Read bahnar Esa 10 Bible Online

Esa 10 - bahnar bible

Esa 10

¹Răm-'băm tơpă kơ lu bơngai pơm khôi juăt glăi păng lu bơngai chih khôi juăt pơjuă pơđep,

²Hơngah kơ pơm tơdrong tơpăt lu bơngai hoh kơ đei păng ưh kơ pơm tơdrong trŏ kơ lu bơngai dơnuh hin lăm kon pơlei pơla Inh. Tơgar iŏk tơmam đơ̆ng lu drŏ-kăn adro, hơđuh iŏk tơmam đơ̆ng lu kon mơti.

³Lăm năr sek tơlang, Kơplah đei tơdrong kơnê̆ truh đơ̆ng ataih lu iĕm gô pơm kiơ? Lu iĕm kơdâu tơ bu mă lu iĕm wă gơnang dŏng tơgŭm? Lu iĕm wă 'măn mŭk tơmam iĕm tơ yơ?

⁴Ưh pă đei kiơ oei oei. Lăp kŭp kơ̆l drap lăm lu bơngai bơnă păng pơ̆k hơdai hăm lu bơngai lôch đĕch. Mă-lei ră, Kră Yang oei hil mĭl kơ lu sư 'mơ̆i, ti Kră Yang oei yơ̆r tơ kơpal wă pơm kơ lu sư.

⁵Răm-'băm tơpă kơ dêh char Asiri, sư thoi sơnguĕt tơdrong Inh hil mĭl, 'long jra mă lu sư chĕp 'bơ̆t ti noh tơdrong Inh hil mĭl.

⁶Inh wơh sư năm pơm kơ lu adrĕch adrung mă ưh kơ chu lui kơ Kră Yang 'Bok Kei-Dei, Inh athei sư blah kon pơlei mă tơblĕk Inh, wă plah tơgar iŏk tơmam, păng pơjuă lu sư thoi rơpŭk rok trong.

⁷Mă-lei sư ưh kơ wă thoi noh. Lăm jơhngơ̆m sư ưh kơ tơchĕng thoi noh ôh sư wă 'maih pơrăm tơhiong lê̆ lơ dêh char.

⁸Sư khan: “Lu kră pơgơ̆r lu bơ̆n ưh kơ trŏ pơtao ngăl hă?

⁹Hăm trŏ kơ pơlei Kalnô kư̆m thoi pơlei Karchêmis, pơlei Hamat kư̆m thoi pơlei Arpat, pơlei Samari kư̆m thoi pơlei Đamas?

¹⁰Kŭm thoi ti inh đei tơgar iŏk bơih dêh char pơtao đei lu rup yang. Rup yang lu sư hloh kơ rup yang lăm pơlei Jêrusalem păng pơlei Samari.

¹¹Inh ưh kơ wă pơrăm rup yang pơlei Jêrusalem hă? Thoi inh đei pơm bơih kơ pơlei Samari hăm rup yang sư?”

¹²Mă-lei mưh Kră Yang pơkeh tơdrong jang Sư kơ kông Siôn păng pơlei Jêrusalem, Sư gô phak pơtao Asiri, yua kơ jơhngơ̆m sư pơang păng măt sư lăng pơrŏ.

¹³Yua kơ sư khan: “Inh đei pơm bơih tơdrong 'nâu đơ̆ng ti pran kơtang inh. Đơ̆ng tơdrong inh gơh hơgei hlôh wao. Inh đei rĭ tơplih bơih hơdral teh đak lu kon pơlei; Blah iŏk lu tơmam gĭt đơ̆ng anih lu sư mong. Thoi bơngai nuih kơtang, inh đei tơhuŏng bơih lu pơtao đơ̆ng tang-dŏ lu sư.

¹⁴Ti inh đei iŏk bơih mŭk tơmam đơ̆ng kon pơlei thoi iŏk tơpu sem. Thoi đe dônh kơtăp iĕr đơ̆ng yŏng sư lê̆. Inh dônh pơpôi bơih đĭ teh đak. Ưh kơ đei bu tơtuh pơnăr păr, dah ha 'bơ̆r krao ôr.”

¹⁵Hăm trŏ kơ sung tưk sư kơdih hloh kơ tơ'ngla chĕp sư? Dah hơnuă pơrŏ ot plơ̆ kơ bơngai chĕp sư? Dah thoi sơnguĕt hiŏng bơngai chĕp sư? Dah thoi 'long jra tưk ti bơngai chĕp Sư.

¹⁶Thoi noh Kră Yang Tih Hloh, gô tơjur ăn tơdrong jĭ iôr hiang kơ lu linh pran kơtang sư. Đơ̆ng tơdrong pơang sư, ŭnh gô sa nhen thoi pla ŭnh sa.

¹⁷Tơdrong hơdah bơngai Isơrael gô jing ŭnh, Kră Yang 'Lơ̆ng Rơgoh sư gô thoi pla ŭnh; Sư gô sa pơgoh lu jơla hăm jơ'bôt 'long jơla lăm minh năr.

¹⁸Ŭnh gô sa đĭ tơdrong 'lơ̆ng rŏ 'long kơdrơ̆ng lăm bri păng chŭn mir teh mơ̆r bơhngol hăm akâu jăn hloi. Thoi bơngai jĭ wă lôch.

¹⁹Lu 'long oei lăm bri kơdrơ̆ng pă tŏ sĕt, dĭng mah minh 'nu hơ'lơ̆p kĕ chih jô̆.

²⁰Lăm năr noh, dôm lu bơngai Isơrael mă oei oei. Dôm lu bơngai lăm adrĕch Jakôp oei klaih, gô ưh pă gơnang kơ bơngai mă pơrăm lu sư. Mă-lei gô gơnang sĭt kơ Kră Yang, Tơ'ngla 'Lơ̆ng Rơgoh Isơrael.

²¹Dôm lu bơngai mă oei arih gô wih brŏk. Dôm lu bơngai adrĕch Jakôp noh gô wih brŏk tơ Kră Yang 'Bok Kei-Dei Mơsêh Mơyang.

²²Ơ lu bơngai Isơrael, mă khan adrĕch adrung iĕm lơ thoi chuơh cheng đak dơsĭ, lăp tŏ sĕt đĕch gô wih brŏk. Đei pơkă bơih wă pơrăm hăm tơdrong tơpăt hơnơ̆ng.

²³Yua kơ, Kră Yang Tih Hloh đei pơkă gô pơm tơdrong pơrăm jơ̆p kơpal teh lu Sư.

²⁴Thoi noh, na Kră Yang Tih Hloh khan: “Ơ kon pơlei pơla Inh oei lăm Siôn, 'nĕ kơ hli kơ lu bơngai Asiri, mă khan lu sư iŏk sơnguĕt teh iĕm păng yơ̆r 'long jra wă pơjuă pơđep kơ lu iĕm thoi bơngai Êyiptơ pơm sơ̆.

²⁵Ưh pă đunh bơih tơdrong Inh hil kơ iĕm gô đĭ na. Tơdrong Inh mĭl gô plơ̆ tơwih pơrăm lu sư.”

²⁶Kră Yang Tih Hloh gô chĕp sơnguĕt teh lu sư. Thoi Sư đei pơm kơ kon pơlei Midian 'bơ̆t tơmo Ôrep; păng Sư kư̆m yơ̆r 'long jra tơ kơpal đak dơsĭ, thoi Sư đei pơm tơ Êyiptơ sơ̆.

²⁷Lăm năr noh kơnh tơdrong iĕm pŭ trăp gô plôh đơ̆ng hơngiĕng iĕm. 'Long ăt gô yaih lê̆ đơ̆ng hơko iĕm. 'Long ăt gô tơgơ̆. Yua kơ iĕm tih bek prah bơih.

²⁸Sư blah truh tơ pơlei Ayat. Sư rok pơlei Migrôn. Sư mong 'măn lê̆ tơmam sư lăm pơlei Mikmas.

²⁹Lu sư rok trong kuĕt kuĕl sơlam kông, lu sư 'bĭch 'bơ̆t pơlei Gêba; kon pơlei Rama hli tơrơ, kon pơlei Gibêah kơdâu ôn đĭ noh pơlei Sôl sơ̆.

³⁰Ôr mă re bĕ, Ơ kon pơlei Galim! Mơ̆ng bĕ ơ pơlei Laisa păng mơnat dêh kơ kon pơlei Anathôt!

³¹Kon Pơlei Matmêna kơdâu ôn. Lu bơngai oei lăm pơlei Gêbim kơdâu chă anih ôn kơ'nơp.

³²Năr 'nâu bơih lu sư dơ̆ng 'bơ̆t pơlei Nôp, Sư hiŏng ti Sư blah hăm lu kon pơlei Siôn, tơ kông groi pơlei Jêrusalem.

³³'Nâu, Kră Yang Tih Hloh, gô yua tơdrong mơsêh pran kơtang krưp Sư chre dơng 'long. Lu tơm 'long tih kơjung gô kăl tơpăk đĭ; 'long kơjung gô păk tơ ala teh.

³⁴Sư gô kăl lu 'long rơ̆m rĕk lăm bri kơdrơ̆ng hăm sung. Char Liban hăm lu 'long tih kơjung gô păk 'bơ̆t anăp Tơ'ngla Mơsêh Mơyang.