Read bahnar Esa 11 Bible Online

Esa 11 - bahnar bible

Esa 11

¹Đei minh pôm tơ'biĕng gô chăt đơ̆ng tơm Jese, đei minh pôm dơng chăt đơ̆ng rơh sư gô đei plei.

²Yang Bơhngol Kră Yang gô oei kơpal Sư, Yang Bơhngol ăn kơ sư đei đon gơh hơgei păng mơsêh mơyang, Yang Bơhngol ăn kơ sư hlôh băt păng hli yom kơ Kră Yang.

³Sư hiôk chơt lăm tơdrong hli yom kơ Kră Yang, Sư ưh kơ sek tơlang kiơ̆ kơ măt 'bôh, kư̆m ưh kơ sek kiơ̆ đon Sư kơtơ̆ng.

⁴Mă-lei Sư gô sek tơlang tơpăt kơ lu bơngai dơnuh, păng sek ăn kiơ̆ tơdrong tơpăt hơnơ̆ng kơ lu bơngai pơmat-tat kơpal teh âu. Sư gô teh teh đak hăm 'long jra đơ̆ng 'bơ̆r Sư pơma păng hơyuh kial đơ̆ng hơkŭng Sư na pơlôch lu bơngai pơm kơnê̆.

⁵Tơdrong 'lơ̆ng tơpăt noh thoi tơlei tơ̆n Sư, tơdrong tơnăp sĭt noh thoi tơlei tơ̆n tơ kơiĕng Sư.

⁶Na lu kŏ-so gô oei hơdai hăm kon triu, djrang 'bĭch hơdai hăm kon bơbe, kon rơmo, dăm-brang sem dơrong bek 'lơ̆ng kư̆m ngôi hơdai, minh 'nu 'lơ̆p gô dui wei lu sư.

⁷Rơmo akăn gô sa hơdai hăm chơgơu, kon lu sư gô drum hơdai, dăm-brang gô sa hơnong 'ba thoi rơmo.

⁸Lu hơ'lơ̆p oei mŏm gô pơm ngôi 'bơ̆t anih 'bih dong oei, lu hơ'lơ̆p ưh pă mŏm bơih gô 'bot ngôi trôm 'bih mă choh lôch.

⁹Lu sư ưh kơ gơh pơm kơnê̆ păng pơrăm băl ôh, jơ̆p kơ anih lăm kông 'lơ̆ng rơgoh Inh, yua kơ jơ̆p-jang kơ teh đak 'bĕnh blai tơdrong hlôh băt kơ Kră Yang bơih, thoi đak ro 'bĕnh dơsĭ.

¹⁰Lăm năr noh kơnh, rơh Jese iung pơm thoi hla-kơ ăn kơ rim adrĕch adrung kon bơngai. Rim teh đak gô năm chă Sư, anih Sư pơdơh gô đei rang mơnhal.

¹¹Lăm năr noh kơnh, Kră Yang gô yơ̆r ti Sư pă minh 'măng dơ̆ng wă huai iŏk kon pơlei Sư mă oei đei đơ̆ng lăm teh đak Asiri, Êyiptơ, Patrôs, Êthiôpi, Êlam, Sinar, Hamat păng đơ̆ng lu bŏl đak dơsĭ.

¹²Kră Yang gô pơdơ̆ng hla-kơ ăn kơ rim teh đak akŭm iŏk lu bơngai Isơrael mă đêl đe puh tơweh; pơpôi iŏk lu bơngai Juđa đêl lu sư tơklah tơklang đơ̆ng puăn pah mum teh đak.

¹³Êphraim ưh pă hil klai dơ̆ng bơih, lu bơngai pơm kơnê̆ kơ Juđa đe gô tơhiong đĭ, Êphraim ưh pă areh kơ Juđa dơ̆ng, Juđa ưh pă pơm kơnê̆ kơ Êphraim dơ̆ng bơih.

¹⁴Mă-lei lu sư gô jur năm pơm kơ Philistin tơ gah bơmơ̆t, lu sư wang plah tơgar iŏk pơlei teh đak gah hơlĕch, lu sư yơ̆r ti pơm kơ Eđôm păng Môap, Ammôn gô chu kơ lu sư.

¹⁵Kră Yang gô pơm kơ đak dơsĭ Êyiptơ hrơ̆ đĭ; Kră Yang yơ̆r ti sư kơpal đak krong Ơphrat hăm kial tŏ, Sư blah song krong noh jing tơpơh chơnglah, wă kơ đe yak năm lăm krong noh jơ̆ng ưh kơ hơiuh ôh.

¹⁶Gô đei minh pôm trong tih ăn kơ kon pơlei Kră Yang mă oei đei đơ̆ng dêh Asiri yak năm, kư̆m thoi đei bơih trong tih ăn kơ lu đe Isơrael yak năm, năr mă lu sư lĕch đơ̆ng dêh Êyiptơ noh.