh jing tơmam kơ pơyô inh, Tôm tơdrong sư hơpơi wă lăm inh ngăl.

¹¹Năm tơ âu bĕ, ơ bơngai inh hơyuh, bĕ ba năm tơ mir. Păng 'bĭch hloi kơmăng tơ pơlei iĕ;

¹²Pơgê oei hrôih ba iung đơ̆ng tep năm tơ pơgar hơmu. Wă lăng lăng tơm hơmu tam bluh tơmơ̆ng ưh. Băt pơkao sư tam tơlang ưh, Tơm 'long gărnăt băt tam pơkao ưh. Tơ noh inh gô pơdah jơhngơ̆m inh hơyuh kơ ih.

¹³'Bum mandrakea 'bâu phu sư păr đông, Tơ 'măng bơ̆n đei tôm plei 'lơ̆ng. Plei 'nao hăm plei so hai. Plei noh inh 'măn bơih kơ ih, ơ bơngai inh hơyuh.