Read bahnar Hor 8 Bible Online

Hor 8 - bahnar bible

Hor 8

¹Ô rŏ kơ ih jing 'nhŏng inh! Bơngai mă kư̆m mŏm toh mĕ inh! Tơdah inh tơ'bơ̆p ih tơ 'nguaih inh gô chŭm ih. Ưh kơ đei bu pơjăm.

²Inh gô chông ba ih brŏk tơ hnam mĕ inh, Sư bơngai mă bơtho inh. Inh gô ăn kơ ih huch đak hơmu 'ngam, Păng huch đak gărnăt inh.

³Ô rŏ kơ ti 'ngiĕo ih gô hơgơn ala kơ̆l inh. Ti 'ma ih kuăr inh.

⁴Ơ lu adruh pơlei Jêrusalem, inh pơkă kơ iĕm, 'nĕ kơ hơtŭt 'bơm, păng 'nĕ râu tơdrong hơyuh hơđơ̆r, mưh tam mă trŏ kơ jơ.

⁵Bơngai noh bu mă 'nao brŏk đơ̆ng char glă? Oei gơning tơ bơngai sư hơyuh?

⁶Ăn kơ inh jing thoi tơmam klep lăm jơhngơ̆m ih, Thoi tơmam chơ̆m tơ kơkŏng ti ih; Yua kơ tơdrong hơyuh kơtang dang thoi tơdrong lôch, Jơhngơ̆m gar jing kơnê̆ thoi bơsat. Sư khơ̆ng thoi ŭnh. Pla ŭnh khơ̆ng tơtŏ dêh.

⁷Mă đei đak lơ kư̆m ưh kơ kĕ kơ chruh jơhngơ̆m hơyuh ôh. Mă đak glung jrŭ kư̆m ưh kơ kĕ lơ̆p tơhiong lê̆ sư mơ̆n. Tơdah bơngai bu iŏk đĭ mŭk tơmam đơ̆ng hnam sư wă răt tơdrong hơyuh, đe kư̆m ưh kơ hưch kơ sư.

⁸Nhôn đei oh adruh, oei 'lơ̆p toh sư tim mă klăn; Nhôn wă tơgŭm oh noh liơ, Lăm năr đe wă apinh oei kơ sư?

⁹Tơdah sư jing thoi dur pơlei, Nhôn gô man hnam thôt hu kơpal sư; Na tơdah sư jing thoi 'măng. Nhôn gô pơ̆ng lê̆ sư hăm 'long hơngo kơjăp.

¹⁰Inh thoi dur pơlei, 'bar pah toh inh thoi bơbŭng hnam thôt; Inh oei 'bơ̆t anăp sư thoi bơngai mă đei hiôk-hian.

¹¹Tơdăm Sôlômôn đei minh hlak pơgar hơmu tơ pơlei Baal Hamôn: Sư ăn kơ đe jang mưng pơgar hơmu noh; Rim 'nu bơngai mưng noh athei ăn kơ sư minh-rơbâu hlak jên hu lăm bơyan phĕ plei.

¹²Pơgar hơmu inh 'măn lê̆ kơ inh bơih. Ơ Sôlômôn, minh-rơbâu hlak jên hu noh gô lê̆ kơ ih. Bĕ oei 'bar-hrĕng hlak noh apah lu bơngai jang pơgar noh.

¹³Ơ bơngai mă oei lăm pơgar, buăl inh oei mơ̆ng nơ̆r ih pơma; Asong inh mơ̆ng nơ̆r ih!

¹⁴Adruh Jah brŏk tĕnh bĕ ơ bơngai inh hơyuh. Thoi minh pôm kơtŏng. Dah thoi minh pôm juei dăm tơ kơpal kông 'long 'bâu phu.