Read bahnar Esa 14 Bible Online

Esa 14 - bahnar bible

Esa 14

¹Kră Yang gô mơnat kơ Jakôp, păng oei wă rơih iŏk đe Isơrael minh wơ̆t dơ̆ng, Kră Yang gô krao tơbrŏk lu sư dơ̆ng, oei lăm teh đak lu sư kơdih, lu bơngai tơmoi teh đak nai gô oei hơdai lu sư păng pơgơ̆p hơdai hăm adrĕch Jakôp.

²Lu kon pơlei teh đak tơmoi gô năm ba lu đe Isơrael brŏk tơ dêh lu sư kơdih; adrĕch Isơrael gô iŏk lu sư, pơm đam drŏ-nglo drŏ-kăn lăm teh đak Kră Yang. Lu sư gô rôp lu bơngai đêl rôp lu sư pơm bơnă, păng pơgơ̆r lu bơngai mă đêl pơgŏ pơđep lu sư.

³Truh năr Kră Yang ăn kơ iĕm pơdơh pơklaih iĕm đơ̆ng tơdrong ơh sơ'ngon hli tơrơ păng đơ̆ng tơdrong jang gleh trăp mă đêl đe rôp pơgŏ iĕm,

⁴Na iĕm gô yua nơ̆r pơma 'nâu wă pơjăm pơtao Babilôn: Lơliơ mă lu bơngai pơjuă pơđep hiong đĭ, bơngai mă hil areh pă 'bôh dơ̆ng bơih.

⁵Kră Yang gơ̆ lê̆ bơih 'long băl lu bơngai pơm kơnê̆, păng gơ̆ lê̆ 'long jra lu pơtao pơgơ̆r.

⁶Lu bơngai mă oei lăm tơdrong hil mĭl teh pơlôch bơih kon pơlei ưh kơ pơdơh ôh. Lăm tơdrong hil mĭl pơgơ̆r bơih teh đak, pơm kơnê̆ ling-lang.

⁷Jơ̆p-jang kơ teh đak oei pơdơh hiôk-hian, lu sư hơri chơt hiôk.

⁸'Long hơngo hla iĕ, 'long hơngo lăm dêh Liban kư̆m hiôk yua păng khan: “Đơ̆ng năr kăl ih păk noh, ưh kơ đei bu năm kăl nhôn dơ̆ng.”

⁹Tơ dêh atâu sŭng tơdrŏ wă tơ'bơ̆p ih kơplah ih truh tơ noh, lu bơhngol bơngai lôch băl noh jơ̆ lu yŏng pơgơ̆r jơ̆p-jang kơ teh đak lu sư hơđơ̆r wă tơ'bơ̆p ih, lu pơtao rim kơ teh đak iung đơ̆ng tang-dŏ pơtao sư.

¹⁰Đĭ-đăng kơ lu sư gô khan kơ ih: “Ih dai rơdu thoi lu nhôn mơ̆n; ih dai lei-lăi thoi lu nhôn mơ̆n.

¹¹Tơdrong pơrŏ ih păng re brŏ ih reh gô jur tơ dêh atâu, hrai gô pơm hơdŭ ih lơ̆k 'bĭch, gô pơm khăn ih su!

¹²Ơ sơnglŏng wŏng-tar, kon drŏ-nglo pơgê hrôih, lơliơ mă ih đơ̆ng kơpal plĕnh ti huŏng tơ ala teh âu! Ơ lu bơngai chă pơrăm lu teh đak, liơ mă đe tơhuŏng lê̆ ih tơ ala teh âu!

¹³Mă ih tơchĕng lăm to khan: “Inh gô tŏk tơ kơpal plĕnh, inh gô hơtŏk tang-dŏ pơtao inh tơ kơpal hloh kơ lu hơnglŏng Kră Yang 'Bok Kei-Dei, inh gô tŏk hơ-oei kơpal tang-dŏ pơtao tơ kơpal kông anih lu yang akŭm, tôch tơ gah yă-nơ̆m.

¹⁴Inh gô tŏk tơ kơpal lu hơmơ̆l, inh gô pơm kơ inh thoi Kră Yang Tih Hloh.

¹⁵Mă-lei đe gô tơjur ih tơ Dêh atâu sŭng, huŏng tơ anih tôch kơ jrŭ.

¹⁶Lu bơngai 'bôh ih gô lăng pơglăn tơ ih ưh kơ tơtĕp măt, lăng tơdrong truh kơ ih hlĭch na khan: “Hăm trŏ kơ bơngai âu pơm kơ teh tơdrŏ, pơm kơ lu dêh char hli tơtơ̆?

¹⁷Pơm kơ lu dêh char jing teh glă, pơrăm lê̆ lu plei tih, păng ưh kơ tơlĕch lu bơngai pơm bơnă brŏk tơ hnam sư kơdih?”

¹⁸Đĭ-đăng pơtao rim teh đak. 'Bĭch lăm bơsat ư-ang lu sư.

¹⁹Mă-lei đe klơ̆m lê̆ ih tơ 'nguaih kơ bơsat ih, thoi dơng 'long bŭk đơ̆ng đe chre tŭk lê̆ đơ̆ng tơm, akâu ih klơ̆p 'bĕnh kơ bơngai lôch, đe 'bet hăm đao gưm đe tơlơ̆ lăm sơlŭng tơmo jrŭ, thoi akâu bơngai lôch đe juă gơhlơ̆r tơ ala jơ̆ng!

²⁰Ih ưh kơ gơh 'bŭ hơdai lăm bơsat hăm lu pơtao, yua kơ ih pơrăm teh đak ih păng pơlôch kon pơlei ih, adrĕch adrung ih bơngai kơnê̆ đe gô ưh pă đei tơ'blŏk dơ̆ng

²¹Hơmet bĕ tơdrong pơlôch kon sâu lu sư yua kơ tơdrong yoch lu yă 'bok lu sư, 'Nĕ ăn kơ lu sư iung iŏk teh đak, pơjing plei tih kơjăp jơ̆p kơ teh đak dơ̆ng!

²²Kră Yang Tih Hloh khan: “Inh gô iung pơm tơwih kơ lu sư, Inh gô pơrăm sŭt lê̆ anăn pơlei Babilôn păng lu kon pơlei oei oei đei lăm noh, hăm đĭ lu kon sâu lu sư dơ̆ng mơ̆n.” Kră Yang khan thoi noh.

²³“Inh gô pơm kơ teh đak lu sư jing anih lu jơma oei, jing đak dơnâu 'nhĕt, Inh gô pơlôch pơrăm păng hơpuih pơgoh lê̆ sư.” Kră Yang Tih Hloh khan thoi noh.

²⁴Kră Yang Tih Hloh pơma pơkăm khan: “Tơpă tơdrong Inh pơkă lê̆ bơih sĭt sư gô đei truh, tơdrong Inh tơchĕng lê̆ bơih sư gô jing.

²⁵Inh gô blah pơrăm bơngai Asiri lăm teh đak Inh, gô pơjuă bơhlơ̆r sư tơ kơpal kông Inh, 'long ăt sư gô plôh gơ̆ lê̆ đơ̆ng lu kon pơlei Inh, hơnong trăp sư gô hơ'nglơh lê̆ đơ̆ng hơngiĕng lu sư.”

²⁶Noh bơih tơdrong Inh tơchĕng rĕng lê̆ bơih wă pơm kơ jơ̆p-jang teh đak, 'nâu ti Inh yơ̆r kơpal wă pơm kơ teh đak.

²⁷Yua kơ Kră Yang Tih Hloh pơkă bơih na bu gơh sŭt lê̆? Ti Kră Yang yơ̆r bơih na bu gơh gơ̆t lê̆?

²⁸Sơnăm pơtao Ahas lôch đei nơ̆r khan lê̆ adrol thoi âu:

²⁹Ơ bơngai Philistin, iĕm 'nĕ kơ chhôk 'nă ôh yua kơ sơnguĕt teh iĕm tơgơ̆ bơih, Đơ̆ng tơm rơh adrĕch 'bih gô jing đei 'bih hơkăm, plei đơ̆ng 'bih hơkăm gô jing 'bih ŭnh gơh păr.

³⁰Kơplah 'nei kơnh lu bơngai dơnuh gô đei tơmam sa, bơngai kơ'bah hoh kơđei gô phĭ hiôk, mă-lei Inh gô pơm kơ yă 'bok tơm rơh adrĕch adrung ih lôch kơ pơngot, păng lu bơngai oei arih Inh gô pơlôch.

³¹Ơ 'măng jang nhơ̆m ơh bĕ, ơ pơlei tih ôr tơngưih bĕ, ơ pơlei Philistin đĭ-đăng iĕm gô pơchah răm, yua kơ đei 'nhui ŭnh tih đơ̆ng yă-nơ̆m truh, ưh kơ đei bu gơh weh đơ̆ng anih lu khŭl linh sư.

³²Wă tơl tơwih liơ kơ bơngai pơtruh nơ̆r đơ̆ng minh pôm teh đak? Tơl tơwih khan: “Kră Yang pơjing kơjăp bơih Siôn păng lu kon pơlei Sư mă ơh sơ'ngon pơmat-tat gô kơ'nơp lăm noh.”