Read bahnar Esa 15 Bible Online

Esa 15 - bahnar bible

Esa 15

¹Nơ̆r khan lê̆ adrol gah Môap, ô, pơlei tih Ar lăm char Môap pơchah răm lăm minh măng. Lăm minh măng pơlei Kir lăm char Môap pơchah pơchek đĭ!

²Lu bơngai Dibôn tŏk tơ groi; lu sư năm tŏk tơ anih kơjung kơkuh kơ yang wă hmoi; kon pơlei Môap nhơ̆m hmoi ơh yua kơ kông Nêbô păng pơlei Mêdêba, lu sư yuă sŏk 'ngôch ngăl, sŏk kang lu sư hơkôih đĭ.

³Lu sư su 'bi sơ'ngon jơ̆p kơ trong tih lăm pơlei, lu sư nhơ̆m hmoi tơ kơpal bơbŭng hnam păng tơ anih hơdrŭm, lu sư hmoi ơh lĕch đak măt.

⁴Kon pơlei Hesbôn păng kon plei Êlêaleh, nơ̆r lu sư krao ôr re dêh mah kơtơ̆ng truh tơ pơlei Jahas. Na lu linh dêh char Môap nhơ̆m ơh, lăm jơhngơ̆m lu sư pơpơ̆.

⁵Jơhngơ̆m inh hmoi ơh kơ Môap. Lu kon pơlei sư kơdâu ôn tơ pơlei Soar păng truh tơ pơlei Êglat Sêlisia, lu sư tŏk năm tơ pơlei Luhit, nhơ̆m rah yak rah rok trong pơlei Hôrônaim, lu sư hmoi ơh sơ'ngon yua kơ tơdrong đe pơrăm đĭ.

⁶Krong Nimrim hrơ̆ đĭ, 'nhĕt đĭ kro krĕnh. 'Nhĕt 'lơ̆p hơdrih pă đei, ưh pă đei 'nhĕt dah 'long hơdrih ayơ dơ̆ng.

⁷Noh bơih mŭk tơmam mă lu sư đei păng lu tơmam gĭt mă lu sư tah mong, lu sư chĕp ba tŏk pah to thŭng thong đak 'long prai.

⁸Jơwa re lu sư nhơ̆m hmoi, kơtơ̆ng jơ̆p kơ hơdral dêh Môap, nơ̆r lu sư nhơ̆m hmoi kơtơ̆ng truh tơ pơlei Êglaim, păng tơdrong ơh sơ'ngon oei truh tơ pơlei Bêr Êlim.

⁹Yua kơ đak glung tơ pơlei Dibôn 'bĕnh kơ pham, mă-lei Inh gô pơthim ăn tơdrong pơmat-tat truh kơ pơlei Dibôn, Minh pôm dăm-brang sa lu bơngai Môap mă oei arih păng lu bơngai mă oei đei lăm dêh sư.